探險家攻略 > 購物 > 飲品美食 > Pret A Manger 百特文治：新鮮．天然．限定英倫最好

8 Pret A Manger 百特文治：新鮮．天然．限定英倫最好

由山區麵包王於 2014-04-11 00:00:00 發表 | 累積瀏覽 8250

分類：飲品美食；地區：中環

是次消費：每人平均約HK$ 25.00

上班日，一向都有晌屋企食完早餐先返工嘅習慣，無他嘅，實為慳家一族，況且，老婆鍾意食屋企嘢多過出街食。今早就有少少例外，因為收到店方公關一份「香芒雞肉三文治配檸檬薑味礦泉水」的換領券，就讓小弟改改晌公司食番一次高檔啲嘅早餐。嚟自英國嘅百特文治（Pret A Manger）晌中環都幾多分店，最就腳就喺置地廣場店，而且，貪佢一朝早人流較少，方便慢慢睇、慢慢揀，講明送指定三文治及礦泉水，仲要慢慢揀？睇埋下文你就知。

以往都有幫襯過百特文治，其實，依家連店方都好似唔多再用依個中文，都唔知仲有無人知佢其實有個中文名。唔好以為佢淨得三文治賣，查實產品都幾多元化：三文治、法式長麵包、薄餅卷、沙律、乳酪、熱湯、烤焗法式酥點、甜品、天然乾果包、小食、蛋糕、曲奇……等等，當然果汁、特色飲品亦唔少得。並且，大部份產品都以用料新鮮，食材天然為賣點，更以「日日新鮮．日日清」為口號，期望讓每位客人所品嚐到嘅都喺健康而美味嘅出品。

講開佢啲三文治，不時研製新產品，款式上確喺幾有特色，如雞肉牛油果、小龍蝦辣菠菜、健康鷹嘴豆醬、脆味煙生番……等等，而最新搞作就喺全新呈獻嘅「Best Sellers from around the world」，即喺晌世界各地嘅百特文治店搜羅最受歡迎嘅產品，打頭陣自不然喺佢老家英國嘅香芒雞肉三文治（Coronation Chicken）作為春季限定啦。

香芒雞肉三文治（Coronation Chicken）$25

百特文治嘅三文治有啲只供應單份，有啲則供應雙份份量，而香芒雞肉三文治屬前者，因為餡料甚多，作為早餐已經卓卓有餘。但男生要想當午餐，應該要兩個單份先夠飽，同個店員講，想飽啲要打孖，當然要收你雙份錢啦，哈哈！

其實，香芒雞肉依組配搭都唔喺咩新鮮嘢，不過，晌餡料上若花啲心思，一樣可以做得好出色。首先，麵包採用多穀麥方包，口感已經有所分別，鬆軟嘅全麥包中，穀麥、粿粒令麵包更有咬口；而餡心配菜有沙律菜、新鮮蕃茄及最意想不到嘅香脆杏仁片，令口感更富層次，選材更見心思；而主材料芒果及雞肉，亦都做得唔馬虎，尤其個醬汁，幼滑得嚟，又帶點咖喱粉、薑黃粉嘅香味，又有芒果蓉嘅清甜，偶爾仲咬到啲提子乾，配以軟熟嘅雞肉，味道複雜多變，真喺令人回味。

檸檬薑味礦泉水（Lemon & Ginger Pure Pret Still） $24

天寒地凍之時，久唔久就自家煲製檸樂煲薑，所以，個人而言，對檸檬加薑依個組合，絕對唔抗拒。入口先嚟喺檸檬嘅微酸，而且有種涼涼爽爽嘅感覺，跟住就會有一陣陣薑味隨之滲出，唔嗆喉，感覺不俗，幾有趣嘅產品。

當然，無化學添加、無防腐劑，亦喺佢優點之一。

自己試咗啲新嘢，就順便買多一件芝士餅及一杯乳酪，返屋企同老婆作飯後甜品吖嘛，正所謂獨食難肥。故此，咪要慢慢睇、慢慢揀囉！

藍莓芝士蛋糕（Blueberry Cheesecake） $27

手製盒裝蛋糕有好幾款，例以甘筍合桃蛋糕、法式朱古力咖啡蛋糕、橘子罌粟籽牛油蛋糕……等等，結果揀上藍莓芝士，純粹喺老婆嘅偏好。消化餅底都幾夠薄身，而中間嘅芝士蛋糕，既軟滑，又香濃，加上面層有大量藍莓果醬及果肉，鮮味入心。

蘋果曲奇甜心乳酪（Apple Crumble Yoghurt Dessert Pot） $22

由於成份牌標明有蘋果金寶、焦糖，所以就一心揀佢，因為兩樣素材都喺小弟心水。下層喺焦糖乳酪，所以，取名「甜心」乳酪，酸滑嘅乳酪混有香甜嘅焦糖，既酸香醒神，又濃甜焦香。再配合埋蘋果金寶碎、燕麥、提子乾、曲奇餅碎，真喺軟硬鬆脆兼備，就算唔當為飯後甜品，買番去公司，下午茶時段作個小休，嘆番杯就足以悶氣全消。

試過百特文治幾款產品，無論喺三文治定飲品，抑或蛋糕、乳酪，都感受到佢哋配搭有心思，用料不賴有質素，值得繼續支持。

個人評分
味道：8/10
環境：7/10
服務：8/10
抵食：8/10
平均每人消費：HK$25（試食 + 自費）

餐廳資料：

Pret A Manger 百特文治
中環皇后大道中15號置地廣場3樓321號舖
2840 0129

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！