探險家攻略 > 城中探秘 / 旅遊 > 古蹟 / 廟宇 / 公園 / 長線旅遊 > 昆明。翠湖公園﹑圓通寺

昆明。翠湖公園﹑圓通寺

由平凡人於 2014-10-15 13:20:00 發表 | 累積瀏覽 899

分類：長線旅遊廟宇古蹟公園；地區：中國

< 北京﹑西安﹑成都﹑雲南23天遊 >

第二十一天（續）

二十多日旅行即將結束，終於要踏上回家之路；二十日睇落好似好長，其實只係一轉眼既事，諗返第一日出發既情況，去過既每一個地方，所有事都好似岩岩發生咁，看似遙遠，其實好近


晚上去到麗江火車站，當時正式既火車站仲未起好，要係呢個用鐵皮搭成既臨時火車站上車

去到一個簡陋月台，今次呢部火車好得別，第一次坐呢種雙層火車


呢部車專為麗江而設，睇落又靚又新淨



今次乘座硬臥車箱；同之前坐過既硬臥車箱唔同既係呢道只係有兩層，唔係普通火車既上中下三層，但上層坐起身都係會撞頭

坐係火車下屠位置；開車冇耐火車就熄燈，外面夜媽媽冇風景好睇，所以最好都係早啲休息，明天一早就要落車



第二十二天

未夠六點準時去到昆明


冬天昆明未有咁早天光，我地連火車站都冇行出去就先坐的士去機場放低行李；當年仲係用舊既巫家壩機場，冇諗過機場竟然係市區之內，坐一陣車就到，好彩當時冇比司機打...要知道司機係的士站排得咁辛苦但只係賺得個十零廿蚊一定唔會開心

去到機場都未天光，寄存好大背囊就坐巴士向市區出發


去到市中心，終於開始天光啦



路過KFC就被吸引左入去食早餐，豆漿加油炸鬼，都唔似係KFC食物


睇下食KFC幾有用


食飽後經正義路行去翠湖公園



路過一間戲院，竟然有得睇喜洋洋，仲早過香港上畫



去到翠湖公園啦

冬天翠湖公園黎左一班得意朋友，成千上萬紅嘴海鷗由西伯利亞飛到昆明過冬，海鷗千里迢迢飛來就係為左呢個四季如春既美麗昆明



可以買麵包餵海鷗，佢地會飛起來搶住食，好好玩架


呢道餵海鷗仲好玩，佢地會飛住等野食，只要一拋出麵包就即刻有海鷗飛過來



暫時離開翠湖公園，先去另一個地方


昆明都有新巴出現？

會考時讀過一課書「花潮」，唔知大家仲記唔記得花潮講述既圓通山係點既呢？而家我就搵緊圓通山既下落；一路望住地圖，好快已經見到圓通山，但不斷係山下面行來行去，就係搵唔到上山既路，最後唯有放棄上山啦；花潮係咁形容圓通山上既圓通公園：「有亭，有臺，有池，有榭，有花，有樹，有鳥，有獸。後山沿路，有一大片海棠，平時枯枝瘦葉，並不惹人注意，一到三、四月間，真是花團錦簇，變成一個花世界。」而家一月咪就係開花時間！點解上唔到去架！冇得去圓通山，見到圓通寺就入去到此一遊！

其實都冇咩好睇...明明圓通寺後面就係圓通山，但呢道冇路上


寺入面水都冇滴...

冇野睇就走人啦，去返翠湖公園

唔通呢啲就係櫻花？未見過櫻花唔知呢

又見到海鷗啦

突然間海鷗飛起晒，成個天都係海鷗



真係多到好誇張


我就繼續係湖邊餵海鷗，買幾蚊麵包就可以玩得好耐


係翠湖公園旁邊又見到德克士，又被吸引左入去食野


昆明都唔知有邊道可以去，食完野就行返去正義路個邊

呢道都有德克士！第一次見用「負一層」來表示地庫，好有趣

商場有個兒童表演比賽

好多人丫，四圍都好多人

南屏街中心

兩旁係大商場，但我從來都唔喜歡買野，所以來到都唔知做咩好...

又見到戲院啦，實在太得閒想入去睇喜羊羊！不過呢道係買唔到下場戲飛，成班黃牛黨企晒係門口等你幫襯！戲飛都要抄黃牛，都唔知有咩可以唔炒，咁就唔睇lu

行到攰就入左一間德克士休息下


諗唔到昆明有咩好做，最後都係決定返去機場hea下好過...要去搵車搭返去機場



係南屏路巴士站搵到岩既車



機場近市區真好，坐普通巴士就可以去到，唔洗去搭機場巴士，而且仲好快到tim

返到來啦；真係好早去到機場，個天仲好光，但其實我係坐夜晚十點飛機，早左好多好多到...

