星馬泰 @ Red Thai 泰紅

而家嘅新蒲崗同幾年前嘅新蒲崗已經變化咗好多，幾年前嘅新蒲崗以茶記居多。自從譽港灣落成後，這裡多咗幾間較為人熟悉或裝修較好嘅食店，令我哋晚飯時段多咗選擇，唔一定要出走新蒲崗。

上一次未能試嘅呢間泰紅，呢晚我哋專誠提早晚飯時間，嚟呢樹一試。都真係幾爆，我哋6點到，7:30要交枱，因為佢哋之後都 full booking。我哋只好速戰速決，快速點餐。

呢間餐廳集合咗星馬泰嘅食物，如果你好呢3地嘅食物，呢道都係不錯嘅選擇。當然如果你偏向鍾意食泰國菜，而又想食較正宗或較多款式，咁當然都係去不遠嘅九龍城食較好啦！

有一款泰國菜我係好鍾意食嘅，可以的話我都必叫。就係泰式蝦刺身，還記得喺好多年前，有個朋友帶我去九龍城一間叫金寶嘅泰國餐館食飯，當時佢嘅泰式刺身令我愛上咗佢（唔好意思，係碟食物，唔係個人）。冷冰冰嘅蝦配上辣椒蒜片，再加上泰式酸酸辣辣嘅汁，又冷又酸又辣嘅感覺溶合啱一齊，梗直係冷暖你自知。呢道嘅蝦刺身比我以前食過嘅較肥美，但我反而覺得無咁好食。可能因為就係佢太肥美，啲汁唔可以完全滲入到去蝦肉內，反而不比薄身蝦好味。



我最 like 個肉骨茶，好足藥材味。



另一款泰式咖哩軟腳蟹，佢嘅咖哩並唔似平時食泰國咖哩嘅辣味，佢嘅咖哩味係帶甜，反而有少少似日本咖哩。



另一味咖哩係馬來西亞巴東咖哩雞，呢味咖哩反而有更香嘅咖哩味，我覺得比泰式咖喱更好味。



食咖哩最好配撘除咗飯之外，就係印度薄餅。這個印度薄餅上枱無耐，已經俾小魔怪攻陷，最後要加碼嚟多一籃。



好奇怪...點解星馬泰菜會有乳鴿食嘅？偏乾嘅乳鴿，味道一般。



除咗咖哩之外，我哋仲叫咗豬手肉同埋菠蘿炒飯，但我無食過，因為太飽鳥。

  

好多人都話女人有兩個胃，一個係放正餐，一個係放甜品。食飽咗正餐嘅我，見到呢個甜品 --- 甜筒山真係不能抗拒。脆脆嘅皮搽滿椰絲、花生、奶油，就好像食夾餅一樣。

============================================

感謝 事頭婆 提供以上資料

事頭婆的網誌: http://pamdinningtable.blogspot.hk/

============================================