晌荃灣城市中心依間客家好棧每逢假日都有好多人排隊，門外定必企滿人等嗌咪，皆因無茶芥，又免收加一，不過，自從舊年初取消依兩樣優惠，明顯排隊嘅人少咗好多。好似今次一完咗教會聚會即刻打頭陣先過去攞籌等位，點知5分鐘唔使就已經有枱，仲要唔喺搭枱位添。
雖然唔使點等位，但內裡茶客都保持有九乘、十乘滿，環境、服務唔多講，以前食評都講過，所以，快快手講吓食啲乜？味道又會喺點？何解標題用到「嚇家」二字。
星期日及假期嘅點心劃一定價分4層：小（$12.8）、中（$15.8）、大（$18.8）、特（$21.8），無下午茶時段（2:00-4:30pm）。不過，仍推出唔少優惠點心供選擇。
![bowl]()
特式紫薯卷 $6.8
雖然「平嘢無好嘢」唔喺絕對定律，但有時中嘅機會都幾大，今勻見佢有個優惠推介賣$6.8嘅特式紫薯卷，紫薯本身都幾鍾意食，所以好奇點咗一客。首先，賣相唔喺好得，擺得求其之餘，其中一件仲甩皮甩骨，外皮「腍糍糍」，質感好泡，紫薯味比較單薄，認真唔掂檔！
![bowl]()
潮州蒸粉粿 $12.8
蒸粉果則做得唔錯，其實皮有啲厚，但唔算好黏牙，而且，餡料頗為平均，唔會一味擠滿沙葛。
![bowl]()
香滑奶黃包 $15.8
奶黃包亦都不俗，包身鬆軟，奶黃餡幾香幾滑，重點喺上枱時夠熱辣辣。
![bowl]()
梅菜叉燒腸 $15.8
梅菜配叉燒真喺少有，估唔到都夾得到，梅菜帶少少鹹味，但叉燒稍為肥咗啲，腸粉皮又比較厚，所以，整體只喺中規中矩。
![bowl]()
椒鹽魷魚鬚 $25
香口嘢永遠都較受歡迎，所以碟魷魚鬚好快清晒，尤其舅仔，食咗唔少。一碟椒鹽魷魚鬚嘅份量都幾足，魷魚鬚幾酥脆，沾點喼汁感覺無咁熱氣外，亦令椒鹽味更突出。
![bowl]()
客家鹹茶粿 $12.8
老婆嚟客家好棧嘅例叫點心，外皮依舊做得煙煙韌韌，內餡鹹香好食，有水準！有水準！
![bowl]()
客家三式茶粿 $12.8
三式茶粿晌對上一個食評已寫個，邊三式唔累贅再講，幾款都啱食，尤以玫瑰豆沙茶粿較喜歡，因為豆沙清香不過甜。
![bowl]()
豉汁蒸鳳爪 $15.8
姨仔心水，點都要叫番碟。豉汁好濃、好惹味，鳳爪夠晒入味，晌小弟心中，豉汁蒸鳳爪永遠喺點心嘅經典之一。
![bowl]()
鯪魚球灼西生菜 $14.8
一客啱啱好有4粒鯪魚球，咁我哋唔使讓嚟讓去。鯪魚球幾濃鯪魚味，出奇地打得挺彈牙，又有蔥香。配灼西生菜，食番多啲纖維素，又唔使另外叫一碟灼菜添。
茶芥$6位，連埋加一，最後埋單都喺$172，除番4個人，每人都喺$43，食得大家好飽，又可以慢慢坐住嘆茶，抵食啦！如果唔喺籠紫薯卷咁麻麻，整餐飯可算喺中上。
個人評分
味道：6/10
環境：7/10
服務：7/10
抵食：8/10
平均每人消費：HK$43
餐廳資料：
客家好棧 Hak Ka Hut
荃灣眾安街68號城市中心一期3樓3B舖
8300 8105
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
