攻略日期：2013-12-15
是次消費：每人平均約HK$ 15.00
從來食野唔做野，做野點人做野，見到黃師奶同玲感蛋糕整野食整得好開心，星期日打邊爐，忍唔住都要親自出手，除左特別煲左一煲蘋果雪梨水外，仲上網參考左唔同人既做法，整左一煲起哂沙既紅豆沙俾ｄ朋友仔食！正呀！
步驟一：準備材料
材料簡單到無朋友，最基本既配搭係：紅豆一磅(450克) + 半包片糖(甜度可自行調節)。鐘意食蓮子、百合既朋友仔，可以自己加。
步驟二：雪藏最少6小時
根據網上不同意見，要整到一碗美味又起沙既紅豆沙，選紅豆最重要，尤其不可買超市放左一萬年既紅豆，不過呢招係唔work既，因為我屋企樓下只係得返兩大超市有紅豆買...
所以要用網上見到既第二招，將紅豆洗乾淨，再放在冰箱雪藏至少6小時，用冷縮熱漲的原理，破壞紅豆的組織，令紅豆煲時，紅豆的外殼和紅豆肉分開。係咁冰凍既天氣，個碗係冰箱度都凍到流哂口水添。
步驟三：1:4比例紅豆和水 + 煲2-3小時
每人口味不同，有ｄ人鐘意豆多ｄ，有ｄ人又鐘意糖水多ｄ，我覺得1份紅豆，4份水既比例就剛剛好。煲滾水後放紅豆，用細火大約煲2-3個小時。
步驟四：起沙紅豆沙順利完成
煲左2個半鐘後，一碗香噴噴、甜蜜蜜，又起哂沙既紅豆沙，就順利完成啦！
不過，雖然紅豆確有起沙，不過和大學時代煲的美味紅豆沙相比，味道上，明顯有天壤之別。當年大學時，紅豆在一般雜貨店購買，可能比較新鮮，不用雪藏，只用電磁爐慢火煲幾個小時，紅豆既會起沙，又美味得多，可惜。
