2013 東京遊 Day 5

今日係最係第一日响 Hilton 食早餐，因為食完早餐後就出發去箱根喇！見到今日嘅早餐有牛丸食，即刻攞番碗嚟食。但佢嘅肉質同香港嘅牛丸完全唔同，一啲都唔彈牙，仲有少少削嘅感覺，我都係鍾意香港牛丸多啲。

 

兩個鐘頭嘅車程，終於到逹箱根湯本車站。我特別要求哥哥俾我响呢樹落車，因為同事托我幫佢買茶都利抺茶餅。最後當然唔止買呢一樣啦，我哋簡直係瘋狂購物。小朋友又周圍試食，大朋友就周圍咁買。

瘋狂購物一輪後，我哋就直上大湧谷食溫泉蛋同埋食午餐。呢樹奶白色嘅山水就係溫泉嘅來源，呢到有好大陣嘅硫磺味。一籃籃原色嘅蛋放入呢個溫泉水一浸後，再提上嚟就變咗做黑色嘅溫泉蛋。而山下賣嘅蛋就係用吊纜吊落山下賣。我最鍾意食嘅就係呢啲全熟嘅蛋，半生蛋或者太陽蛋都唔係我隻蛋。

 

 

   



食完溫泉蛋後，我哋就嚟咗呢茶屋企我哋嘅午餐。呢間茶屋可以話得上係呢個山頭僅有嘅食店，雖然係獨市生意，但係佢嘅食物絕對唔求其。我叫咗呢款辣拉麵，但嚟到先知原來唔係普通嘅拉麵，係墨魚汁拉麵呀！湯底嘅辣度剛剛好，麵嘅韌度又適中，唔會煮得太淋，簡直就係我碗麵呀！

 

食完午餐 (其實應該係下午茶，因為我哋開餐時已經係下午三點喇！) 之後，我哋就出發去御殿場 shopping 喇！其實我真係無諗住買嘢架，最多都係睇吓有無手信買到，都好彩，俾我買到三份。去到 Adidas，見到竟然做緊全場六折，跟住仲要俾我睇中咗對波鞋。Outlet 貨已經係底，原價大約港幣三佰元，而家折咗之後，只係大約$180咋。。。無理由唔買架，唔買好似對唔住自己咁。雖然之前已經買咗對 NB，但都忍唔住要買埋呢對。

Shopping 後，我哋就返咗去我哋入住嘅溫泉酒店食晚飯，我哋一早已經訂好咗今晚食懷石料理，我係第一次食架咋！

呢個係一個夏季嘅和牛懷石料理壽喜燒，先嚟一個前菜同餐前梅酒

 

而前菜就分別有蕃茄果凍、豆腐、雞玉子豆腐、梅醋順菜同魷魚，呢幾款前菜最鍾意就梅醋順菜，我都唔知咩菜，不過食落酸酸地好開胃

 

 

跟住係一個冷湯，但就真係唔知咩名堂，食落有啲怪怪地，唔知係咩味

 

之前再有刺身。。。金槍魚



再嚟一條鹽燒黃魚，睇下條魚燒得幾靚，啲肉仲好鮮甜添呀



我最期待嘅和牛壽喜燒，因為我哋唔太知每一樣食材嘅放法，所以餐廳就為我哋服務，續款為我哋放落鍋上

 

佢哋先用一塊牛油 （網友話係牛嘅脂肪將個鐵鍋塗滿，然後放上和肉同湯汁，再將每一款食物放入鍋內，蓋上一陣就可以食嘢。我哋有啲團友忘記開蓋，好驚啲牛肉會煮得太耐會韌，但發現無論啲牛煮咗幾耐，都仍然係好淋架！好多謝個服務員放慢個速度，等我可以將整個過程拍下。

 

 

 

   

 

 

之後仲有一個炸物同五目飯

 

甜品就杏仁果凍同埋羊羹



呢一餐嘅懷石料理真係大開眼界，每一款食物都係非常精緻，我哋一行14人，14份食物都係同樣大細。

============================================

感謝 事頭婆 提供以上資料

事頭婆的網誌: http://pamdinningtable.blogspot.hk/

============================================