文鼎壹號

多得議員太太介紹，早於上月網上登記免費得到Fine Art Asia 2013嘅入場券兩張，與拾爺今日去會展睇展覽，不過……網上介紹明明話有Monet等印象派畫家嘅名畫展出，去到我卻只見到一幅Edgar Degas，失望……原以為要花至少兩個鐘去行，結果一個鐘以內行完！同拾爺搭船到尖咀，喺大大樂食咗個tea，再慢慢行去九龍公園。

是晚同家人食飯，媽媽提議一家人去九龍公園影全家幅，但因為小王子懶瞓，五點都未起身，令各人故意遲到！(佢哋知道哥哥會遲，就特登遲啲先到……)可憐我同拾爺準時到達，只有呆等……

哥哥佢哋差唔多六點先到，其時天色漸沉，我哋快快搵個地方影咗幾張合照就算。

影完相，見時間都差唔多，大伙就浩浩蕩蕩咁行去Isquare，今晚去「文鼎壹號」開餐！

去到餐廳，講低姓名，waiter就帶我哋行入房間入面最盡頭嘅位置。今次我又係喺Openrice到訂枱，亦寫明唔要坐通道位，所以對今次坐位安排都好滿意。

坐低後，當然又係由媽媽發板點菜，由於媽媽點嘅都係我想要嘅招牌，所以後補菜式我只要求咗三樣。點菜時，waiter表示我哋要得太少，怕我哋唔夠食，我已經叫佢先落咗訂，會再後補，佢又當聽唔到……哥哥又怕煩，應waiter要求多要隻鴨……結果，我哋根本食唔哂啲嘢……最後要嘅嗰隻鴨仲要唔好食！所以嘛，點菜係唔需要一次過叫哂，亦唔好急！如果唔係，就嘥錢喇！

前菜 ($12份)﹕我唔食酸橋頭，所以不能置評。但幾鍾意食啲花生，應該係海苔味，甜甜哋，幾得意，哥哥都讚好味！枝豆就浸咗酒，所以我唔係食咗好多，但叫幾特別，出面好少食到(for me only，可能係我大鄉里)用酒浸嘅。

金陵鹽水鴨 ($78)﹕味道上冇乜特別，但餐廳應該起咗骨，我只食到少少脆骨，基本上唔駛吐骨，啱懶鬼去食。

家鄉烤菜 ($48)﹕唔熱嘅烤菜被扣哂分！味道亦只屬一般。

苔香脆香九肚魚 ($16件，3件起)﹕同menu張相相差好遠……睇到上枱個樣已經令人食慾大減！食落去，我亦只食到個炸醬，冇咩魚嘅成份……性價比極低！

文鼎十八斬 (此菜不在menu內，最後俾錢又唔係我check單，實在唔記得幾多錢，只知大概要三百幾蚊。)﹕此菜又名活蟹十八斬，故名思義就係食生蟹，餐廳選用每日從寧波新鮮運到嘅東海野生紅膏白蟹，將蟹斬成十八件，用花雕、陳醋及啤酒等調味料釀成嘅醬汁浸泡一星期，上枱前再淋上秘製的十八斬汁。不得不讚此蟹個蟹膏，真係如都市日報個報導所講，顏色係天然嘅橘紅潤澤，味道則豐腴甘甜。至於蟹肉，吃下第一件時可能解凍未足，食落去似食霜雪，隔一陣再食，先食到蟹肉嘅texture，但我卻食唔到蟹鮮。至於個十八斬汁，味道酸酸辣辣，非常開胃。此菜值得一試，但試過就算，始終價錢唔太吸引。

金牌扣肉 ($198)﹕不得不佩服大廚嘅刀功，將扣肉變成一座三角塔，梅菜則收納其中。不過，此菜非常唔健康，肥膏嘅佔有率其高，對於一向愛吃肥膏嘅我嚟講當然冇問題，但對於其他不太接受肥膏嘅人嚟講，此菜可能會重口味咗少少。另外，扣肉嘅瘦肉部份亦嫌嚡口咗啲，有待改進。
有梅菜扣肉，當然要加個飯，叫咗兩碗白飯，埋單時先發現每碗收費$18，忍唔住問問有食到飯嘅人，啲米係咪特別香。

