食點心對香港人唔單止喺一種菜式選擇，更喺一種高興相聚嘅飲食文化，尤其一大棚人一齊去飲茶，想點就點，寧捨無拘束，輕鬆又自在，叫滿一枱點心，有大有細，夠晒陣勢，令人睇得暢快，食得開懷！依家點心專門店開得多的是，無分早晚，咩時候都可以食點心，今晚，又再跟老友嚟試菜並開懷一番，有講有笑嘆點心，選址就晌中港城平台嘅「功夫點心」，好多人都話佢位置隔涉、偏僻唔顯眼，哈哈，對小弟而言，就啱啱相反，因為小弟喺西鐵線居民，由中港城行5分鐘就到西鐵柯士甸站，搭兩個站就返到美孚！
以往所去過嘅點心專門店都比較窄小，但估唔到功夫點心內在環境除咗裝潢雅致外，空間非常寬敞闊落，配合牆邊多組屏風鏡飾，襯以柔和燈光，讓人感覺不侷限，挺舒服！
雖然處於尖沙咀區，取價亦算合理，茗茶每位收$6（要加一）。點心紙有趣、有心思，成本武林小秘笈咁樣，打開列晒所以點心款式及單價，一共有40多款，中英對照方便外籍人士，種類分為各式蒸點、黃金煎炸、即拉腸粉、生滾粥、煲仔飯、湯麵、其他、原盅燉湯、甜品及飲品，部分紅圈喺「功夫推介」，可稍加留意。如果啲種類改為招式名，例如：蒸點改為「神籠出蒸」，生滾粥改為「滾滾如來」（可能有啲夾硬），但就抵死得多；仲有就喺點心紙注明點心即叫即蒸，故製作需時（約10-15分鐘），據了解店方所有出品都喺自家製，絕對唔用來貨，目的就只喺為要保持質素。
![bowl]()
原盅燉湯 $38
由於兩款燉湯都實在太正，雖然晌點心紙內位列尾角，又無列為「功夫推介」，但都想首要介紹佢哋，因為確喺值得推介！
- 鮮人參燉土雞
- 瑤柱淮山雞腳燉螺頭
兩款燉湯都好得，據介紹喺以原盅蒸燉成4粒鐘，所以絕對夠火喉，再者，稍稍撈起湯渣，足見真材實料無欺場，配以古色古香嘅紫砂茶壺盛湯，既典雅，又耐熱。好睇唔好食喺無用架，但前者「鮮人參燉土雞」參味強勁，未飲都聞到，湯色清澈不俗，味道帶甘，清甜不膩；後者「瑤柱淮山雞腳燉螺頭」同樣貨真價實，瑤柱、淮山、雞腳、螺肉盡見，湯味比燉土雞更鮮甜，濃而不俗，是晚驚喜！
鮮人參燉土雞
瑤柱淮山雞腳燉螺頭
![bowl]()
各式蒸點（$18-$28）
- 功夫筍尖蝦餃皇 $9/隻（兩隻起）：叫得蝦餃皇，蝦嘅用料自然唔怠慢，以緬甸蝦做餡，蝦肉夠大夠多唔手軟，口感幾鮮爽，餃皮晶瑩夠薄身，軟韌唔黏牙。
- 蟹子香菇燒賣皇 $9/隻（兩隻起）：燒賣皇本身不俗，豬肉打得鬆化，內裡又加有蝦肉，蟹籽咬落啪啪聲，要挑剔個人覺得香菇味未夠突出啫。
- 懷舊綿香馬拉糕 $18：馬拉糕獨立個別咁做，所以呈半球體，且預先一開六，方便食用。口感確實鬆軟，原來師傅將粉糰先後發酵3日，所以有此效果，此外，味道清香唔錯！
- 翡翠帶子鳳眼餃 $28：屬最貴嘅蒸點，少少蟹籽做點綴，鳳眼外型頗悅目，餃皮軟綿煙韌，翡翠用上西芹，口感清爽，加埋蝦仁、帶子，故然鮮味好食。
![bowl]()
黃金煎炸（$18-$28）
- 酥皮香麻蘿蔔餅 $25：餅身炸得金黃有光澤，外皮香脆酥麻，滿滿芝麻香，再咬入啲帶點柔韌。好可惜蘿蔔餡略為少，且蘿蔔味亦未夠鮮明，作為「功夫推介」，感覺未如期望。
- 蒜香鮮蝦長春卷 $22：長長嘅春卷以香檳杯盛載，春卷咬落唔油又香脆，雖然內裡蝦膠唔太多，但蒜香十足喎！
