搵個地勤做老婆

16.03.2015

這個月的更表 , 對我來說 , 很辛苦 !

好奈無試過走咁多位同事 , 而又未請得返曬 . 平日強調唔等錢用的我 , 也要出山 , 返 OFF-OT . 相信我已經有成大半年 , 無返過 OFF-OT . 基本上 , 我平時都係返 3 日就放 1 日 , 之後就係返 2 日 , 又放 1 日咁 . 但依個月因為人手唔夠 , 我要返成 6 至 7 日先有 1 日假 , 真係好好辛苦 .

可能大家唔會明白 , 返 6 日對輪班的我來說 , 有幾慘 . 每星期唯一的 1 日假就係用黎轉更 . 即放假前一定係收夜 , 起碼 3 點先返到屋企 , 而放假後就一定係返早 , 晨早 3 點幾就要起身 . 的確好攰 , 我精神上支持到 , 但年老既身驅就真係頂唔順 . 依幾日收早 , 我都係晚上七點幾就要去訓覺 ... ...

究竟我為左咩野要咁樣對自己 , 我的確唔等錢洗 , 但最近太多新聞話我知要努力儲錢 . 如果我想早日退休 , 我就要安安定定咁做多幾年 . 我係洗好少錢既女仔 , 無論我搵幾多錢 , 媽媽都只係要我比 3000 蚊做家用 , 不過我都好乖 , 會比多 3 幾百佢飲茶 , 同幫佢交電話費及上網費 .

雖然小地勤好似成日去旅行咁 , 但其實都唔係洗好多 , 買比自己既都係必需品 , 亦因為咁係香港就無點買野 .

坦白講句 , 係依間公司返工的確辛苦 , 但佢又的碓係人工算叫唔錯既地勤公司 . 小地勤以前係 J 公司做地勤 , 底薪加津貼先 8000 , 做左三年幾先加到 9100 . 依間公司 , 小地勤就由 14000 , 都係底薪加津貼 , 做左快四年 , 依加就底薪加津貼有成 16000 . 仲未計我既 OT 錢 , 我成 70 幾蚊一個鐘 , 好似依個唔夠人 , 我要開 OT , 一 OT 到第 37 鐘 , 我就成 110 蚊一個鐘 .

有數得計 , 小地勤每個月都儲到成萬蚊 ! 再加上 , 我除左會儲錢 , 仲會買下股票 , 當年我係股票跌到人心惶惶時學會買股票同儲基金 , 那幾年我為左買到更多股票 , 我每日都帶飯 , 衫都唔買多件 , 日日返工都係著住制服咁上落班 . 當時好多同事都笑我係窮家女 , 我都仲好自我 , 哈哈 .

今時今日 , 我有錢都仲係唔會買樓 , 因為古語有云 , 物極必反 , 升成咁就好似當日股票咁 , 跌先再去諗 , 依個時間我要諗既係再儲多些彈葯 .

FACEBOOK 講上車血淚史 , 話想上車 , 要搵個護士做老婆 , 其實想上車 , 搵個地勤做老婆仲好 . 不但旅行可以照去 ( 有免費機票 ) , 就算好似小地勤咁 , 唔係大學生 , 都可以靠多勞多得 , 少少地都搵到 2 萬蚊一個月 , 仲要返工返到無時間行街買野 , 無靚衫去返工 , 都仲可以著公司套制服 , 分分鐘仲多人偷望你 , 哈哈 ...

單身男士 , 去旅行時不妨留意下 , 好多地勤靚女都因為返工時間唔好 , 無機會識男仔而仲係單身 , 所以去旅行時 , 遇上 delay , 記住唔好鬧人 , 好好對人地 , 話唔定下一位可以上車既人 , 就係你 .