機場大堂



晚餐就係呢個KFC北京雞卷；以前香港KFC都曾經有賣北京雞卷，但已經冇左一段時間，估唔到係雲南可以再次食到

等到差唔多時間就去到一個小小候機室等上機，夜晚機如果唔delay就真係神奇，所以我都唔會預呢班機可以準時起飛，最後當然係遲啦，遲一個鐘當準時...

要坐接駁車上飛機



來到我坐既飛機啦，第一次坐南方航空


先飛去深圳再轉車返香港

今晚既宵夜出現，有兩個包食下都幾好

第二十三天

大約兩個鐘航程去到深圳，拎返個背囊就要繼續趕路啦，距離屋企仲有好遠

紅白藍袋出現


出到機場，即刻跳上機場巴士去深圳市區，係第二個站落車再轉的士去黃崗；開頭有諗半夜係深圳都唔知搵唔搵到的士搭，原來當巴士停車時會有大量的士停係旁邊，唔怕冇車坐；深圳的士同其他地方比真係貴好多

由黃崗過關，坐上觀塘快線，落車再轉的士，大約四點安全返到屋企啦，二十三日旅程就係咁完滿結束^^

二十三日旅程終於寫完啦，感謝大家支持呢個遊記^^不過真係唔好意思，呢個遊記越寫越hea，到後面有爛尾感覺，希望大家唔好介意...事關旅行距離而家事隔太耐，好多細節﹑當時心情等等已經唔記得啦，寫唔到出來...唔緊要啦，遊記總算完成，一路寫一路睇返自己既遊記就好似去多次一樣，唔知將來睇返會有點既感覺呢？哈哈^^

< 北京﹑西安﹑成都﹑雲南23天遊 >

< 完 >

鐘意SeeWide的分享，給我們一個Like吧！

檢舉

攻略日期：N/A

攻略地點：中國
攻略時間：1日以上

是次消費：N/A

共1人比"掂"

平凡人於2014-10-21 09:49:20 留言
原文由炯仔的天空於 2014-10-16 20:47:43 發表
大開眼界

我都大開眼界
舉報回覆
No.1

平凡人於2014-10-21 09:49:57 留言
原文由特搜總編E 於 2014-10-17 13:27:33 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.2

EEChan 於2014-10-21 16:38:44 留言
原文由平凡人於 2014-10-21 09:47:33 發表
以前都聽過昆明多海鷗，估唔到多到咁誇張

我80年代去時，公園唔多覺有海鷗架
舉報回覆
No.3

mrsakwok 於2014-10-21 22:28:01 留言
原文由平凡人於 2014-10-21 09:44:28 發表
又可以去雲南玩~祝你有一個愉快旅程我都係琴晚先返到香港十月仲未凍未必有咁多海鷗

謝謝你的回覆！
已經在雲南了，約星期四晩才返昆明，公園應該不會去，連花市也恐怕去不成了，因同行朋友都不感興趣：（
舉報回覆
No.4

平凡人於2014-10-22 01:28:20 留言
原文由 EEChan 於 2014-10-21 16:38:44 發表
我80年代去時，公園唔多覺有海鷗架

可能以前冇海鷗去過冬？呢個我都唔知呢
舉報回覆
No.5

平凡人於2014-10-22 01:32:56 留言
原文由 mrsakwok 於 2014-10-21 22:28:01 發表
謝謝你的回覆！
已經在雲南了，約星期四晩才返昆明，公園應該不會去，連花市也恐怕去不成了，因同行朋友都不感興趣：（

到左雲南啦玩得開心啲啦昆明市內其實冇咩好行，連花市都唔去就唔知有邊道好去啦
舉報回覆
No.6

mrsakwok 於2014-10-24 21:29:52 留言
原文由平凡人於 2014-10-22 01:32:56 發表
到左雲南啦玩得開心啲啦昆明市內其實冇咩好行，連花市都唔去就唔知有邊道好去啦

哎呀!我去倒花市喇！但係而家嘅花市已經唔係花墟，變左一個大嘅旅遊點，專招呼遊客，裡面賣變色花、香精油、花香梘、藥材、土產食物、乾花(插得好娘)、生果，只有少量鮮花，見到都無興趣影呀！
舉報回覆
No.7

平凡人於2014-10-25 00:57:07 留言
原文由 mrsakwok 於 2014-10-24 21:29:52 發表
哎呀!我去倒花市喇！但係而家嘅花市已經唔係花墟，變左一個大嘅旅遊點，專招呼遊客，裡面賣變色花、香精油、花香梘、藥材、土產食物、乾花(插得好娘)、生果，只有少量鮮花，見到都無興趣影呀！

原來花市變成咁冇計啦所有地方都開發來賺錢，好多都同想像唔同晒啦
舉報回覆
No.8