2

日本關西。大阪﹑京都6天遊

平凡人 於 2014-09-15 02:50:00 發表  |  累積瀏覽 1986

分類:其他 長線旅遊 餐廳 特色景點 廟宇 古蹟 其他 攝影 ;地區:大阪,京都

攻略日期:2013-12-08

是次消費:每人平均約HK$ 3000.00

< 大阪﹑京都6天遊 >


上年十二月頭既一個早上,突然見到大阪機票特價,而且價錢更加係意想不到,所以就好快決定要去呢個大阪旅程^^由買機票到出發只有兩日時間,事前我對大阪完全唔認識,有咩玩去邊玩更加唔知,只係知道日本呢個咁先進既地方唔洗擔心,去到就冇問題,有時間不如擔心一下冇錢洗仲好啦,即日趕係銀行關門前成功去到換好日圓,咁就冇野好擔心lu;之後一日拜託妹妹到圖書館借左大阪旅遊書睇,又book好酒店買好保險,話咁快就可以收拾心情等出發啦^^



日本關西6天行程:
Day 1: 香港 - 大阪 
Day 2: 大阪 - 京都 - 大阪
Day 3: 大阪 - 神戶 - 大阪
Day 4: 大阪 - 池田 - 大阪
Day 5: 大阪 - 京都 - 奈良 - 大阪
Day 6: 大阪 - 香港

(住宿大阪 Hotel Le Botejour Nanba Annex)


8-12-2013

第一天

好快就到左出發既大日子,今次坐既係夜機,所以下午係屋企食完午餐慢慢出門口都未遲,好耐都未去過香港機場上飛機啦;由屋企搭車去機場要個零鐘時間,到左機埸先去check in寄行李,仲有時間去麥當勞食晚餐,仲見到朋友tim^^


夠鐘等飛機啦,期待中


香港飛大阪需要3個多小時,去到大阪已經半夜lu,買平機票要付出小小代價


遲左大約15分鐘上機,都ok啦;機上有好多小朋友,夜晚都仲係咁好精力玩得咁開心,我就冇咁好精神啦,恰下眼訓仲好


飛到大阪關西機場,完成所有入境手續去到入境大堂,時間係1:32,坐唔到最後一班1:30開出既機場巴士lu,可以名正言順係機場過夜啦;今次入境非常順利,一句都冇問過就比我入境,想當年唔知咩事關員問左好多問題,又英文又中文,最後仲要搜身,今次咩事都冇發生,Yeah!


關西機場二樓好多人過夜,去到既時候已經有好多人霸晒位啦,好似警局門口個D靚位唔洗講都知冇晒;機場夜晚感覺上好安全,全晚不停有職員巡邏;而飲食都唔需要擔心,有24小時營業便利店﹑麥當勞﹑牛肉飯店,訓唔著都可以去食下野


我就揀左入面比較靜既位置休息,冇咁多人行來行去


旁邊有兩個台灣女仔,哈哈
安頓好都已經兩點幾啦,休息既時間唔多,明天六點就可以出發;機場環境好舒適,不過我都冇點訓,要睇住妹妹安全少訓幾個鐘冇問題既;夜晚上下網,同其他人研究下去邊玩,時間過得好快;好彩我一向唔係點訓都冇問題,如果怕眼訓就唔太適合搭呢D夜機啦


第二天

五點半機場開燈lu,妹妹都起身啦,簡單梳洗一下就出發去市區
成晚係機場都冇太大到左日本既感覺,聽中文多過聽日文,直到步出機場個一刻,好凍丫!真係又大風又凍,呢D就係寒風刺骨?


