明洞Express (平民韓國Feel)

人均消費：HKD$57

成日聽阿豬媽講韓國點好點好，又睇埋睇埋好多韓劇，入面d野食好吸引，點都想去食下。走過去尖沙咀金巴利道，成條街都係食韓國野。本住$70都可以食得好既心態，眼見呢間野都有唔少人排隊，咁就會一會佢。



明洞Express入面裝修都只係一般又唔係好大間，好似快餐店咁搭檯，選擇都係豬牛雞炒粉絲。揀左野食，自己去買飛，個阿豬媽叫你自己倒水，拎餐具。原本都有少少失望，點知奇蹟就出現。d餐具全部都係韓式鐵匙鐵筷子，碗都係韓國碗。仲有拌飯醬任你落。呢樣先Amazing拌飯醬任你落已經夠吸引。

今次推介食物 ─ 辣泡菜豬扒飯

呢間野係要自己去落單買飛，個阿豬媽就俾個提示器你，個提示器識響識震，唔洗講都知響+震時就即係有得食。客人自行領取食物。一個飯餐入面包一份泡菜+青瓜；一碗湯；一個辣泡菜豬扒飯。

先講泡菜+青瓜，青瓜水太多，味道麻麻，而泡菜味覺正頭同韓國食既無太大分別，已經加晒分；一碗湯，重胡椒味但又未致於胡椒豬肚湯咁；泡菜豬扒飯正常野，辣度就有驚喜。平時食南記都食大辣。今次辣泡菜豬扒飯個辣度真係夠，再者可以任落拌飯醬，我真係好懷念去首爾食既韓國餐。份量很多，我係一個正常男人都覺得可以俾1.5人食。正。

忌廉一支 ($10)；水(Free)

好：餐具碗筷勁有韓國Feel、拌飯醬任你落、又無最低消費、份量大
壞：裝修一般

光顧日期：10 March, 2013

地址 : 尖沙咀金巴利道64-66A順輝大廈3號地舖
Openrice : http://www.openrice.com/restaurant/sr2.htm?shopid=49493

============================================

感謝 易風 提供以上資料

易風的網誌: http://yikfung.blogspot.hk/

============================================