攻略日期:2014-05-25
是次消費:每人平均約HK$ 120.00
近排天氣好轉,諗住週日同R小姐郊遊,但早幾日前瞓覺發咗個夢,夢見自己與朋友釣魚釣到條大鱲魚,於是我就改了行程,同R小姐去了西貢深灣其中一個魚排度釣魚,試試會否夢境成真。其實當日的水流並不是很好,而且去到時流水亦不是很生,以我釣了咁多年魚都預咗期望不大,只是太耐沒有真真正正地釣一次魚,所以今次乜都唔理就去釣咗先算,叫做滿足吓自己的慾望吧!由於R小姐是夜瞓之人,很難想像她會是早起床的人,所以約她時間都不會大早,去到魚排時已是中午十二時了,排上一早已坐滿釣魚人,我地唯有找個閣落放下行理開檔吧,初時連櫈都俾人坐晒,後來我見人地空咗張櫈出來,便好聲好氣問他可否讓給我們,好彩都成功。Set好兩支魚竿後,拋出魚絲,便架好魚竿等中魚了,那時天氣都幾熱,也有三十幾度吧,不過好彩有海風吹送,感覺都十分良好,時間一分一秒咁過去,魚竿一點動靜也沒有,同排的釣魚人由於他們是打誘餌,所以都中到幾條大泥鯭,而且又中了幾條有份量的大尾魷,而我地純是齋釣沒有打誘餌,只有看着人家中魚吧!時間過得很快,話咁快就釣咗六個鐘了,仍然是一條魚都沒中,唯有收竿走人,返西貢市中心食餐安樂茶飲補賞一吓吧!
釣釣吓魚見到海面有個水母仔幾靚,立即拍抵佢先
晚上到西貢市中心食飯,我點了個蠔仔泡飯,表面上平平無奇,其實好食到不得了,啲湯又鮮味到冇得彈,而蠔仔隻隻都漲扑扑,我要給它九十分啊!可惜講到咁好食,我竟然沒有留意間餐廳叫乜野名,未能介紹給Blog友去試試,真係我嘅錯!
(後加資料:上網找找才知道我食那間餐廳叫"全記",西貢海旁廣場2號金寶閣地下9號鋪)
在鑽石山地鐵站地面的巴士總站乘96R(只限週日開出)到黄石碼頭,再坐快艇到深灣魚排。