唔理咁多直衝去火車站
售票機旁邊有一間JR客務中心,入去就可以買到JR Pass;我買左Kansai Area Pass既4日Pass,而妹妹就買左1日Pass


關西機場有兩條鐵路連接,JR & 南海電車,我買左JR Pass當然坐JR啦


用Pass每次出入閘都唔可以用閘機,要用最則邊有職員看守既通道出入,如果前面有人問野又或者處理緊問題既時候就麻煩啦,會頂住後面


落到月台依然好凍,好彩有暖氣侯車室,即時入去暖下直到火車到站


去京都最快最舒服就係坐呢部特急HARUKA,個半鐘由機場直到京都,喜歡坐火車既我期待左好耐啦,終於可以第一次坐上日本鐵路,好野!




呢部車真係好舒服,位又闊行車又穩定又有暖氣,直頭係坐到唔捨得走
可能時間尚早,呢班係第一班6:30車,所以人唔多,去到中途站都唔多人上車;而話明係特急當然停站最少,連總站都只係六個站,又快又舒服


係車上望見太陽升起,又見到好多日本建築,終於有日本既感覺啦
望住窗邊一排排飛過既風景,對日本開始有少少期待,今次機緣巧合下比我來到大阪呢個咁靚既地方,一定要好好享受呢個難得既旅程;就係欣賞美景之間,不知不覺就訓著左,直到差唔多到京都先起身,雖然只係一段短時間但已經好精神啦!京都我黎啦!






上車後我留意到其他乘客會放張車票係椅背,原來特急列車係會有車長逐個乘客check飛!因為特急列車車費比其他列車貴,如果只買普通票但又上左特急列車就需要即時補票;我買左JR Pass就唔洗擔心呢個問題,而且買Pass會比只買車票平,單程車票要二千八百円,1日Pass只係二千円咋,所以買Pass抵好多


火車準時8:03到達京都站;京都既空氣好清新好舒服,又有溫暖既陽光,日本旅程有個好開始


京都站




先係車站寄存個喼;日本每個車站都有locker可以寄存,不過去呢個人手寄存處收費比locker更平,一件行李收410円,當然放低係呢道啦


步出京都站,好耐都冇見過咁藍既藍天啦!香港近排比污濁空氣入侵,睇來要挨過冬天先有機會再見藍天啦


空氣實在太好,飛機都睇得好清楚


沿大街向北行,專登唔搭車就係想感受一下日本既環境


京都既街道唔多人好舒服,唔似香港市區條條街都迫滿人


一路行見到好多紅葉丫,雖然過左秋天紅葉最靚既時間,總算都有小小可以睇下;京都真係好靚,人少車少樓又少,連街道都可以整到咁靚,生活係呢道真係唔錯


路經一間叫「真宗木廟」既寺廟,見到好靚既銀杏,金黃色閃閃發光;隨街都可以見到美景心情好好,好耐都冇試過可以咁輕鬆自在四圍遊蕩,唔洗擔心安全問題,又唔怕有人打劫,想去邊就去邊,咁樣既旅行先玩得開心ma






繼續四圍蕩,結果行錯左路,哈哈^^行多左成半個鐘先去到想去既地方,係冇地圖又冇google map之下一唔小心就行過龍lu,行錯路問題唔大既,日本所有野都好新奇,隨時都可以發現意外驚喜;不過就有D擔心妹妹未食早餐會肚餓,路過便利店先買個飯團比佢食先,佢話味道又唔錯bor;咁岩路經一間7-11發現有free wifi,check一下google map終於搵岩路啦


我地既目的地就係呢道「錦市場」,想去八掛一下日本人既街市有咩賣


以下係偷拍錦市場既相,話明係偷拍就緊係亂影啦,就咁將相機拎上手睇都冇睇就隨意亂影,哈哈;冇所謂啦,我都係想感受一下氣氛,冇刻意係呢道慢慢影相
















錦市場咩都有,生﹑熟﹑新鮮﹑醃製食品﹑日用品,所有野都可以搵到,而且好多都明碼實價,岩晒我呢D唔敢出聲既人;而我覺得最好既係全個錦市場都極乾淨,唔好話垃圾,就算係魚檔旁邊少少水漬都冇,行起來好舒服;另一個去錦市場既目的係想食個地道早餐,但朝早錦市場除左賣小食既店鋪有營業外,其他餐廳要11點先開門,心諗日本人唔洗食早餐既咩?唯有先離開錦市場睇下邊道有早餐食啦

