浪漫水都威尼斯 ( 前篇 ) * 2008

小妹沒有做火車時間表既功課 , 所以連火車幾點開出都唔知 . 無諗過自己會咁好彩 , 12:35 先買到車飛 , 竟然順利上到 12:37 開出既火車 ! 由於火車就快開出 , 小妹跟同事 A 根本沒時間找二等車箱 , 決定上左車先再算 . 如小妹所瞭 , 我兩上錯頭等車箱 , 查票員即時指正 , 並帶我兩到二等車箱坐 . 感謝那位好心既查票員不但沒有罰小妹錢 , 還告訴小妹下次可以上左車先再買票 , 咁就唔洗咁趕 , 又學多樣野 !

大約三點十五分 , 小妹就到左 Venezia Mestre 車站 . 其實世人口中既威尼斯沒不是此站 , 而係再下一個站 Venezia Santa Lucia . 為何小妹在此站下車 , 實情威尼斯本島既酒店出名貴 , 自由行老手同事 K 就建議小妹可以訂前一個站既酒店 , 會便宜很多 .

一出車站 , 小妹跟同事 A 都好迷罔 , 完全唔知自己身在何方 . 根據地圖顯示酒店跟火車站是很近的 , 結果當然是被地圖騙了 . 搵左成半個鐘 , 都搵唔到路 , 就係依個時候 , 我兩遇到真正既背包友 . 原來她們都正迷路中 , 而且係香港同胞 ! 大家互相勉勵一番之後 , 再各找各路 . 雖然大家唔知對方係邊個 , 但個一刻 , 相信大家個心都好 Warm !

意大利人雖然英文唔好 , 但好肯幫人 . 小妹遇到一個好心大嬸 , 佢明明唔係行個邊 , 但見小妹迷路 , 就帶小妹行左好一段路 . 因為有佢既幫助 , 小妹終於知道自己身在何方 , 終於搵到間酒店 . 原來酒店跟火車站係一頭一尾 , 超級遠 !

安頓後 , 已經係下午五點鐘 , 終於正式展開小妹既威尼斯之旅 !

一黎到威尼斯本島 , 就遇到大雨 , 小妹跟同事 A 無預到會咁凍 , 都帶唔足保暖衣服 . 我兩好可憐咁係天橋底下互相取暖兼呆等 , 足足等左半個鐘先停雨 ! 也難怪 , 威尼斯四圍都係水 , 通常水國天氣都唔太穩定 , 只係等左半個鐘已經係萬幸 .

雨停左 . 小妹開始四圍行 . 本天書既地圖完全唔得 , 太多小橋流水人家 , 根本搵唔到自己身處既位置 . 我兩決定慢慢逛 , 看到好多精品店 , 大部份都係賣玻璃以及威尼斯面具 . 所有精品都好靚好靚 , 手工好精細 , 價錢亦實惠 . 小妹可是慳妹一名 , 但都有買到玻璃精品 , 可想而知有幾抵有幾吸引 !

行下行下 , 去左盡頭 . 一望無際都係水 , 唔通依到就係威尼斯既盡頭 ? 對面岸就有好多唔同顏色既民居 , 點解可以咁有童畫既感覺 ? 可以住係一個咁有浪漫情調既地方 , 真係令人羨慕 .

都唔記得過左幾多條橋 , 但一個景點都搵唔到 . 看來 , 小妹已迷失於水都之中 . 正打算搵路返歸既時候 , 係一條冷巷望過去 , 竟然見到好出名既利奧多橋 . 條橋既做型真係好靚 , 第一眼見到佢就已經愛上佢啦 !

搵到利奧多橋之後 , 就見到一些指示牌教人如何前往聖馬可廣場 . 越接近廣場 , 教堂鐘聲越響 , 小妹一路聽一路跟指示牌行 , 好快就到左聖馬可廣場 . 傳聞中聖馬可廣場白鴿多過人 , 但可能落過雨既關係 , 白鴿都不見了 , 整個廣場反而人山人海 , 非常熱鬧 !

廣場另一端既海岸停左一排又一排既貢多拉 , 以遠方聖喬治澳島為背景 , 景色十分醉人 . 那一剎那 , 小妹好迷罔 , 為時空交錯而迷罔 , 時間仿佛被停留於中世紀似的 !

六月天既意大利日照時間很長 , 時值八點多 , 太陽才準備下山 , 小妹趁仲有日光 , 急急起程回家 . 威尼斯四處都是小橋流水人家 , 小妹根本無法認路 , 天開始暗下來 , 小妹跟同事 A 急於熱鍋上的螞蟻 , 四圍亂闖 , 結果偏離航道 . 幸好遇到一對好心的意大利夫婦 , 他們帶著小妹走過了無數條小橋 , 暗巷 , 終於九點多抵達車站 . 在此衷心感謝那對夫婦 , 不然小妹就要路宿街頭 .

黑夜中的水鄉真的很寧靜 , 很美麗 :

一心以為上左巴士就可以安然回到酒店 , 但事與願違 . 小妹於 SAN MARCO 站下車 , 可能天黑的關係 , 完全迷失方向 , 走了大半個小時不但沒找到酒店 , 連人也沒遇上一個 , 接二連三既迷路事件真令小妹吃不消 . 不知走了多久 , 終於遇上一名日本男孩 , 得到他的幫助 , 我兩才順利返回酒店 . 今天真是可怕的一天 ! 累透了 ...