地勤儲錢血淚史

23.03.2015

當大家仲不停討論緊 " 護士上車血淚史 " 時 , 小地勤好想講下自己份工對自己影響有幾大 , 有追開我日記既朋友相信好清楚作為前線既地勤 , 每日要面對幾大壓力及幾多野蠻乘客 . 有人講依行航空界係一座圍城 , 外面既人好想入去 , 裡面既人就好想出黎 . 小地勤係好想出去 , 但都要向現實低頭 . 原因如下 :

- 醫療保障 , 每位地勤都有自家公司醫療卡 , 睇網醫免費 , 睇其他醫生 , 包括中醫 , 鐵打 , 一般 可以向公司取回八成費用 . 有病就睇西醫 , 無病就睇中醫 . 就算再強壯既人都會有生病的時候 , 公司為員工提供近全免的醫療保障 , 為小地勤省下一筆開支 .

- 靚靚制服 , 手袋及鞋 , 突顯我地既專業及美麗既一面 . 全身都係公司野 , 爛左當然可以換新 , 唔怕被人係街上指指點點的話 , 可以省下一大筆買衫錢 . 

- 貴賓室員工及空姐一樣 , 每日收工都可以有一堆廚餘 , 唔怕食黎食去個幾樣 , 可以帶返屋企當餸 , 又或者第二日帶飯用 . 食方面 , 又再省一筆 . 以前的我十指不沾陽春水 , 依加係貴賓室就學識左好多野 . 簡單飯菜都 OK . 難既就帶廚餘當自己煮吧 !

- 返 Shift , 有好有唔好 . 正講好 , 避開星期六 , 日既人多車多 , 閒日買野比較平 . 收早時 , 剛好會遇正街市大平賣 . 由市中心行返去屋企要 15 分鐘 , 省下一程 4.4 的車錢 , 又可以買到平餸 . 我試過最平 10 蚊 3 斤菜 , 35 蚊 10 隻活鮑魚 , 55 蚊一條石斑 . 煲湯最平試過 20 蚊豬肉 , 5 蚊一藍蕃茄 , 5 蚊一藍薯仔 , 2 蚊一個洋蔥 , 健康又便宜 .

- 免費機票及一折機票 . 依個優惠改變了我的一生 , 令我開始唔做大花筒 , 學識了儲錢 ! 某一年 , 仍是大花筒的小地勤去了一轉北京 , 那個時候 , 我把身上的廿多元也花光 , 買了一本書 " 廿幾歲改變女人的一生 " . 那本書令我開始反思自己有幾大洗 . 那一年 , 我第一次去開户口 , 買了一份供 10 年的基金 . 半年後 , 我又買了一份要供十一年的儲蓄保 . 

那一年我每個月只賺一萬元 , 扣左 3000 家用 , 2000 的士錢 , 所剩有幾多 ? 那一年 , 我明白當地勤有幾好 ! 多勞多得 ! 只要你有眼耳口鼻 , 四肢健全 , 公司就需要你 . 不久 , 我學識投資股票 , 對儲蓄幫助很大 .

某一年 , 我第一次歐洲自由行 , 身上只有 200 歐元 , 原來窮則通 , 不吃大餐可以吃麵包和燒雞 . 原來歐洲人用的電話超落後 , 但生活仍很開心 . 原來沒有電腦 , 沒有電話 , 生活會更自由自在 . 原來物質並不是很重要 , 最重要係心靈富足 . 那一次旅遊令我獲益良多 .

一個底薪只有 8000 + OT 元的小地勤在這行呆了四年 , 轉公司 , 加人工 . 今年踏入第九年地勤生涯 , 我是一個 Leader , 對比其他人 , 我人工不算高 , 有 16000 + OT . 每個月穩賺 18000 .

員工機票令我認識世界 , 改變自己 . 旅行我照去 , 洗費全是股票賺來的息 , 不肉痛 , 錢我照儲 , 本金不斷增加 . 假如我能夠遇上跟我一樣的好男人 , 上車 , 供樓相信並不難 . 

依個係我自己既真人真事 , 我沒有富爸媽 , 我也是屋邨長大的 , 我沒有大學學位 , 沒讀過名校 . 但我明白積小成多 , 恃之以恆既道理 , 當然穩健既投資都好重要 . 人地成日話當係搵到第一桶金之後 , 第二 , 第三桶就會好輕鬆得到 , 的確有道理 .

有數得計 , 就算小地勤每個月儲得 3000 , 一年都儲到 3 萬 6 . 十年就係 36 萬 . 更何況我隨住人工增加 , 我亦儲得更多 . 依加樓市咁貴 , 再等下吧 ! 別急住搬離父母 , 有時窩居只為將來更美好 .