離開錦市場,出面既食店絕大部份都係未開門,估唔到想食早餐都有難度


見到有一間開住門,即刻入去先;招牌寫住讚岐兩個字我估都係食烏冬掛?係烏冬就正啦岩晒我


嘩...真係食烏冬丫!佢要係超好食,我未食過咁好食既烏冬架!
日本既第一餐已經食到好野啦,好滿足^^係呢道開始感受到日本人既禮貌同熱情,有一位同樣來食烏冬既老婆婆見我地兩個唔識點餐,主動走過來幫助,而且估到我地唔識得去水機斟水,仲行去水機為我同妹妹斟好兩杯水再遞到我手上,點解可以咁好人架!全程唔需要一句說話就已經可以好感受到呢份心意!如果呢件事出現係香港或者其他地方我可能仲會擔心對方有咩企圖,不過日本呢道我唔會有任何擔心,日本既文化令我好安心,好享受呢個旅程


食完美味既烏冬,再次穿過錦市場去下一個地方


呢道賣既野平靚正架






出到去大馬路終於見到好多人;呢道有電車站﹑百貨公司﹑好多店鋪,唔怪得咁旺;而且可能差唔多到食飯時間,好多學生都出左來,餐廳都迫滿人


Shopping唔岩我,繼續向前行


沿路好靚丫


向清水寺方向前進








路過「八坂神社」,係出面望入去都可以感覺到日式建築幾咁靚,就好似返左去唐朝一樣,可惜既係現在保存住最多古中國中華文化既地方係日本而唔係而家既中國......






當時唔知道八坂神社都係一個好地方,好快就行過左啦


進入左應該係民居既地方,就好似日劇同卡通片裡面見到既一樣




又見到銀杏啦;大阪﹑京都既街道都係咁靚,好多地方都可以見到好多好多銀杏樹,行起來人都精神D






公園有好多大肥貓


除左銀杏,京都好多地方都見到紅葉,又金又紅點綴出京都呢個咁靚既地方







漫步京都,好有漫步古代既感覺;京都古時有一段長時間作為日本首都,當時叫「平安京」,傳說平安京係仿照唐朝長安洛陽而建設,而家係呢道唔多唔少都可以感受到當年長安城既氣氛;相反,如何而家去到長安洛陽,我諗好難可以再搵到當年唐朝個種景象啦


去到一條比較多人既商店街,兩旁建築真係好靚好靚,看似中式建築但又有濃厚日本風格,再加上紅葉綠葉襯托,好似幅畫一樣








任何地方都可以見到靚靚紅葉






好有層次感






清水寺周邊見到好多人穿著傳統和服,配合呢個背景簡直就係完美,好欣賞日本人對自己傳統文化如此尊重;我諗如果有人係香港著漢服出街應該會比人當係傻既,相反日本就算係普通街上,或者去到街市都有人著和服


冬天好多樹已經落晒葉lu,早少少秋天去到就可以見到滿天都係紅葉,一定超靚








轉入去清水寺既大街,好多人丫!原來日本學校會帶學生去清水寺參觀,所以呢道有好多好多學生出沒,係清水寺參拜就會學業進步?我黎遲左幾年啦......






