慈雲山 － 三記打冷

 

小弟家住慈雲山，而慈雲山最出名嘅三間餐廳，我諗都係(排名不分先後)：

 

小食館 － 食車仔麵同小食嘅

越南阿肥 － 食越南野嘅

三記 － 食小菜同埋打冷嘅

(歡迎街坊挑機反對)

 

 

不過好奇怪, 小食館同埋越南阿肥我都好少食, 兩間夾埋一隻手都數得晒, 反而三記就久唔久都會去食！

 

up左咁多廢話, 終於入正題喇！事關當晚屋企無煮飯，所以就一家三口落去三記食！

 

既然成家人得三個口，咁叫到嘅野都唔太多
（不過我地都叫左五個餸, 應該都算大食吧？）

 

黎張大合照先！

 

 

 

非常唔好意思，我係一個十分唔講禮儀嘅人

 

所以什麼餸菜黎到，手機食先我係一律通通唔理，當然係放入自己個口「食左先講」啦！

 

亦因為咁，所以請大家原諒我今次所有嘅相都碟餸都係冇左一忽，甚至無左一半 =_____="

 

 

先黎第一味，當然要叫個招牌炸蠔餅啦

依舊香脆，亦都有唔少蠔仔，水準保持！

 

 

 

再黎第二味，就係鳳凰卷

我印象中呢味菜N年前係金剛同小儀個節目有介紹過

不過因為屋企人覺得唔知乜黎，又只係油炸鬼整成嘅覺得cheap cheap就一直都無試過

今餐我點菜，一於試下

 

 

其實佢係用Ｄ墨魚膠釀落去Ｄ油炸鬼度，之後再翻炸同埋加返Ｄ酸甜汁咁

以$48, 有咁多舊 (相中已經俾我地食左3份1), 而且釀落去嘅墨魚膠都唔少

我覺得係抵食嘅！

 

 

 

如果知道上面果味係有墨魚膠釀落去，咁我地就未必要叫以下呢味喇

 

不過食法唔同嘅，呢味係就咁炸，上面果味就有汁

 

呢味係乜？咪就係墨魚餅囉！

 

 

我地都係食左成三份一先影相，所以得返幾粒充撐場面..........

 

講返呢味，其實係家父嘅至愛

以前我同老媽子成日都話唔抵，因為去街市買一包包整好晒嘅墨魚膠返屋企自己炸都係廿幾蚊仲要大大包

不過今時唔同往日了，而家街市嘅墨魚膠雖然冇起價都係賣廿幾蚊

但就好似俾縮小電筒照過咁得返丁丁咁多多，所以黎到三記都要叫黎滿足下老爸大人嘅

 

 

第四味就係砂鍋魚頭，係老媽子至愛

由於我冇乜食過，所以俾唔到評語

不過食左墊底嘅燒肉同生菜，味道都ＯＫ嘅

 

 

 

 

最後呢味，係果日心血來潮想食嘅生炒骨

正常水準，排骨係即炸，味道合格，沒有失望但亦沒有令人回味萬分

 

 

 

 

今次我地黎到三記已經係９點左右，睇黎好似過左黃金時間，所以唔駛搵位都有好多吉台
（平時三記好爆棚架，星期六日更加插針都插唔入）

 

同埋，唔係黃金時間有個好處，係廚房整野好似好Ｄ，可能冇咁多單迫住，炒碟餸都有多Ｄ時間掛 :)

 

最後，當然要俾埋份Menu大家參考下啦！以打冷小菜黎講，我覺得絕對唔算貴了！