美中‧鴨子

難得拾爺放學後唔駛開會，可以陪我食lunch，兩人各自捧住厚重嘅試卷拍拖去！

拾爺一直係KC嘅die hard fans，見佢早前盛讚「美中‧鴨子」，於是就揀咗呢到食lunch。

去到店舖，講低人數，先拎飛，再等餐廳安排位置。

餐廳裝修雅緻

等咗幾分鐘，終於有人帶我哋去坐。行入餐廳，發覺有好多吉位，唔明點解要我哋等幾分鐘先帶我哋入去……

喺某通道位坐下，我哋獲安排四人枱，位置夠我哋勉強望到海景。

餐具以鴨為主題

睇完menu，就點餐。幫我哋點餐嘅，係一位大叔。環觀呢到啲waiter同waitress，有唔少係上咗年紀嘅，佢哋嘅制服都好causal，只係T-shirt一件，感覺好唔pro……

點完餐，我問waiter可唔可以喺卡位有人埋單後，安排我哋調去坐，個waiter諗都唔諗就拒絕咗，話卡位個area一陣就會close。唔知點解，佢嘅reply令我好反感，直覺佢根本就係講緊大話！而且，佢回應個態度好差，好似唔憂做你生意咁！對於佢個response，我都幾愕然。以呢到嘅收費，我難以想像佢提供嘅服務會差到咁！

等咗都幾耐，餐廳先上我哋點嘅半份烤北京填鴨嘅鴨湯。

鴨湯﹕味道一般，飲唔到好鴨嘅味道，但勝在唔會好鹹好味精。

飲緊湯時，見到waiter帶住幾個外國人入去坐頭先個waiter口中會close嘅area用餐，我更加肯定頭先個waiter hea我！

適逢一枱卡位客食完走人，我見waiter們將啲枱分開，剛好有一二人位置，於是再問另一個waiter可唔可以同我調位，waiter話要問問出面，番嚟時就話唔得，餐廳要隨時安排一大班人入嚟食喎。吓﹖當時已經過咗兩點，唔再係食lunch高峰期，出面根本就冇客等緊，而且餐廳仲有好多大大小小吉位，絕對應付到一大班客。加上佢嘅擺位，原意就係俾兩位用嘅，但就偏偏唔肯俾我調。我肯定自己食完，張枱都唔會有人坐呀！老老實實，我去Spaghetti House，人家收費平得多，都肯幫人調位，我唔明呢到點解會咁串囉！

等多一陣，餐廳就送上另一道菜﹕

桂花糕凍伴鴨件 ($80)﹕一碟四件，賣相精緻。面層薄薄一塊鴨皮，師傅早已除去油脂部份，讓食客咬下時，只感脆，不感膩，而且藉由鴨皮帶出淡淡鴨的油香。鴨皮下先係沙律醬，再到青瓜同桂花糕，減低整件食品嘅油膩感。可惜，底層配以嘅薯片，及碟底嘅沙律醬，將整件食品嘅味道蓋去，我完全食唔到塊鴨皮嘅油香，亦食唔出桂花糕嘅清香……雖然賣相精緻，卻屬失敗之作。

土鴨蛋脆煎蚵仔 ($108)﹕拾爺話KC篇食評表示用鴨蛋煎嘅蚵仔較用雞蛋嘅為香，可惜我倆嘅舌頭都唔夠敏感，食唔出個分別來……呢道菜賣相比menu所影嘅遜色得多，一睇已令人失望……味道，亦只屬一般……

烤北京填鴨 [二食] 片皮及鴨湯 ($150，半隻)﹕皮、肉分開的北京填鴨，師傅甚至連中間的油脂也給抽起，算是食得健康。皮，微脆，肉，尚可，只是份量較少，鴨香有欠，甚平平無其之作。反而用嚟包鴨皮及鴨肉嘅麵粉皮因為加入芝麻而變得好香口，值得欣賞。

埋單$371.8，水都冇杯，要茶就$25一位，我哋冇點到，因為香宮都係呢個價錢，我唔認為呢到啲茶會好得過香宮，加上呢到嘅service，令我唔想喺點菜後再多花一分一毫！我寧願食完喺出面買嘢飲！總括，呢到食物水準一般，service唔ok，唔止係因為佢哋唔俾我轉枱(結果我哋食完，我想要轉嘅枱都冇人坐過，而佢哋話要close嘅area都冇close到！)，而係佢哋上菜嘅態度同水勢都好唔ok，有waitress係掟嘢上枱咁滯，勁唔得！我一定唔會再嚟幫襯！

後記﹕夜晚拾爺陪我一齊上KC嘅飯局制作公司拎利苑coupon時，同KC講番對呢間餐廳嘅感覺，大家暢談咗好一會兒，KC話餐廳始終新開，加上香港主打烤鴨嘅餐廳買少見少，「美中‧鴨子」收費相宜，應該予以機會。KC果然係有錢人，對佢嚟講收費相宜嘅餐廳，對我同拾爺嚟講已經係中上之選了……

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================