嘉樂冰廳

大廈又再於今晚停電加制水，幫大妹喺台灣買番嚟嘅燻雞同醬肘子，因為我之前病，遲遲未交到佢手，今日不得不約佢出嚟交俾佢 (但哥哥幫我拎番嚟嘅鴨舌，我就叫佢唔好俾我住，哈哈！)。

出開荃灣，大妹就同埋我倆一齊食嘢，兩點鬆啲到達「嘉樂冰廳」，等到三點先入坐……我都唔明點解自己今次會咁堅持。

等咗差唔多半個鐘時影，當時前面仲有好多人……

三點時，終於到我哋排頭位，但當個staff開門，我同大妹做出三位嘅手勢時，對方卻說暫時只有兩個位，叫我倆先入座，著拾爺喺出面等……可憐拾爺被拒諸門外，即時嬲到塊面黑哂。如果唔係我哋同大妹一齊食嘢，佢真係會唔俾我入去，甚至拉我走。

同大妹入去坐低揀嘢食，等到對面對情侶埋單，我即刻出面拉拾爺入嚟坐。三個人叫咗﹕

酥炸鮮蝦雲吞 ($32)﹕一碟十粒，大妹讚足料，其實都係包咗粒蝦咁大把，唔覺有咩咁足料……個皮係炸得幾脆，但油益味好重，一食就覺得餐廳用萬年油嚟炸佢……

火腿小奄列 ($28 x 2)﹕三個人叫咗兩個奄列，大妹本來諗住奄列難分，自己食一個，但份量實在太大，加上啲蛋汁有啲油，食到佢好滯，最後我幫佢清，拾爺就幫我清我哋share嗰碟，所以都係三個人share兩碟。呢個係呢到嘅招牌菜，我覺得佢除咗好大份之外，就冇嘢可取。份量大，但其實價錢已經喺番到，所以根本冇特別，更加唔值得排咁耐去試！個奄列整得一啲都唔滑，有一大部份係一睇就知煎得嚡添！最搞笑係，我食到咖哩味……佢應該係用整完咖哩牛腩個鑊嚟整個奄列。

豉油王雞翼 ($32)﹕一碟6隻，用嘅雞翼好肥美，唔愛食得肥膩嘅拾爺食咗一隻就投降。我對於肥美嘅雞翼絕對接受，但呢個雞翼名叫豉油王，實情卻用花椒八角嚟整，我覺得佢似滷水多啲！同埋，一啖咬落去，極多油標出嚟……我唔怕肥，但我怕油……大妹話佢附送碟酸辣汁，係自己都知整嘅嘢好滯……

柯華田奶昔 ($25 x 2)﹕名為奶昔，其實係沙冰，無甚特別。

埋單$170，都幾貴！想唔到等咗成個鐘，最後又食番成個鐘。唔係我哋覺得唔抵要食番咁耐，而係呢到上菜好慢……每樣嘢都係逐樣上，我哋等炸雲吞嚟先叫嘢飲，估唔到最後食哂啲嘢，嘢飲都未到……店員話嘢飲要一杯杯打，所以要等等，問題係，餐廳面積好細，其實都唔係好多客 (雖然坐滿)，整杯嘢飲根本唔需要咁耐，我覺得呢到廚房只有一人，佢跟收單次數，張單要整嘢食，佢就整嘢食，到嘢飲，佢先再去整，有別於一般水吧同廚房分開嘅餐廳，所以嘢飲都要有排等……入到嚟，睇到餐廳啲人做事方式，明白點解要等咁耐，嘢食上得慢，店員又唔會催客走，佢哋知我哋差嘢飲，仲話張單冇漏，慢慢坐多陣等吓……茶餐廳一般都係想食客快快食完做下一單生意，但呢到好明顯唔係囉。只係……餐廳唔趕客又點﹖呢到都坐得唔舒服，我只想快快食完走人！加上我哋個位喺冷氣口，一路食嘢就一路食風，凍到呢！最慘係杯凍飲最後嚟，冇嘢食送，齋飲沙冰，拾爺同我大妹都叫哂救命呀！(我飲得少，因為我未好番哂，拾爺唔俾我飲太多，加上我腸胃一向唔好，飲沙冰會搞肚，所以自己都唔敢飲太多。)

間舖真係好細……

總結﹕試一次便夠！但唔值得去排！

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================