遲來的母親節禮物

14 MAY 2014(WED)

雖然母親節都過左，估唔到今日先收到依一份遲來的母親節禮物，係咪好靚呢~

其實依一份係小小豬學校為左母親節做嘅手工嚟，係一條靚靚手鏈，等啲小朋友送俾MaMi嘅母親節禮物嚟呀！

因為上星期小小豬都係KEEP住高燒吓又唔燒，斷斷續續咁唔舒服，所以都冇返學差唔多成個星期，就係因為咁唔可以係母親節嗰日送俾我。

不過，今日係我完全冇預期之下，放學去接小小豬時，個傻豬一出課室門口，就好肉緊咁叫我伸手出嚟，原來係要即刻幫我戴條手鏈，仲話好靚唔準我除，嗰一刻我簡直係冧到暈左呀！

其實我開心原因之一當然係收到小小豬親手為我做嘅小禮物(雖然我都估係老師做嘅多)，不過最令我開心嘅就係小小豬個行徑，因為依個豬仔平日都好少會做啲窩心事，見佢係門口出嚟嗰個肉緊樣，再加上識主動幫我帶手鏈上手，就係因為依啲小動作，又點令我唔即時暈到呢！

依一個舉動真係令我覺得小小豬大個仔左好多，唔知係唔係發一發燒會令佢大個呢....哈哈哈！

其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
※※ theZtyle ※※
※※ SeeWide ※※

 

 

MY FACEBOOK~


MY WEIBO~

 

MY E-MAIL~