第二站, 亦即係主菜, 就係sampo破冰船喇!! 其實我驚左好耐架, 因為我好驚水, 今日仲會落冰水, 真係好擔心, 件衫會唔會唔夠浮? 會唔會穿洞搞到我沉架? 但俾左咁多錢冇理由唔落水嘛!!
上船點名時, 我問佢有冇其他香港人, 佢望左陣話得中國人, 我地好失望, 咁多日行程都冇乜見過香港人, 如果船上有, 可以幫大家影相嘛! 上到船見到中國人係有一pair同另一個單身男, 聽到個pair人係講國語的, 咁我地就冇理啦!
我地係度參觀晒成隻船, 會有不同語言既分組, 我地係跟英文團, tour guide帶我地周圍參觀同講解船既結構, 點樣破冰等等, 真係成架船每一層都去晒架, 參觀完就lunch了, 訂位時已經要揀埋飲乜湯, 有三文魚同鹿湯, 鹿好腥呀, 我真係唔得, 同埋覺得太殘忍, 真係試一啖就夠了!!
lunch後我地周圍行, 見到有人已經開始落水了, 其中包括單身既中國男, 我用英文問佢好冇玩, 點知佢用廣東話回我話: 好好玩呀! 哈, 原來佢係香港人黎架, 佢話聽到我地講廣東話, 但費事無端端聊我地講野, 佢係自己一個人黎玩架, 好勁!! 之後我地就搵左佢幫我地影相, 好開心呀, 可以同老公一齊落水喇!!
件龍蝦衣其實比想像中舒服, 除左頭部位置, 佢話我個頭太細喎, 所以唔太o岩, 唯有將就一下! 工作人員推我地落水, 一落水就會浮, 但本身唔識游水既我, 連控制轉左轉右都有問題, 又唔夠力, 同埋好驚添, 影左幾張相, 其實都幾無聊, 只係係度浮下浮下, 由於太驚, 所以我好快叫人拉返我上岸, 老公就玩多陣先上返黎!
之後又係不停影相, 同個香港人傾計, 大約四點就各散東西了!
六點返到酒店拎行李, 再搭尾班既8號巴士去聖誕老人村, 今晚我地係度住呀, 好期待!
8號巴士原來都搭好耐, 行左去好多住宅地方, 天光去到天黑, 終於去到聖誕老人村, checkin後就出返去買postcard同手信, 呢度收十點架, 真係好彩, 同埋住客買野有折, 呢度d野都幾平, 老公買左頂husky既冷帽, 平過出面好多呢!
![]()
|
|
我地間屋~
|
買完野返屋仔煮野食同寫postcard, 呢度有獨立sauna, 老公好鍾意, 但我不好sauna, 所以好努力寫postcard, 成17張咁多呀, 寫到手軟!!
![]()
|
|
見唔見到我好努力寫卡?
|
夜晚冇野做, 我地出左去夜遊, 原來夜晚都有燈開住同音樂播住, 仲要冇人既添, 得我地兩個係度周圍玩, 好好笑, 不過呢度好凍呀, 零下十幾度, 玩左一個鐘左右就返去了!
