今晚約咗我班E仔食飯。預咗有人遲到，結果真係囉！Book咗十二人枱，最後連埋我得九個……啲E仔呀！又話嚟，臨時又唔嚟！
六點半到達金船長餐廳，大家擾攘一輪先點菜。為咗獎勵佢哋之前census份工做得咁落力，咁撐我，我每人資助$50！(唔可以話請哂架！佢哋會食咗我隻車架！)佢哋聽到當然開心啦！(因為之前以為要自己俾架嘛！)於是，好努力咁計吓扣除五十蚊後可以揀啲咩食喇！
佢哋大部份都揀咗車仔意粉，即係好似車仔麵咁，自己揀食邊隻pasta，要咩汁同料咁，呢到好出名架！我就揀咗cheese burger。大家都加錢要是日餐湯同餐飲，我加多$10飲特色飲品。除咗一個E仔之外，我哋都加多$30食甜品。
先上是日餐湯，我揀咗洋蔥湯，一直以為洋蔥湯係紅湯，點知呢個係白湯……好彩味道都ok！
因為我為食，所以都有食咗人家一啖嘅車仔意粉！我試嘅係飲管粉，配上忌廉香草汁，味道都唔錯架！而且啲pasta全部都好香，又夠熱！下次可以試吓！
我個cheese burger都好正！先講配菜 — 薯條(又係食薯條……)，真係外脆內軟，喺香港都好難食到呢個水準！個burger又係一絕，先講個麵包，一口咬下，好香軟！唔怕硬柴柴！入面塊牛肉又唔 怕煎得乾，咬落去仲食到啲肉汁！佢哋仲會問我要幾成熟，好貼心嘅服務！
餐飲我要咗香蕉奶昔，味道好淡，基本上唔太飲到香蕉味……不過，佢應該落得幾多雪糕，因為杯嘢勁凍！可惜……雪糕嘅vanila味欠奉……
最後一道甜品 — 心太軟，雖然係呢間餐廳嘅推介，但我覺得唔好食……啲古古力醬係就係流哂出嚟，但個蛋糕太濕，師傅落得太多水喇！我鍾意蛋糕乾身得嚟有少少脆多啲！
埋單$1,150，津貼咗佢哋每人$50後，呢餐用咗我五百幾蚊啦！
八點交枱俾人，大家一齊搭車番屋企喇！有人問下次幾時再見，大家各有各忙，都真係唔知幾時再見lu……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