文鼎紅燒肉拼耙齒蘿卜 ($198)﹕紅燒肉同扣肉一樣，肥膏部份冇問題，但瘦肉則過嚡……不過，啲蘿白好好味！個個食完都讚入味，而且冇渣，讚！

文鼎糟香雞 ($288)﹕人生食過最大碟嘅醉雞！酒味唔算好濃，所以我都接受到，但這種有少少酒味卻又唔夠重嘅菜式唔係我杯茶……隻雞都幾大隻，只係肉質唔算好滑……最離譜係廚師冇小心清理雞毛……(參考下圖)

放大相片，可清楚見到圖左雞翼上嘅長長雞毛……有夠嘔心！

樟茶鴨 (價錢不詳)﹕呢隻鴨就係waiter建議我哋加嘅，哥哥就係心急就say咗yes，結果……大家睇吓個賣相，完全引唔起人食慾，聞落去好香嘅茶香味，但食落去乾柴柴咁，肉已經少，仲要乾哂塘咁嘅款，難食到呢！

陽春麵 (唔記得影低個menu，所以唔知價錢……)﹕原諒我大鄉里，我真係未食過辣嘅陽春麵……以我同拾爺食辣嘅能力，我只能淺嚐一口，之後就狂灌茶……但其他人就話唔太辣……就連爸爸都食得辣過我……順帶一提，呢個陽春麵遲遲唔上枱，我哋要催單先有……

東方之珠 ($198)﹕九點後先有得食嘅甜品，其實係大煎堆一個。本來以為我哋唔會食到九點，但因為嗰個遲嚟嘅陽春麵，加上大家慢慢食嘅關係，真係捱到九點。本來大家對大煎堆冇咩興趣，知道價錢要$198，更加意興闌珊……但一睇menu，得知此菜獲得第三屆中華餐飲美食節金獎同埋中國第四屆烹飪大賽金獎，又名金獎大麻球後，其size更如籃球般大，大家即時對佢產生興趣。其實此菜好花功夫，師傅要喺十五分鐘內不停搞動煎堆，先整到咁大個(仲大個我個頭！)煎堆。煎堆上枱，個個爭相影相，大家聽取拾爺建議，將自己個頭作陪襯，彰顯煎堆大過人頭嘅特式嚟影。最後，全家同個大煎堆嚟張大合照後，就將煎堆交由餐廳幫我哋切開再上。

煎堆剪開成一塊塊後，口感極其香脆，不過同時又好油……好彩餐廳係用橄欖油去炸，如果唔係真係好唔健康……但因為份量太多，我哋成十個人都食唔哂……呢個東方之珠嘅作用我覺得係用嚟cheer up大家多啲，$198呢個價錢係買開心同師傅嘅功架。

埋單$2042，用Citibank或Hang Seng Bank嘅credit card(其實應該仲有其他銀行信用卡都得架，但餐廳啲人自己都唔太清楚……)有九折，折後$1901，我哋十個人食，爸媽當然唔駛錢，除八後都係每人二百幾，以呢到嘅環境(海景)，咁嘅收費算平喇。

餐廳環境唔錯，食物質素則普通，真係睇你叫咗咩餸，但個management就有待改善。Waiter都有啲新手，成日都似好迷惘咁，training可能唔係咁夠，又冇人「磅」住佢……仲過份係有個manager級嘅，拎走我哋壺茶時，整瀉咗啲落我哋到，佢明知自己整到人(因為佢係發出咗聲響，佢係一定知架！)，但就道歉都冇句就走咗人，超冇禮貌！哥哥覺得成間餐廳人手不足，搞到waiters唔夠分，我哋每每都要出聲先有人加茶加水，有時佢哋拎走咗個壺就冇回頭……我哋要再問，佢哋先拎番番嚟……

P.S. 食飯期間，嫂嫂同小王子玩「點蟲蟲」，小王子一聽到嫂嫂講「點蟲蟲」就自己點吓手指仔，好得意！之後，我同佢玩「點蟲蟲 蟲蟲吱」，「吱」過佢一次後，我一講「點蟲蟲」，佢就笑定先，知我會「吱」佢。玩完「點蟲蟲」，我哋又玩「boom 吒」，小王子識得自己講個「boom」字時用口水肩遮臉，再「吒」一聲show番個樣出嚟，玩得好開心呢！好想錄影咗呢一幕，但趕唔切……

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================