昨日既威尼斯一遊真讓小妹好受 , 早餐時候重提昨日既迷路事件 , 小妹跟同事 A 想法一致 , 威尼斯並沒有想像中美好 ! 從沒想過迷路是如此可怕 , 得到過咁多人既幫助後 , 小妹回機場工作時定能將心比心 , 一定會盡量為乘客提供協助 .
一邊吃豐富既早餐一邊檢討昨日既事情 , 明明跟足酒店職員所講係 SAN MARCO 落車 , 但點解會迷路呢 ? 原來最近酒店既車站係 2/8 SAN MARCO , 我兩昨晚一見到 SAN MARCO 就下車 , 根本無諗到有八個站都係叫 SAN MARCO 囉 ! 結果係 1/8 SAN MARCO 落左車 , 早左成個站 , 唔行到天光都要偷笑 ...
吸收左尋日既教訓 , 我兩自信滿滿地再次向威尼斯挑戰 ! 好順利咁到左威尼斯本島 , 今日天氣唔錯 , 只係少少陰天 , 但無落雨 !
講真 , 小妹最想睇既景點已經尋日睇左 , 今日慢慢行就可以了 . 最重要係今日唔會再偏離航道 , 我兩決定只行大街買手信 . 小妹再一次為玻璃精品而破費 , 閃令令既小東西實在太可愛啦 ! 朋友每回到歐洲都必買朱古力 , 貪佢便宜又唔佔位 , 小妹當然都買左好幾排派街坊 . 表姐最喜歡歐洲既意粉 , 黎到意大利又點可以唔買返去送比佢 ? 威尼斯有好多做型可愛 , 顏色艷麗既意大利粉 , 價錢仲好大眾化 , 手信自用都一流 !
尋日太趕兼太驚 , 根本無心情影相同睇野 . 今日先發現原來水中一條條既木柱係用黎泊船用 . 威尼斯係水國 , 馬路就無 , 小河就大把 . 家家户户都唔揸車而開船 , 小妹就見到有個爸爸開條船過黎接呀仔返學 , 真係好有型 !
落雨時 , 船夫都會用塊布遮住貢多拉 , 所以尋日未能一睹貢多拉真面目 . 今日一見 , 先發現一條小船原來可以裝飾到咁金光閃閃 , 難怪坐一轉要咁貴 . 貢多拉簡直係水上的士 , 隨時都會有船夫前來兜搭你上船 . 小妹唔明船夫點解個個都著橫條衫 , 係唔係制服黎架 ?
第一次見到歐洲既糕餅店 , 感覺好貴氣 , 所賣既糕餅果然貴到嚇死人 ! 小妹一直以為歐洲既糕餅係好吸引 , 但似乎想像永遠跟現實有距離 , 件件糕餅的確好糕餅 , 簡直係蛋糕跟餅乾混合體 , 仲要一睇就知係甜到漏個種 .
沿住大街慢慢行 , 慢慢睇 , 開始進入小巷 . 同事 A 被尋日事件嚇破膽 , 但小妹又真係好想再行入去睇下 , 所以大家就相約半小時後在超市集合 . 講真小妹都怕迷路 , 所以就只是一直向前行 , 而無行入小巷 . 意大利人真係幾好人 , 見小妹一個女仔自拍 , 都會主動走過來幫小妹拍照 . 今次旅程 , 教堯小妹要信任別人 , 平日在香港小妹既防人之心實在太高了 .
明天就會前往另一個國度 - 巴黎 , 今日最後一天在意大利 , 怎能不吃意大利 PIZZA 以及意大利雪糕 ? 意大利 PIZZA 跟平日在香港吃的 PIZZA HUT 完全是兩碼子既事 , 總覺得正宗的比較好吃 . 來了意大利數天 , 不知吃了多少支雪糕 , 一來價錢實惠 , 二來口味多 , 雖然如此 , 但小妹比較鐘情野莓口味 , 喜歡它的酸酸甜甜 .
為了趕明早前往巴黎的飛機 , 小妹跟同事 A 決定前往機場呆等到天亮 . 找了一個舒適的位置坐下來發呆 , 呆下呆下地睡著了 ... 一打開眼已是早上 , 在機場吃了一個傳統早餐 - 橙汁,咖啡加牛角包 , 盛惠 52 港元 .
威尼斯再見了 ! 意大利再見了 ! 巴黎 , 我來了 !
溫馨提示 : 同事 S 跟小妹講只要沿住大運河一直行 , 就可以去曬所有景點兼唔會當失路 , 是真是假 , 就要靠大家自己試下 !
貴賓室工作篇
