11 MAY 2014(SUN)
原本打算三口子係母親節入迪迪尼玩返一轉，當同我慶祝，不過天公不造美，依排天氣都真係好差，所以都唔致博。
正當我以為平平淡淡咁渡過母親節嘅時候，大肥豬就提議同我地遊車河入西貢行吓，就係咁...我地又過左一個好愉快嘅母親節啦~
其實今日天氣都真係唔算好，慶幸中午都有一段時間冇落雨，所以我地可以開開心心遊西貢啦！
入嚟西貢都係為左食，我地行左幾轉之後，最後搵左間街頭小食店食啲小食啦！仲記得上次係新年期間同小豬媽入嚟時，依間小店都大排長龍。可能今日天氣唔多好，所以人唔算多，我地等左一陣就有位啦~
我地嘅三點三時間就食依個薯條魷魚套餐啦~
味道都唔錯呀~
食飽飽休息過後，小小豬見到附近有個小公園，所以我地又去玩一陣啦~
今日係母親節，我又同小小豬著左親子裝，當然要影幾張SWEET SWEET相，好在小小豬都幾合作，就當係送俾我嘅母親節禮物啦~
之後我地就去碼頭附近行吓，之前都見碼頭有好多小艇係賣啲海鮮，不過今日再嚟就見到多左好多依啲小艇，我地一邊行一邊八卦吓有咩買~
最後，我都抵擋唔住，因為啲海鮮實在太抵，我都買左兩樣都係$170，仲要好大隻好新鮮，真係勁抵呀~
就係因為買左啲平靚正海鮮，所以我地就返屋企煮海鮮餐慶祝母親節啦~
先嚟簡單嘅炒菜芯~
再嚟白灼超級勁彈牙鮮甜嘅海中蝦~
最後蒜蓉粉絲蒸大大大大粒元貝，啲元貝肉真係有成五蚊銀咁大粒呀(請按此)~
今個母親節雖然係簡單啲，不過我地三口子開開心心咁過，所以我都已經好滿足。再加上又買左平靚正海鮮食，直頭係興奮添啦！
其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
※※ theZtyle ※※
※※ SeeWide ※※
