8 Carpaccio Pasta Pizza Vino：意大利的街坊小館

雖然去過意大利，都已經喺近廿年前嘅事，嗰時仲好後生，對食無咩閱歷，況且半流浪一支公，無咩多餘銀兩，所以晌當地未上過意大利館子，多數都喺晌青年旅舍搞掂早、晚兩餐，晏晝嘅都喺食吓麵包，去吓快餐店就算，所以唔知意大利嘅街坊小館喺點。藉工作關係過咗尖沙咀，就約埋老婆嚟到Carpaccio食晏，領略吓街坊小館嘅風情。
唔好聽見街坊小館以為喺細細間間、地地踎踎，只喺環境簡約啲，氣氛隨和啲。Carpaccio就喺一間既簡單，又輕鬆嘅意式小館，整間餐廳雖無一致嘅色系，但佈置唔太花巧，偶爾晌牆身有啲小擺設、小裝飾，感覺隨意，令人唔拘束。
見有食友評依度為大賣意大利媽媽所煮嘅家常味道，但觀乎今日午餐嘅菜單，以及所食到嘅質素，就一啲都唔「家常」喇，哈哈，非常有水準哩！據店員介紹佢哋都會選用新鮮季節性食材，所以，食物新鮮並有一定水準，咁就要食過先知！

午餐分4個級別、4個價錢，由平到貴分別為：
Fast Choice（$88，兩道菜，餐湯或前菜、主菜：螺絲粉或薄餅）
Light Choice（$98，三道菜，餐湯、前菜、主菜：寬條麵或薄餅）
Perfect Choice（$108，三道菜，餐湯、前菜、主菜：海鮮或肉類）
Supreme Choice（$138，三道菜，餐湯、前菜、主菜：海鮮或肉類）
所有午餐包麵包籃及咖啡或茶，雖然餐牌無寫，原來餐後有份小甜品，令人有份小驚喜！
小弟同老婆，就以主菜款式為選擇心水，所以點咗一份Perfect Choice嘅焗羊腿，以及一份Supreme Choice嘅煎紅鯛。
餐前麵包
4小片餐麵配黑醋橄欖油，黑醋、橄欖油都具質素，但略嫌麵包普通欠特色。
大蒜馬鈴薯湯
餐湯喺指定款式，大蒜馬鈴薯湯確喺較少飲到，雖知薯仔喺比較粗糙之物，但單睇外表都覺得個湯打得幾滑，飲落果然不俗，頗幼滑，而且大蒜同薯仔濃香得嚟好合拍。
意大利火腿配哈密瓜
前菜同樣喺指定，而一客有兩件，哈密瓜已去咗大部份外皮，拎起手就可以大啖食。味道上，哈密瓜唔算好甜，啲火腿油脂唔算好多，油潤稍欠，但就挺鹹香，而且都鋪得幾大塊，若非感覺有啲碎濕濕，賣相應該仲討好。
焗羊腿配烤馬鈴薯及百里香汁
是日Perfect Choice嘅主菜有兩款：「燴魷魚釀雜菜」或「焗羊腿配烤馬鈴薯及百里香汁」，小弟對羊腿較有興趣。兩件羊腿肉切得幾大件，焗得色澤粉嫩，肉質又鬆軟，輕輕嘅羊羶味，配以百里香燒汁，效果又幾得喎。配菜喺烤薯角跟西蘭花，薯角以烤焗方式做，相對油炸就無咁肥膩，健康少少。
香煎紅鯛魚柳配茄子蓉及蕃茄汁
至於Supreme Choice嘅主菜有：「香煎紅鯛魚柳配茄子蓉及蕃茄汁」或「牛柳粒配洋蔥、馬鈴薯及香濃龍蒿汁」，老婆一向鍾意魚多過肉，所以都估佢會點依個煎紅鯛。比起上面個焗羊腿，個煎紅鯛賣相就靚好多、立體好多。件紅鯛魚柳唔喺好大件，約半隻手掌大細，份量上男士可能唔喺好夠，較啱女生。魚柳煎得外層脆卜卜，但魚肉就保持細嫩，除伴蕃茄汁，仲有啲黑醋同欖油，橙紅色嘅蕃茄汁又估唔到蕃茄味幾突出喎。薯蓉就食得多，茄子蓉印象中喺第一次食，墊底嘅茄子蓉感覺有少少似食嬰兒菜，口感較濕，味道還可以。
iScream咖啡雪糕
上咗餐飲之後，竟然仲有兩小球iScream咖啡雪糕，插晌日式嘅手卷架之上，蠻有趣呀！雪糕既幼滑，又重咖啡香，只喺上咗枱無耐都已有溶溶哋嘅情況出現。
餐後經理除問問我哋對菜式嘅意見外，仲推介佢哋所推出嘅「精緻全自助早午餐」，逢星期六、日及公眾假期供應，時間為11:00am-3:30pm，成人收$188，而小童則收$128。雖然佢話款式及種類未必及酒店嘅自助午餐有咁多，但全部都喺精選嘢喎，務求貴精不貴多，真喺有啲興趣想試！

個人評分
味道：9/10
環境：8/10
服務：8/10
抵食：8/10
平均每人消費：HK$135

餐廳資料：
Carpaccio Pasta Pizza Vino
尖沙咀彌敦道63號iSQUARE 國際廣場3樓307號舖
2328 5202

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================