豬豬益力多果汁粒

1 MAY 2014(THU)

嘅傑作係....豬豬益力多果汁粒~

其實我都真係好少俾糖小小豬食，因為唔想小小豬食得太多糖份食物，食太多對身體或者係牙仔都唔好嘛。不過完全唔俾佢食又唔可以，好似好冇人道咁，所以平日當小小豬乖嘅時候，我都會以獎勵形式俾啲棉花糖或者係司各脫軟糖小小豬食呀！

上星期見到好多朋友仔都整左啲自家制嘅果汁糖，我見都好似幾簡單，加上自家制都應該係健康啲，所以就買齊材料同小小豬嚟個親子廚房啦~

魚膠粉30g~

將益力多1.5支慢慢加入攪混~

加入少半包糖(其實糖分量可以因應個人口味加減，不過我俾小小豬食就唔落太多，只落少少調吓味)~

依個時候就到小小豬出場，佢話要幫手攪均哦。不過又真係幾幫到手，係好專心咁慢慢攪呀~

之後步驟就需要放入微波爐叮一分鐘，不過因為我冇微波爐關係，所以我就用明火隔水蒸一分鐘啦~

最後加埋一茶匙粟膠同一茶匙檸檬汁，不過因為我買唔到檸檬汁，所以今次係冇加落去呀~

慢慢攪到變糊狀，就可以倒入模啦~

放入雪櫃雪大約三十分鐘就得啦~

點算攪完啲材料之後會唔見左小小豬繼續幫手呢？唉...咪因為又係為食所致，佢見到我枱面上仲有半支益力多，所以就用盡佢辨法等我請佢飲(當然係不停讚自己乖...冇唔舒服...好開心呀...依啲逗人字具啦)。見佢咁有誠意，就俾佢飲啦~

大家都唔知道，依個為食豬係等啲糖糖雪凍嘅時候，佢係幾咁心急，成日係廚房行嚟行去，又話夠鐘啦...夠鐘啦，嗰半個鐘睇小小豬個為食樣都真係好好笑呀！

等得好辛苦嘅半個鐘已經到啦，小小豬一見我係雪櫃拎啲豬豬出嚟，即刻嚟幫手甩模呀~

仲同啲豬豬排隊添~

哈哈哈...啲豬豬糖真係好得意呀~

見小小豬食得咁開心就知道係好好味啦~

我地都當然有一齊食啦，可能我真係落料左糖關係，所以又真係淡左啲啲，不過俾小小豬食依個甜度我覺得OK啦！

除左用益力多之外，都可以用其他果汁嚟整，等我下次用提子汁或者蘋果汁再整俾小小豬食先得！

其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
※※ theZtyle ※※
※※ SeeWide ※※

 

 

MY FACEBOOK~


MY WEIBO~

 

MY E-MAIL~