- 鳳凰煎糯米雞 $25：依個煎糯米雞稱得店內創意招牌，見好多食評都有讚，所以點可以錯過。糯米雞喺晌中央工場預先做成半製成品，即叫即以慢火推煎，口感有趣，既有焦香脆口，又有糯米嘅煙韌，餡料就跟同食平常嘅糯米雞咁，不愧喺店內最受歡迎嘅點心。
![bowl]()
即拉腸粉（$24-$28）
腸粉一共有4款：碧綠帶子、韮菜原隻鮮蝦、翡翠叉燒及特級金菇牛肉腸，店方安排了後兩者。
- 翡翠叉燒腸 $24
- 特級金菇牛肉腸 $24
腸粉皮拉得都夠薄，但唔算好滑溜，但餡料落得無欺場，翠玉瓜搭叉燒稍為大路啲，反而個金菇配牛肉幾特別。
![bowl]()
生滾粥（$32）、煲仔飯（$29）、湯麵（$38）類都無叫，因為感覺太飽肚，難以試到更多點心款式。晌甜品之前，再試埋兩款其他類別。
![bowl]()
其他類別（$24-$34）
「其他」就等同雜項，難以分類所以擺埋一齊，價格幅度亦比較闊，由最平嘅紅油抄手、濃湯北京水餃賣$24，到最貴嘅上湯雲吞雞及荷葉飯賣$34。
- 鮑汁鳳爪 $32：一份約有5隻左右，以鮑汁嚟扣鳳爪，當然鮑汁味喺賣點，鳳爪非常入味，又夠晒軟腍，唔錯唔錯！
- 鮑片雞粒糙米荷葉飯 $34：荷葉飯唔會太大份，三幾個人夾份食唔怕食唔晒，飯粒帶有少少荷香，店家強調荷葉絕對唔會翻用，最得歡心喺加入埋少量紅米嚟做，更感健康；配合埋鮑片、雞粒，比起點煲仔飯有特色得多。
![bowl]()
甜品（$18-$20）
雖然喺點心專門店，唔喺糖水鋪，都有4款甜品供應，小弟實屬嗜甜之人，自不然大貪啲一次過想試晒4款啦，反正個肚已經預晒位食甜品架喇。
- 雪沙香芒卷 $20：直接啲講，就喺香芒糯米糍，雪白嘅糯米糍外皮沾滿椰絲，大大塊芒果厚肉包在其中，睇落已經好吸引。一啖過成件放入口，感覺冰涼，又一口椰香，跟住就喺芒果嘅鮮甜，泰國芒果然正呀！
- 紅映菊花卷 $18：齋睇名點都估唔到喺咩，但一上枱，啊！原來喺咁，酒樓常見嘅「菲林」芝麻卷嘅菊花版，入口先知原來喺熱食，真喺驚喜再驚喜，菊花味極之突出，感覺清幽，又無過甜，怪不得大家都佢評價甚高。
- 鮮芒果布甸 $20：外表猶如平凡嘅芒果布甸，但亮點食落你就知，內裡非常多新鮮芒果肉，香甜味美。
- 蜂蜜脆蛋散 $18：雖則蛋香味唔算好重，但脆口度無庸置疑，又唔黏牙，蘸上蜂蜜更添甜潤。
總結一下，點心整體味道不俗，部分款式有驚喜，如燉湯、煎糯米雞、甜品，當然亦有啲喺大路貨式，普普通通，但總要照顧一吓唔同人嘅需要。作為止一止食點心癮，功夫點心大可列入try list都食得過，況且佢哋分店唔少，港九新界都有。希望店方晌品質上繼續努力，不斷提升質素，使出更多真功夫！
個人評分
味道：8/10
環境：8/10
服務：8/10
抵食：8/10
平均每人消費：HK$100（試食邀請）
餐廳資料：
功夫點心 Kung Fu Dim Sum
尖沙咀廣東道33號中港城2座平台4號舖
2836 6788
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
功夫點心 Kung Fu Dim Sum： Try List功夫
功夫點心 (尖沙咀店)
南坊
富臨皇宮 (黃大仙店)
小皇府 (MOKO新世紀廣場)
名館 Ming Bistro (希慎廣場)
G-fit
海逸皇宮大酒樓
彩福皇宴（沙田石門）