Google相簿自己幫我將呢張相加左落雪,又幾岩feel bor


上到去清水寺出面啦


好開心可以係清水寺見到好多紅葉,之前從來都冇諗過可以睇到紅葉架,事關日本既紅葉季節已經過左好耐lu,今次突然見到咁多紅葉真係好驚喜好開心;雖然見到既紅葉唔係最靚,唔夠紅而且好多樹枝已經冇晒葉lu,不過有紅葉睇已經好滿足


好多和服美女出沒




呢棵紅葉已經冇晒啦,如果秋天來一定好好好好好靚;突然諗起一首詩:「落紅不是無情物,化作春泥更護花 。」


許返個願先




遙望京都市
京都市冇咩高樓大廈,難怪走係街頭覺得咁舒服








越近清水寺就見到越多紅葉


















好多葉已經變成灰色啦,還好仲有D灰中帶紅




正式進入清水寺


由清水寺往外望




「清水寺是京都最古老的寺院,建於公元798年,佔地面積13萬平方米,慈恩大師創建。相傳慈恩大師是唐僧在日的第一個弟子。現存清水寺為1633年重修。清水寺為棟樑結構式寺院。正殿寬19米,進深16米,大殿前為懸空的「舞台」,由139根高數十米的大圓木支撐。寺院建築氣勢宏偉,結構巧妙,未用一根釘子。寺中六層炬木築成的木台為日本所罕有。」

清水寺正殿,香火鼎盛


清水寺下面就係音羽瀑布,據說飲左音羽瀑布既泉水可以長壽、身體健康﹑學業進步或者姻緣美滿,所以個個去到清水寺都一定會飲音羽瀑布泉水




清水寺風景










清水寺旁邊有一間「地主神社」,專門比人祈求姻緣,見到好多人入去丫!我就冇求啦,我呢D獨男求來都冇用架啦,留返啖氣好過,哈哈




回望清水寺正殿全貌




沿路紅葉






落到去音羽瀑布啦,我都唔執輸飲下先;三條泉水代表三樣唔同既野,左邊代表智識,中間代表姻緣,右邊代表健康,而我就選擇右邊既健康,希望真係咁神奇啦^^


離開清水寺,一路係紅葉之下穿過,好靚丫








欣賞左清水寺好耐,已經就快天黑啦,又係時候離開lu;日本冬天好早就天黑,只係三點幾個天就開始暗起來,會唔會早左少少?


出到去馬路,等巴士返去京都站,行左成日都係坐巴士返去舒服D


第一次坐日本巴士,同香港調轉日本既巴士係由後門上車前門落車,落車先比錢;日本巴士車費唔平,就咁上一上車坐幾個站最平已經係220円,真係好貴丫


話咁快就去到京都站,先係車站四圍行下拎返行李,計好時間入站上車


坐返今朝個部關空特急HARUKA返大阪,最舒服就係呢部車冇理由唔坐佢既




學人放張車票係椅背先,不過好似太大張有少少誇張,都係拎返下來比較好;全程一樣好舒服,好快就訓著啦


好彩冇訓過龍,大約一個鐘去到天王寺站,再轉車坐多兩個站就可以去到目的地JR難波站


預訂好既酒店就係難波黑門市場旁邊,無論行街食野都好方便,靜中帶旺位置一流;先去酒店放低行李,由JR難波站穿過地下街,一路行一路睇下野15分鐘就去到酒店,好方便;放好行李就出返來,去道頓堀逛逛


道頓堀全部都係食肆,如果喜歡食既朋友一定喜歡呢道,但好唔好食就唔知道啦,我就唔係太喜歡係呢D咁多人又太旅客區既地方食野,覺得中伏機會比較大




道頓堀與心齋橋之間有一河分隔,河上已經掛有聖誕燈飾,都幾靚丫




道頓堀最重要地標之一:固力果跑步人廣告;固力果已經有好多年歷史,而呢個廣告同樣係道頓堀聳立了好多年;原本我都覺得呢個招牌既固力果產品幾得意想買D返來,不過出發前見到阿信屋都有得賣,咁就無謂山長水遠咩返來啦


過左河就係心齋橋啦;心齋橋真係好多人,去shopping呢道就係一個好地方,我就冇興趣啦,人太多此地不宜久留,要盡快進開;今日去心齋橋只係想探探路,明天會再返來買野






