浪漫之都巴黎 ( 中篇 ) * 2008

法國既第一個清晨以一條法包開始 . 新鮮出爐既法包外脆內軟 , 盛惠 0.9 歐 , 簡直係背包客既恩物 ! 強烈推介早晨法包一條 !

法國雖然物價指數奇高 , 但交通洗費絕對比香港便宜 . 小妹今日決定市內觀光 , M 即 metro 絕對係最佳選擇 , 一張一日票只賣 5.8 歐 , 而單程就 1.6 歐 , 坐四次已值回票價 !

第一站係巴黎地標 - 艾菲爾鐵塔 tour eiffel . 依座塔分為三層 , 可步行上第二層再轉搭電梯 , 會平少少 . 小妹跟同事 A 都係畏高之人 , 根本無打算上塔頂欣賞風光 . 一心打算慢慢行去鐵塔對面既 Palais de Chaillot 先再影返個鐵塔 , 無奈行左一陣就開始落雨 , 所以就急急腳咁轉頭返 M 去下一個目的地 .

巴黎既天氣比意大利寒冷得多 , 小妹將行李裡既衣服以搭配形式穿 , 穿了四件衣服還是抵不了冷 , 勸大家一句歐洲氣溫不能盡信 , 18 度好比香港 8 度 ! 在 M 吃了個威尼斯早餐 , 熱咖啡果然有驅寒作用 , 正 !

第二站凱旋門及香榭麗射大道 . 相信無人唔知凱旋門既歷史 , 好大喜功既拿破崙為紀念打勝仗而建 , 門下仲設有一把永恆之火 . 無奈雨越落越大 , 而凱旋門位於馬路中心 , 小妹根本過唔到去 . 凱旋門再會了 ! 香榭麗射大道 , 小妹跟你無緣了 !

無預期會遇到下雨天 , 將小妹美好既一天遊攪成咁 , 真氣人 ! 為左避雨 ( 藉口 ! ) , 只好改去另一站 . 第三站名牌百貨公司 - 老佛爺 Galeries Lafayette . 老佛爺既 LV 店人山人海 , 大部份係中國同胞 , 所以有國語職員以及有即場退稅店 . 小妹買 LV 只用了 20 分鐘 , 但排隊退稅足足用左個半鐘 !

第四站位於蒙馬特區既聖心教堂 , 雨還是下個不停 . 白色教堂下既迴旋木馬好童話 .

拾級到山丘上既教堂 , 回頭一望 , 巴黎 ! 好一個浪漫之都 ! 但依一刻小妹滿腦子都只有這首歌 " 當我在蒙馬特 , 看遍滿街的馬戲 , 無端卻漸覺太自由 , 再也變不出驚喜 , 避了你至少幾千百公里 , 原來為了讓你不要再度被提起  ... " 沒有人再提起你 , 但小妹腦中總想起你 , 怎麼辦 ?

美麗浪漫既巴黎令小妹煩惱 , 走入聖心教堂休息一下 . 可惜聖心教堂不能拍照 , 所以小妹亦好乖 , 只係坐係到望住前方 . 教堂雖然有好多遊客 , 但大家都好安靜 . 沒有梵諦岡既金碧輝煌 , 卻有洗滌心靈既魔法 .

時間過得真快 , 轉眼間就到六點鐘 . 雖然同事口中既巴黎係犯罪既緣頭 , 但坐過多次 M , 都相安無事 , 相信自己小心點 , 提高警覺 , 賊人就無機可乘 .

溫馨提示 : 巴黎市內景點聚多 , 下雨令小妹錯過左香榭麗射大道 , 協和廣場既紀念碑 , 龐比度中心以及聖母院大教堂 . 祝願大家既巴黎 , 每天都陽光燦爛 !