8 新星海鮮酒家：新星鬥新星（一）

本來唔打算再寫依間長沙灣新星，因為近幾年前前後後同班好兄弟食過好多次，之前都寫過兩次佢嘅食評，講嚟講去，都喺平靚正，水準穩定，唔算再有咩特別好講。影低嘅相都掟埋一邊，但最近又嚟好兄弟大飯局，之前試過其他火鍋店，唔平又唔算好食，有兄弟話今次撐番新星，所以擇好日子就即刻打電話訂位，仲有成個星期喎，竟然話滿晒，唔喺嘛？所以焗住轉咗去旺角新星，仲有得訂，咁我都放心啲。

就喺因為試咗旺角新星（我哋全枱人都喺第一次幫襯旺角依間分店），有比較，大家異口同聲話「還是長沙灣（新星）最好」，所以就再次摷番上次長沙灣新星嘅相，食番篇食評，同時又寫埋旺角新星嘅食評。
依餐實際喺晌舊年9月26日晚去食，我哋例揀9:00pm後無時限嘅任飲任食打鞭爐，本身都已經抵食，晌非寒冬旺季，有時仲會做4送1俾會員（即喺4個人食，俾3個人錢），真喺抵上加抵，好似今晚咁，8個人埋單都喺$840，每人一舊水多少少，飽到頂心口呀！

胡椒豬肚湯底 $65、鴛鴦湯湯底 $58
9:00pm後任食火鍋成人每位收$88，另湯底、茶芥加一，揀咗胡椒豬肚湯底同鴛鴦湯湯底，初時兩個湯底各有特色，食到中段已變為一品鍋，乜味都有喇，哈哈！

鴛鴦湯湯底 $58

胡椒豬肚湯底 $65

任食火鍋好處就喺可以食住等，所以初時得我哋三幾個，就已經點定一大盆火鍋料喇，邊食邊等，有啲食材又襟煮，好似啲乜丸物丸、蘿蔔粟米……等等，其他老細一嚟又有得食。前後我哋都點咗成3大盆火鍋料，盆盆都堆滿各樣材料，有金錢肚、海蝦、鮮魷、鮮滑雞片、蟹粉流心丸、芝士流心丸、牛根丸、生根、冬菇、唐生菜、油麥菜、炸魚皮、粟米、鮮滑牛肉、肥牛、芝士腸、魚滑、鮮腐竹、鯇魚腩片、雲吞、餃子、青口、魚雲、公仔麵……等等，差唔多成張點菜紙唔使額外加錢嘅都點得八八九九。水準保持到喎，最緊要喺啲嘢食掂吖嘛，唔好食任你食幾多都無用啦。

兄弟們，滾喇！

飲品，除百事可樂、七喜……等汽水外，仲有一渣渣嘅夏枯草，同樣喺任點任飲，但原來唔喺必然，晌下一篇「新星鬥新星（二）」講旺角新星時，就再交待吓。總之晌依間長沙灣分店，就大可放心任飲任食無負擔。所以，一大班麻甩佬，飲得暢快，又食得盡慶。
招呼方面都做到勤快，送嚟嘅火鍋料都只喺少少甩漏。至於環境，比旺角新星好坐好多，一來地方大啲，枱櫈無咁逼狹，二來依度樓底高啲，感覺無咁壓迫，下回講講旺角新星，嘈到拆天咁呀！

個人評分
味道：8/10
環境：8/10
服務：8/10
抵食：9/10
平均每人消費：HK$105

餐廳資料：
新星海鮮酒家
荔枝角長沙灣道680號麗新商業中心地下59號舖
2991 4903

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================