全條心齋橋商店街最有趣應該就係呢間鋪頭啦


唔想迫人離開左心齋橋商店街去左旁邊既大路「御堂筋」(個名有少少奇怪,大阪呢道好多南北走向既街都係叫「筋」),即刻冇晒人舒服晒;大廈都有聖誕燈飾啦


御堂筋真係靚到唔知點形容
全條街兩旁都種滿銀杏樹,一片一望無際既銀杏海,地上亦都佈滿銀杏葉,望出去無論天地都係一片銀杏,比起我之前睇過既銀杏呢道靚好多好多,可以係大阪睇到銀杏我諗都冇諗過,原來大阪同京都一樣好多地方都有銀杏樹,而且仲係好多好靚,今次旅程無時無刻都有驚喜,如果日頭黎睇一定更靚








好有日本feel既小巷,好正丫;日本呢道真係咩都好正


行左咁耐原來仲未食晚餐(午餐都好似未食?),咁就行返去酒店方向路經道頓堀再睇下食咩啦,是但入左間係香港人眼中應該好出名既四天王拉麵;鋪面好日本feel,不過一坐低感覺好怪,點解入面幾堆人個個都係講廣東話一個日本人都冇架?之後入來既都係一樣講廣東話,中伏既感覺出現啦


期待已久既拉麵終於出場
上面塊肉真係好滑好滑,好好食!不過個麵就...好難食丫!都唔知個麵點樣可以整到咁難食架!個湯底又一般!好難想像可以係日本食到個咁差既拉麵!仲要係又貴又難食!所以話D旅遊書跟本唔可信!平時自己買包拉麵返屋企煮都好食過呢碗野!我同妹妹一致認為要blacklist呢間野!!!


食完就慢慢行返酒店,唔知係唔係太夜,唔多覺有街頭小食可以食bor,唔緊要啦行左成日唔再去搵野食lu返去酒店休息下仲好;酒店房真係好細好細好細,細到差少少唔夠位開喼,但張床就好舒服而且好乾淨,住得好滿意,琴晚冇覺好訓今晚可以訓個靚覺啦



鐘意SeeWide的分享,給我們一個Like吧!
  • 攻略日期:2013-12-08
    攻略地點:大阪,京都
  • 攻略時間:1日以上
    是次消費:每人平均約HK$ 3000.00
2人比"掂"
  • 小地勤點滴 於2015-02-02 07:12:22 留言
    我都係坐依班機去大阪 , 訓機場都唔錯 , 一訓醒就可以出市區玩
  • 舉報 回覆
  • No.1
  • 平凡人 於2015-02-03 00:49:29 留言
    原文由 小地勤點滴 於 2015-02-02 07:12:22 發表
    我都係坐依班機去大阪 , 訓機場都唔錯 , 一訓醒就可以出市區玩
    可以玩盡所有時間可惜班機已經改左時間表啦
  • 舉報 回覆
  • No.2
  • 小地勤點滴 於2015-02-03 05:52:55 留言
    原文由 平凡人 於 2015-02-03 00:49:29 發表
    可以玩盡所有時間可惜班機已經改左時間表啦
    係你個日記到 , 我到我同事
    無錯 , 轉左時間 ,
    今年公司仲改制 , 唔比我地再出大阪機票
  • 舉報 回覆
  • No.3
  • 平凡人 於2015-02-03 12:44:21 留言
    唔小心影到你同事tim,sorry唔去大阪去北海道都唔錯啦,仲吸引
  • 舉報 回覆
  • No.4
  • 林公子 於2016-05-08 09:53:48 留言
    樂桃班機會好D,直接市區唔使等,一係就坐UO早機
  • 舉報 回覆
  • No.5
  • 平凡人 於2016-05-08 21:00:20 留言
    原文由 林公子 於 2016-05-08 09:53:48 發表
    樂桃班機會好D,直接市區唔使等,一係就坐UO早機
    呢次係貪平坐咋,不過等慣左時間好快過
  • 舉報 回覆
  • No.6

最多能輸入300字

累積瀏覽 112298

全部攻略 126

全部回應 1394