探險家攻略 > 美食之旅 > 餐廳 > 馬來一菜館 Café Malacca：馬不停蹄再來一次

8 馬來一菜館 Café Malacca：馬不停蹄再來一次

由山區麵包王於 2013-03-20 00:00:00 發表 | 累積瀏覽 1021

分類：餐廳；地區：西環

是次消費：每人平均約HK$ 150.00

年初獲邀嚟咗一次「馬來一」試菜，跟老婆回味咗好多星馬美食，又想返起08年去馬來西亞嘅片段，真喺一次好愉快嘅晚餐。再嚟馬來一，都喺重尋地道滋味。

因為都唔喺第一次嚟，所以開場白、室內環境、服務……等等就唔多提喇，反正跟上次嚟都無乜差別，侍應依然殷勤招呼，禮貌周周。故此，事不遲宜，立即去片分享美食！

囉惹醬蔬果沙律 $53
最有風味及地道特色嘅馬來西亞沙律「囉吔」，點可以唔再嗌等朋友試試先！菠蘿、番石榴、青瓜、楊桃、蓮霧、土魷跟檳城蝦醬及馬六甲棕櫚糖撈勻，油炸鬼後下，味道相當有趣，鹹鹹酸酸挺醒胃，當中又滲出絲絲蜜甜，跟上次一樣，依然驚喜。

沙爹雞肉 / 牛肉串燒 $72（6串）

沙爹又喺馬來西亞另一特色小食，叫足一打都不為過。雞肉及牛肉本身都稍稍以傳統馬來醬料醃過，燒香後蘸自家秘製沙爹真喺一流，沙爹醬濃郁香甜，帶重重花生香，加上串燒又有啲焦燶位，寧捨有炭香。伴碟嘅都喺傳統做法，有飯糕、青瓜、洋蔥，後兩者我OK，前者飯糕就麻麻哋有興趣喇！

馬來咖喱雞飯 $80

本來點咗個馬來咖喱雞飯，但店方搞搞新意思，問我哋想唔想試油酥餅，咁仲好喎，比食飯更有特色啦！油酥餅酥軟柔香，雖然感覺會喺肥膩咗少少，不過點埋咖喱汁同食，感覺就變得不一樣咯。馬來咖喱本身重椰香，帶中辣，香辣可令油酥餅食落無咁油。咖喱中嘅雞件用上鮮雞，所以鮮嫩有雞味。

檳城福建蝦麵 $88

上次試咗個公關推介嘅檳城亞參喇沙，確實喺好介紹，不過心多都想試新嘢嘅，另一推介喺個檳城福建蝦麵，一於要試試。香辣嘅湯麵配以豆芽、通菜，仲有鮮蝦、豬肉及酥炸香蔥，睇嚟非常豐富。湯底鮮甜清新，滲出陣陣香辣，而蝦味突出，最有趣喺用上油麵拼米粉，又喺地道特色！

海南雞飯 $108

賣相、擺位甚精緻，一客海南雞飯，除咗有海南雞，仲有雞油香飯，唔少得嘅黃紅黑三色醬（薑蓉、特製辣椒醬、黑醬油），以及一碗清雞湯，所以，賣$108絕對交足功課。海南雞肉滑脂肪少，雞油香飯大大碗幾個人分就最好喇，兼且油香滿溢，飯粒分明，而薑蓉同黑醬油撈飯仲特別正，雞湯又鮮濃，扒啖飯，呷啖湯，食件雞，何其暢快！

甜品方面，上次食過嘅榴槤布甸（$38），榴槤味濃郁，又富奶香，挺身而軟滑，真喺過足榴槤癮，所以已內定為「翻兜」之選，另外加多兩款晌度未試過嘅甜品，又比較吓會喺點。

椰汁黑糯米 $28

溫熱嘅黑糯米，煙煙韌韌，配以新鮮椰漿，椰子味突出，雖然無話跟出面食到嘅好到飛起，但絕對喺一碗水準不俗嘅椰汁黑糯米！

西米布甸 $28

賣相頗特別嘅西米布甸，將西米布甸做成球形倒晌玻璃碗內，淋上棕櫚糖以及椰漿，令淡口嘅西米立時變得甜甜蜜蜜，椰香四溢，加上西米帶點彈彈口感，小弟又幾鍾意佢喎。

今次篇食評用得最多就喺「特色」兩個字，馬來一做嘅星馬菜，又真喺確有特色嘅！

個人評分
味道：9/10
環境：8/10
服務：8/10
抵食：8/10
平均每人消費：HK$150

餐廳資料：
馬來一菜館 Café Malacca
西環皇后大道西508號香港盛貿飯店2樓
2213 6613

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！