8 喜記蟹將軍：生日飯之蝦兵蟹將

俗語有話：「蝦兵蟹將」，借用依個古代神話中嘅詞語，似乎蝦「渣」啲要做兵，蟹勁啲可以當將領。生日正日跟老婆去咗荃灣荃新天地嘅Melissa食龍蝦餐，跟預期水準有很大落差，個食評都喺勉強俾OK佢。再隔多個幾星期，輪到食第三餐生日飯，由細妹請，同枱仲有細佬同小弟老婆，一行4人嚟尖沙咁喜記蟹將軍拆蟹，依餐果然好唔錯，值得俾個讚佢。

其他推廣

細妹睇到喜記蟹將軍晌報紙賣廣告，推出咗個2013開心套餐，4位用由原價$1,078減到去$698，一共8道菜加甜品，當中包咗炒辣蟹（1隻1斤4兩），另收番茶芥、加一，再睇睇食評做參考，覺得性格比高，決定一於去馬，小弟嘅生日飯第三擊就選址於喜記。
由於小弟早到，雖然訂咗食套餐，但無無聊周圍打量一下，又翻吓餐牌，睇睇仲有咩好嘢食，又順便格吓個套餐喺咪真喺好似廣告登出嚟個價，有無誇大到。為方便其他食友，都順便打埋下面每道菜個單價俾大家有個參考。

滷水鮮鮑魚 $98 / 2隻
翻餐牌時見佢個滷水鮮鮑賣相幾靚，甚有期待，不過見賣$98 / 2隻大概估計唔會太大，況且話明喺鮮鮑，唔喺乾鮑，自我調節吓，知道唔喺食佢個鮑味。一上枱，小碟盛著4件帶殼鮮鮑，連個裝飾用嘅擺花都無，稍為單調。因為喺鮮鮑，借助滷水提味，的確滷水頗為入味，而作為一道冷盤前菜，其質感爽口中帶點煙韌，幾特吃；每件鮮鮑仔已一分為二，方便食用。
豉椒炒蜆 $75
真懷念以前去大笡地食炒蜆嘅感覺，今回晌喜記食到嘅炒蜆都幾正，蜆隻本身幾肥大肉厚，食落無乜沙，而空殼甚少，豉椒味夠濃香，微辣就啱晒我啦。
椒鹽九肚魚 $68
椒鹽屬喜記經典菜，有椒鹽鮮魷（$78）同椒鹽九肚魚（$68），可雙拼（$98），一客九肚魚都有唔少，面面又放有好多金蒜粒，蘸點喼汁又可以解解油膩。講番啲九肚魚，一啖咬落外皮好香脆，內裡就好嫩滑，如果鹹多少少、又辣多少少，就更惹味喇！
喜記正宗炒辣蟹（1隻1斤4兩）
卒之嚟到重頭戲，喜記嘅炒辣蟹，散叫價喺$20兩（1斤2至1斤9兩重）或$25（1斤10至2斤8兩重），可以揀小辣、中辣、大辣、狂辣，如果以我哋嗰隻1斤4兩計，單價都值$400喇。據講，店家採用越南肉蟹，每日新鮮空運過嚟，而越南肉蟹以肉厚味鮮取勝。講真，一大碟炒辣蟹送到枱上，香氣撲鼻，一大對蟹鉗，真喺好有睇頭，食蟹當然喺麻煩啲，不過換嚟嘅滋味都喺值得，蟹肉確實厚鮮，配以金銀蒜香，極之惹味，我哋揀咗小辣，已覺得好足夠，都真不愧為招牌菜呀！食到一手都污糟晒，就晌門口有個獨立洗手盆，幾貼心嘅安排。
蟲草花帶子蒸豆腐 $88
頗別緻嘅菜式，蟲草花都喺第一次食，無乜味道，但口感爽爽。帶子既大粒，又鮮甜，而底下嘅豆腐好滑。雖然下面浸著豉油，但調校過，唔會好鹹，我哋都幾鍾意依道菜。
山渣荔枝咕嚕肉 $72
以山渣代替白醋，出嚟個酸味無咁嗆喉；而菠蘿又好，荔枝又好，都喺罐頭貨色，幸好個咕嚕肉外層粉漿做得還算薄身，唔會太過一舊粉，兼且啲肉唔過肥，啱屋企人食。
啫啫生菜煲 $58
望落去好似得啲生菜，賣成$58好似好流，原來下面仲有啲蝦乾，令啲生菜味道更香，再者，煮嘅火喉剛好，生菜仲帶少少爽脆。
蟹油炒麵（$62）或瑤柱蛋白炒飯（$62）
個餐有麵有飯揀，當然揀前者啦，因為以蟹油嚟炒，比起瑤柱蛋白炒飯，較特別嘛。炒麵個樣好平常，底下墊有好多銀芽，上面又加咗自家炒製嘅蟹油蒜蓉，個炒麵食起嚟爽身唔油，但喺咪好有蟹香？小弟又唔喺好覺，不過，整體味道都喺唔錯！
合時甜品
最後，包個合時甜品，就喺勁薑蕃薯糖水，薑味比平常重多50%，因為食蟹始終都較為寒涼，以薑湯嚟平衡吓，都喺合宜。
雖然喺中菜館，但食客大部份都喺斯文客或遊客，環境予人感覺較清靜。服務亦唔錯，晌適當嘅時候就幫我哋換碟，又跟一跟啲上菜進度。一家人閒話家常，幾賞心樂事，好快又到食團年飯，到時又可以再見，晌度再次多謝細妹請我食咗餐好嘢！

個人評分
味道：8/10
環境：8/10
服務：8/10
抵食：8/10
平均每人消費：HK$205

餐廳資料：
喜記蟹將軍
尖沙咀彌敦道63號 iSQUARE 6樓602號
2366 7565

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================