1月24日
補祝小雲生日飯，大隻佬太太提議咗間貴嘢 – 水月，呢間餐廳做私房菜，因為座位有限，加上要預備食材，所以一confirm訂位，就要先俾一半deposit，如果到時no show，都要全數付帳。其實我唔太贊成去呢到食，畢竟我哋之前啲gathering，總有人臨時有事嚟唔到，所以咁快俾錢，都幾risky。因為咁，我提議只訂5個位，到當日冇人話唔嚟，先多加一個，而我，就係呢個後備。結果，今日大家都ok，我亦喺晏晝打電話去加埋自己入去。
餐廳位置對我呢個對銅鑼灣唔太熟路嘅人嚟講，都幾難搵……我行行吓got lost，要打俾小雲求救。
大家到齊，就叫餐廳上菜。餐廳人手唔多，不過呢到座位數目都唔多，所以人手都叫夠用，只係……我哋要求咗多次加水，waiter都遲遲未俾到我哋，原來佢哋煲緊……但啲水都滾得好慢吓……而且，每次佢哋只係加少少水，我哋好快又飲哂，又要再三催四請先搵到人加水，呢方面嘅服務真係有待改善。
餐廳每上一道菜，都有個waitress嚟講解，呢點都唔錯。
蕃茄啫喱‧話梅蕃茄配日本冰菜‧蠔葉﹕賣相精緻，但味道一般……用嘅食材都唔係咩貴嘢，說穿了都只係蕃茄同菜……當然，你可以話呢道菜係食廚師嘅功夫，但……我寧願有啲實在啲嘅嘢食。
由淡味嘅開始食起……
蕃茄啫喱﹕如waitress所說，蕃茄去皮，一咬即穿，但食到肚，都只係蕃茄一粒，味道冇特別。
話梅蕃茄﹕食唔到話梅味……
日本冰菜﹕冇味……
蠔葉﹕依附蠔而生嘅葉，的確有蠔味，但如果係食蠔，我會更開心。旁為岩鹽打起的泡。
鹽燒新鮮雪場蟹腳配紅菜頭粉‧低溫烘焗BB蒜芯乾‧海苔粉爆谷
鹽燒新鮮鱈場蟹腳配紅菜頭粉﹕拆肉鱈場蟹啱哂我呢啲唔識自己拆殼嘅人食，但係，食完之後，一啲都唔覺得佢「鮮」……個紅菜頭粉好甜，雖然我一向唔太好紅菜頭，但都覺得個粉好味。
低溫烘焗BB蒜芯乾﹕好似食薯條咁，但除咗脆，食唔出其他味……
海苔粉爆谷﹕奇怪嘅配搭，又唔係特別好食……
龍吐珠﹕用龍眼包住蟹籽，再釀入蝦膠內炸成，因為內有水果，所以整道菜式口感並不油膩，味道唔錯，但唔特別。嘗試點些少沙律醬伴吃，卻應覺有我唔食嘅芥辣……
南瓜鱈場蟹鉗蛋白羹﹕又係拆肉鱈場蟹，又係食唔出鮮味……waitress話面層係南瓜湯，底層係蛋白，讓食客有兩種口感，呢個idea係幾唔錯嘅，如果整得好食嘅話……南瓜湯味道唔夠濃，蛋白又唔夠滑……成碗都唔知飲咗啲咩落肚……
麻籽烤威爾斯羊架﹕友人之選，我只試咗一小件，食唔到羊味，但條脷就麻咗好一陣子……唔好麻辣嘅人勿試！喜歡辣嘅人可能會鍾意嘅，友人都食得幾滋味，但始終覺得一道好嘅菜式，調味應該只作輔助之用，而唔係蓋過食物本身嘅味道。
北海道黑毛豬配八珍山渣汁﹕需加$40而轉，份量十足！唔止面積大，厚道亦好夠！廚師將扒煎至七、八成熟，有助保留其鮮嫰肉質，豬肉豐腴多汁，豬味甚濃，讚！雖然豬肉嘅脂肪部份唔多，但唔知點解食到一半時，感覺油膩……最後，我將剩下嘅四分一分給友人們共享。
香煎北海道帶子配蜜糖豉油汁﹕大隻佬太太之選，冇試過，不便給予評價。
香芒糖波‧朱古力泥
香芒糖波﹕糖皮好甜，唔係我杯茶……入面嘅泡泡餡料好唔實在……
朱古力泥﹕味道唔錯
水月朱古力牌﹕餐廳特別訂製其名嘅印，用以印上朱古力上。朱古力味道一般，無甚特別。
芒果熱情果味﹕食到滯時，揀番啲酸味味嘅嘢，開一開個胃。呢道菜其實只有賣相特別，味道好一般……
栗子味﹕只試咗一啖，唔太sure個味，友人話栗子味好濃，但越食越滯……
黑松露焦糖燉蛋﹕Dancing teacher激讚好食，我卻覺得鹹味甜品好奇怪……而且，啲蛋都唔滑嘅……
Tea﹕Ginger & Peach, 味香而淡。
六個女人咩都傾，講吓工作、愛情、家人、生育大計，就連body check都傾，不過……佢哋有時都講得幾露骨，就算有waiter喺隔離都唔理，搞到我都有少少尷尬……CFO永遠都係我哋嘅中心人物，有佢喺到，唔愁冇話題，佢真係又talkative又搞笑。呢餐雖然都幾貴，嘢食就唔係好架喇，但同埋大學同學聚吓，都食得幾開心。
埋單每人$714，五人請一人。
離開餐廳時，個肚有少少唔舒服，後尾冇事，以為係自己多疑，點知……地鐵一到站，就feel到個肚係唔妥，即時飛奔番屋企。結果，當晚去咗兩次洗手間，第一次stay咗喺洗手間好耐，起碼去咗3次！半夜三點幾，肚痛痛醒，再戰兩次……今朝又多兩次……俾咗咁多錢食好嘢，結果係痾到人都癲……但今晚仲有奶奶餐團年飯……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
