江南美廚

探完爸爸後，一家人去咗九龍城開餐！爸爸之前讚過「江南美廚」啲嘢好食，話仲好食過「合江小鎮」，我同拾爺當然要睇吓係咪真係咁好啦！

餐廳環境唔錯，我哋九個大人加一個BB獲安排喺玻璃房內用餐，坐得幾舒服！只係……洗手間太少廁格……

唔記得影餐前小食，九個人，有三小碟前菜(每碟$10)，其中兩碟係花生，一碟係菜莆。我一向鍾意食菜莆，呢碟醃得唔錯，唔怕太鹹，我都食咗唔少，如果將其餘兩碟花生換埋做菜莆就好喇，嘻。

叫咗以下嘅嘢﹕

砂窩雲吞雞 ($108/半隻)﹕掛住同小王子玩，只記得影雞，唔記得影碗湯添……碗湯味道普通，飲唔到咩雞味，雲吞亦唔見得好滑……食過合江小鎮嘅雲吞，更覺其他地方做嘅只係一般水準……

花彫醉雞 ($50)﹕酒味頗重，但又唔會覺得好苦，算係唔錯，但食過翔龍嘅醉雞後，呢到又被比下去了……因為人家無論酒味定雞隻嘅嫩滑度都較佳。

雞絲粉皮 ($48)﹕味道ok，其實呢道菜好難整得難食。

鎮江肴肉 ($48)﹕一睇賣相已經扣哂分，啫喱部份完全唔得晶瑩剔透，食落感覺好實……

蒜泥白肉 ($48)﹕睇落去好似好多咁，其實下層鋪滿粉皮。至於味道，只屬普通。

南翔小籠包 ($28)﹕叫咗兩籠，味道一般，我那一件唔知點解一早已經被刺穿，所以冇乜湯汁可言……但只談餡肉，呢到絕對比唔上合江小鎮。其實，好多地方嘅小籠包都做得唔及合江小鎮。

擔擔麵 ($30)﹕叫咗一碗唔辣同一碗中辣，唔太食得辣嘅我，完全唔敢掂中辣嗰碗，只食唔辣。呢碗擔擔麵係我食過最難食嘅！首先，我唔知正宗擔擔麵應該係點，但我未食過咁粗嘅擔擔麵，我真係忍唔住要對嘅正宗式存疑。其次，啲麵煮得好鬼淋，淋到有啲過份，加上啲麵又粗，好似食緊一pat嘢落肚咁……就連個湯底都好一般，呢碗嘢收成$30，絕對唔值！

蒸銀絲卷 ($18)﹕叫俾小王子食嘅，我冇食過，不予置評喇。

上海粗炒 ($62)﹕冇食到，所以又係不予置評喇。

茄汁蝦仁鍋巴 (其實唔太記得個名，更加唔知價……)﹕鍋巴整得好脆，我細佬好鍾意食，我就因為個人口味，唔太喜歡佢炸到萬年油味都食到咁滯……至於個sauce，sorry，唔係我杯茶，我唔覺得好食……

樟茶鴨 ($98/半隻)﹕爸爸激讚嘅一道菜，的確呢到嘅樟茶鴨唔會好似其他餐廳咁整到乾哂柴，鴨肉juicy之餘，又唔會又淋又霉，有咬口得嚟又不會韌，口感一流！只係……作為樟茶鴨，佢嘅茶味卻嚴重不足！唔好提食落冇茶味，反正好多餐廳都係聞到食唔到，呢到就慘到連聞都唔太聞到茶味……嚴格嚟講，佢都唔太算係樟茶鴨喎！

雲腿扒津白 ($78)﹕Menu明明影咗八塊厚切雲腿，但上枱只有三小塊，仲要係薄切……味道就正常啦！

上海菜飯 ($20)﹕叫咗四碗，雖然多油到咩咁，但我都食哂成碗，冇辦法，我一向愛吃菜飯。

豆沙鍋餅 ($30)﹕我同拾爺都好唔buy佢個皮！又煎又炸後，唔脆之餘，仲要又厚又硬……

高力豆沙香蕉 ($32)﹕味道唔錯，好夠熱，又唔會太甜。

小心流沙包 ($24)﹕果然好流，但唔係流沙，係流水……睇相以為好足料，其實麵包皮好厚，咁都算，講明係流沙，但食落好水囉……唔夠「傑」，唔夠沙喎……><

埋單$1153，我同拾爺都唔明點解爸爸上次食完激讚，話呢到啲嘢食好過合江小鎮，論環境，論服務，論食物質素，論性價比，點都係後者勝。

P.S.   一去到餐廳，我已經嘈住要同小王子坐，因為我太耐冇見佢喇！聽佢哋講，小王子星期三晚表演過「飛吻」俾佢哋睇，仲要扭緊計時叫佢飛吻，佢會即刻唔扭，飛咗吻先，再繼續扭計，好好笑。但個衰仔今日唔飛吻囉……叫極都唔郁，係好後期先飛一次咁大把……我哋間房個ceiling有塊鏡，會睇到轉盤上嘅食物，我叫小王子向上望，佢見到啲嘢轉，好開心，手仔轉圈，把口就呼呼聲，想要話俾我哋知上面有嘢轉，因為佢唔識講嘢，所以只能夠呼，好鬼得意。

P.P.S. 小王子仍然好為食，我呢頭俾條粉皮佢揸喺手食，佢嗰頭就拍我隻手想再要……但明明佢手上嘅粉皮未食哂……

P.P.P.S.  小王子而家已經行得好穩陣喇！仲因為行得太穩，唔俾人抱……不過，行到攰時，就扭計要抱……食完飯後，哥哥叫我哋一齊行，睇吓小王子會唔會死跟，其實小王 子當時已經攰到唔想行，但見到自己爸爸越行越遠，唯有死跟，哥哥貪玩，越行越快，搞到個仔一路跟住行，一路喊……好殘忍，但好好笑，哈哈。

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================