8 悅來酒店咖啡室 Panda Café：為食熊貓

有食開自助餐嘅人都知今時今日食一個自助晚餐咩價，唔好講話咩特別節日或星期五六日，就算平日食番個似樣啲嘅，三幾百都只喺基本入場費，食好少少嘅閒閒哋都要四百過外。如果我話今晚所食嘅自助晚餐只喺$150，估計都唔多人信，但事實如此喎。可以平到咁只因太太教會一年一度為有份事奉嘅人搞個大聚餐，地點喺荃灣「熊貓」酒店，出席我想大人細路加加埋埋都近成百人，所以你話幾咁墟撼呀！

餐廳正正做緊「國際滋味自助晚餐」，即刻無主題，乜都有，6:00-9:30pm，比一般自助餐早半個鐘，成人正價每位收$328，指定信用卡有85折，加番一拉勻三百鬆少少。其實個環境都唔錯，樓底夠高，闊落開揚，大枱細枱都安排到，人多人少都唔怕，而且皮櫈高椅背，坐落頗舒服。如果想私隱度高啲，近門口有幾張馬蹄形梳化可供考慮。
大人食自助餐通常都想食多啲試多啲，由頭帶到尾，而細路仔唔會咁好耐性陪你坐幾粒鐘，所以食餓就周身郁。依度有為家長著想，晌餐廳最入面有個小小兒童樂園，地下牆身鋪晒膠墊，相對幾安全，又有啲簡單兒童玩樂遊戲，足夠消磨晒小朋友啲多餘精力，唔怕佢煩住晒！
餐廳環境俾人個感覺唔錯，服務亦算妥貼，收碗收碟頗快手。食物選擇方面，比心目中預期多喎，而質素亦幾好添。一如大部份自助餐咁，都分咗唔同區域提供唔同款式食物，又有開放式廚房即做新鮮美食，以下等小弟嘗試解構吓依度個自助餐啦。
刺身、壽司、和式小食
餐廳最左邊第一個食物區喺供應日式食物，都有幾多人排隊，刺身有吞拿魚、三文魚、鯛魚，加埋啲壽司卷及幾款壽司，質素個人覺得唔錯，啲魚生幾鮮甜。反而想推介喺兩款和式小食：「溫泉蛋配木魚湯啫喱」同「迷你刺身飯」，前者蛋黃流心又香濃，木魚湯做成啫喱粒，篤穿隻溫泉蛋撈埋食，幾有趣；而後者份量細細，兩三啖就食完，可過一過魚生飯癮又唔會太飽肚。
冷盤、沙律吧
再過隔離個食物區，就喺一列冷盤同沙律吧，冷盤如凍肉腸、燻魚、煙火腿……選擇5、6款，而沙律較有睇頭。預製沙律依晚就見有6款，小弟覺得好食又比較特色有麻醬茄子、三文魚四季豆沙律及黃金菠蘿沙葛沙律，尤其個沙葛沙律，醬汁加咗青檸同辣椒，頗有東南亞風味。其他如鮮果沙律、泰式粉絲沙律、俄羅斯薯仔沙律，無乜沙律癮就大可以唔使試。至於沙律吧，兩款沙律菜做膽：羅馬生菜同法式生菜，再加埋大大細細兜約10款配料及6款醬汁，已經好夠做到好多配搭。小弟都幾鍾意食沙律架，所以前後食咗兩份，頭一份加配生蠔，夠豪呀！第二份就配自家所折嘅蟹肉、蟹鉗，鮮味到極！

麻醬茄子

三文魚四季豆沙律

黃金菠蘿沙葛沙律

沙律菜加生蠔，夠豪呀！

自家所折嘅蟹肉、蟹鉗加鮮果沙律及新鮮生果！

精選海鮮
是晚供應嘅海鮮包括：美國生蠔、雪花長腳蟹、加拿大青口、凍蝦。雖然今晚睇落都有8成滿，幾多客排隊拎海鮮食，但都無乜點缺貨，尤其較受歡迎嘅生蠔同長腳蟹，不斷新貨補充，服務做得幾好。4款海鮮我都只喺有食生蠔同長腳蟹，同樣配沙律食，生蠔算大隻，幾厚肉，亦頗為鮮味；而大大條嘅長腳蟹，折肉當然要啲耐心，折好撈埋啲鮮果沙律一齊食，海水嘅鹹鮮感覺好鮮活。
餐湯
食物區正中央喺一張島形長枱，放有多款餐湯、熱盤。餐湯一中一西，只註明中式老火湯、是日西餐湯，喺咩湯要飲過先知。跟老婆各要一碗，試飲過再交換，老火湯喺青紅蘿蔔煲豬展，而西餐喺野菌忌廉湯，兩者算叫交到功課，足料夠味。不過真正「好湯」在後頭，晌餐廳最入嘅開放式廚房，原來有燉湯，同樣只註明中式燉湯，無講喺咩燉湯，但因為又喺好足料，一撈就知喺咩，木瓜雪耳燉豬踭，口感好清潤。唔知一晚會供應幾多盅，又幾搶手吓，所以鍾意飲湯嘅人最好先攞番一盅埋位慢慢嘆。

