海景軒

又到做孝女時間！約咗爸媽飲茶，今次去我哋上次試唔到嘅海景軒，媽媽揀嘅！本來打算三人行，因為拾爺學校距離較遠，而且佢比我遲放，點知佢話join到我哋要一齊去，既然大老闆要爭住埋單，我呢啲小員工點會say no﹖

同爸媽十二點八到到達，去到同reception講想加多一位，唔駛轉枱，但其實我唔太鍾意張枱嘅位置，waitress只offer我轉另一張仲衰嘅……話其他都被reserved……鬼係！我哋最後坐到佢哋落場，成個場一啲都唔full，不知幾多吉枱，仲要唔係只吉大枱，咩size嘅枱都有吉！

餐廳環境

坐低後，只叫咗壺鐵觀音。

鐵觀音 ($20位)﹕我同爸爸都覺得呢到嘅鐵觀音唔及「香宮」嘅香，飲咗幾轉後，茶味越嚟越淡……爸爸忍唔住要叫waiter加多啲茶葉。

開茶後，waiter送上餐前小食。

餐前小食﹕賣相精緻！但當我一挾中間嘅魚仔時，卻發現內有頭髮！我即時叫來一位waiter，對方一見到頭髮，即時收番碟嘢，仲話會同經理講，等佢處理。

之後，waitress突然送湯上嚟，打開見到又花膠又花菇，正奇怪湯水係每枱必有，定係餐廳對我哋發現頭髮嘅補償。心諗一碗咁靚嘅湯，餐廳唔知打算收幾多錢。Waitress為媽媽上湯時，爸爸忍唔住問﹕「咦，我哋都未叫嘢食，點解會有湯嘅﹖」Waitress恍然自己送錯湯，急忙道歉，拎湯走人。我忍唔住吐出一句﹕「我以為餐廳送嘅添！」

隔咗一陣，經理走嚟補回餐前小食，但只得兩款。經理同我講廚房唔知點解會飛咗條頭髮入去堆魚仔到，但佢哋已經倒哂所有魚仔，餐廳會再整過，著我耐心等候，一陣送上。並且為著頭先嘅失誤，飯後會送我哋甜品同水果。Yeah~~~我當然照單全收啦，反正我又冇食到頭髮，好彩嘅係，我一挾就挾中，如果食食吓先發現就弊喇。

餐前小食﹕其實我唔知呢幾碟嘢要唔要錢，餐廳最後冇收錢，唔知係因為佢本來就係免費，定係因為佢哋之前附送頭髮，所以唔敢再收錢。我冇試到豆板醬，但個豆腐干就不怎麼樣喇。但碟魚仔幾好味，對我嚟講辣咗啲，但就好惹味。

拾爺唔想我哋餓住等，著我哋先叫啲點心。第一輪我哋點咗﹕

韮黃鮮蝦腸粉 ($58)﹕啲蝦好大粒，食落都爽口，但腸粉皮唔夠薄同滑……

脆皮牛肉腸粉 ($48)﹕腸粉皮唔夠滑，所謂嘅「脆皮」亦只係內有脆脆……牛肉嘅牛味唔夠，食過「香宮」嘅牛腸，呢到呢碟即時被比下去。

兩樣點心上枱一陣，拾爺就趕到，趕得切試食呢兩樣點心。拾爺一到，我就點埋﹕

黑菌小籠包 ($88)﹕本來一籠3件，收$66，但waiter見我哋有四個人，就話可以多加一件，鍾意呢到咁flexible。小籠包都幾多湯汁，餡料亦食到淡淡嘅菌味，唔算突出，但都ok。

瑪瑙牛筋片 ($78)﹕牛筋片本身冇味，我只食到淋面嘅麻油味……

海景蝦餃皇 ($52)﹕內有大大粒蝦，但冇筍……蝦餃皮整得唔錯，薄得嚟晶瑩，食落韌而不濕。難得媽媽讚好味，但我覺得啲蝦有啲腥……

青翠白玉蔬 ($68)﹕點俾爸爸嘅得獎菜，賣相一流，味道嘛……我冇食到，但爸爸讚好。

當紅脆皮雞 ($218, 半隻)﹕脆皮雞果然名不虛傳！雞皮被炸得像紙一般的薄，一口咬下，聽到清脆一聲！雞隻本身雞味就唔係好夠，所以呢道菜係食皮而非食肉之選。

生果盤 (Free)﹕賣相唔討好，但其實蜜瓜同哈蜜瓜都好夠甜，係西瓜差啲囉。

糖水三選一，爸爸揀咗綠豆沙，但我唔記得影相……爸爸話味道唔錯！我、拾爺同媽媽就要咗南瓜薏米露，話說waiter走嚟問我哋食咩糖水時，我去咗洗手間，拾爺就幫我要咗呢個糖水。我番嚟後，媽媽本想由我再confirm個waiter要咩糖水，但拾爺好肯定咁話三揀一，紅豆沙同綠豆沙我都唔食，所以幫我要咗南瓜薏米露。嗰一刻突然覺得好sweet好幸福，因為拾爺喺我爸媽面前表現出對我嘅了解，我覺得爸媽會更覺得我嫁對了人呢！哈哈！(其實拾爺會陪我同爸媽一齊食好嘢，爸媽都知佢對我好架喇。) 另外，我真係好唔鍾意食一粒粒豆嘅嘢架，哈哈！拾爺話我唔識食……佢自己咪又食唔食海參、花膠啲貴嘢，鍾意食乜呢啲好個人嘅，冇話識唔識食！

南瓜薏米露 (Free)﹕好香濃嘅南瓜，碗嘢一上枱，陣陣南瓜香撲鼻而來，南瓜控必點！Buy佢冇咩點落糖，甜度剛好，正！

泮塘山楂卷 (Free)﹕我一向唔鍾意食山楂，飲親中藥都係要加應子，但呢個泮塘山楂卷真係好味！甜甜酸酸好開胃！不過，如果餐廳加少啲糖會仲好。

埋單$667.5 (HSBC、Hang Sang Bank、AE 同 Citi Bank 嘅credit card都有85折，唔駛白金卡。)，非常抵食！爸爸、媽媽同我都覺得超飽，拾爺就話剛好。

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================