野菌忌廉湯

青紅蘿蔔煲豬展

中式燉湯，木瓜雪耳燉豬踭。

熱盤
類型比較多國度，有中式小炒、又有西式、日式、印度咖喱、亞洲特色嘢……，印象中大概十來款，老實講有咁多款，試就無試晒，都喺揀幾款心水，可能未必喺最好食，只喺自己想試。揀來有日式角煮豬肉（幾似啲東坡肉）、香煎龍脷柳配檸檬牛油汁（想食多少少白肉，檸檬牛油汁既香又醒胃）、印度咖喱雞（咖喱嘢一向都鍾意食，入面開放式廚房仲有印度師傅即烤印度薄餅）、原條清蒸海上鮮（依晚清蒸海斑，幾鮮甜）、韓式彩椒泡菜炒牛柳片（好似幾有地方特色，所以都要少少嚟試）。

日式角煮豬肉

香煎龍脷柳配檸檬牛油汁

印度咖喱雞

韓式彩椒泡菜炒牛柳片

開放式廚房
彎形嘅開放式廚房位處餐廳篤尾最入嘅地方，有幾組嘢食提供：鐵板燒日式炒麵燒餅（因為一客太大份，所以無試）、燒肉眼、燒豬柳、蒙古考羊鞍（每樣都要啲，肉眼幾軟腍多肉汁，羊鞍都唔錯）、日式天婦羅（師傅不停咁炸，客人亦可指定要乜，但不外乎茄子、南瓜、洋蔥圈，炸嘢就較鍾意南瓜同洋蔥圈，前者特別粉甜，後者又爽又脆）、燉湯（上面都有介紹過）、湯麵檔（因為之前已食咗唔少嘢，都要留留肚俾甜品嘅，所以麵食就無要，對佢哋嘅湯麵味道就不作評論。但喺又睇出佢哋嘅誠意，因為出面好多都只喺淥吓車仔粉麵，但依度提供嘅喺九州拉麵，據講每晚會有唔同嘅各國特式湯麵，如：新加坡喇沙、檳城蝦湯麵、越南牛肉湯河、韓式牛肉麵…等等）。

鐵板燒日式炒麵燒餅

日式天婦羅

各國特式湯麵檔

即做印度薄餅

 小朋友美食
未講甜品前，順帶講講晌餐廳右邊有一張長枱，比其他食物區嘅枱矮啲，原來喺小朋友美食區，所謂美食，其實喺啲炸雞塊、炸薯條、奶油粟米、火腿雜菜通心粉…，依家啲細路咁嘴刁，真喺唔敢講啲小朋友喺咪鍾意食。不過，驟眼所見，就唔多見有細路走過嚟依區搵食，而「小朋友美食」只會晌周末先出現。
甜品
分咗兩個區域，一個晌餐廳正中央位置嘅大圓枱，除咗有個熊貓立體蛋糕做裝飾之餘，當中就擺咗十數款甜品，期間亦見佢有以其他款式替換。前前後後拎咗幾輪，都試咗唔少款式，個人心水有：迷你焦糖布甸（焦糖唔喺以火槍燒沙糖嗰隻，而喺正接加焦糖漿，無咗焦糖脆口感，當然會差少少）、法式蘋果批（好香蘋果味）、竹碳雜果瑞士卷（雖然忌廉比較多，但好柔滑，竹碳做嘅海綿蛋糕又幾好食喎）、紅莓朱古力軟心餅（紅莓蓉搭朱古力慕絲，既酸且甜，當然好食）、榛子忌廉泡夫（蘸勻朱古力漿，咁就更加正喇）、日式檸檬芝士餅（想口感輕盈啲，芝士味唔想太重，依個日式檸檬芝士餅就喺最合宜之選，食得多藍莓芝士餅、美式芝士餅，都想換換口味嘛）。另一個區域，晌左邊近住開放式廚房，除咗朱古力嘖泉，最主打喺個乳酪雪糕，乳酪一向都俾人感覺健康啲，而乳酪雪糕只有原味，但就有成16款配料及4款醬汁，我就唔想太雜，食咗兩杯，都喺加少少餅乾碎同兩款醬汁嚟過過口癮。
飲品
真喺要講一講，最入面有自助啡茶，有兩部自助咖啡機，沖鮮奶咖啡又有，沖意大利泡沫咖啡都得。最搞鬼喺晌精選海鮮隔離，有兩個大雪櫃，放滿晒一枝枝細支裝可口可樂、 Zero、雪碧、芬達同玉泉忌廉。食自助餐我都好少飲汽水，既然喺咁，小弟都飲咗幾枝，尤其忌廉，最近差啲想溝啲鮮奶嚟飲，喺唔知個肚受唔受得先唔敢試咋！不過，樽裝汽水只限星期五、六、日及公眾假期先有得供應啫。
準時抵達現場，食到人哋開始收嘢，足足坐咗三個半鐘，慢慢食慢慢嘆，好滿足。

個人評分
味道：8/10
環境：8/10
服務：8/10
抵食：8/10
平均每人消費：HK$150（喺教會活動先有咁抵）

餐廳資料：
悅來酒店咖啡室 Panda Café
荃灣荃華街3號悅來酒店3樓
2409 3218

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================