坐底等咗一陣，打工達人打嚟話喺觀塘飛的過嚟，唉……精明眼就再隔咗一陣先出現。
等齊人後，就叫嘢食喇！我要咗三色定食($90)，因為之前宗教主任話呢到嘅海膽好鮮甜！打工達人要吉列豬扒飯($58)，精明眼就要秋刀魚定食($58)。
我個三色定食包一小碗飯同一小碗蕎麥麵。
個蕎麥麵上枱時好熱，我隔咗一陣先食。之前冇食過蕎麥麵，我唔知點先為之正宗同好味，只係呢碗絕對唔係我杯茶……我唔知蕎麥麵本身係咪就係咁「淋」身，但呢種毫無咬口，又食唔到麥味嘅麵，我唔會再主動點嚟食……而且跟麵嘅湯有啲鹹……
三色飯唔係我食開嘅三色，仲以為有我愛嘅牡丹蝦添……不過，初時聽到係三文魚籽都幾抗拒，仲主動話俾打工達人佢哋食，但打工達人怕腥唔要……點知……有驚喜！可能我之前食過嘅三文魚籽質素太低，我記得食過一次之後唔敢再食，因為好鹹好腥！但今次再食，完 全唔係呢回事，我唔會話好好食！但唔會再抗拒！食過呢間嘅三文魚籽，我會再俾機會呢樣食物！
海膽唔怕腥，但我唔覺得鮮甜，係咪我期望太高呢﹖又或者食唔食到好嘢真係好睇運氣。亦可能我同宗教主任嘅口味唔似……點都好，以$90嘅價錢，只有四小塊唔太特別嘅海膽，唔會再吸引我去叫。
最後嘅蔥吞拿魚，都係普普通通……我成日希望可以食到帶有魚味嘅蔥吞拿魚，係咪太大想頭﹖但……佢始終係魚，唔係應該要有番啲魚味架咩﹖點解我食親都唔覺有魚味嘅呢﹖
打工達人俾咗一小塊吉列豬扒過我食，只係食咗一小塊所以不便置評。至於精明眼個秋刀魚，我冇食到，只係見到佢不停挑骨，睇到都怕。食魚，我都係會揀番鯖魚！
打工達人加$10要咗杯咖啡，精明眼本來都有加錢要雪糕，不過冇貨……
三個人一路食一路傾，大家交換吓近況。打工達人現時嘅感情生活仍然空白，早前食咗舖炸糊，對佢打擊好大，大到佢自己都估唔到，佢話估唔到原來自己已經dry成咁……作為好友，我真係好希望佢可以幸福！其實佢由細到大條路都已經好崎嶇，希望佢將來嘅路可以平坦啲啦！
講開做家務，原來精明眼同佢老公會share嚟做！我提到屋企所有家務都係拾爺一手包辦，早幾日先俾舊同事串我﹕咩人嚟架妳﹖精明眼竟然咁樣回應﹕吓﹖熟悉妳嘅係唔會覺得奇怪架喎！嘩！咩意思呀﹖！
食完飯，三個人打算行陣街。拾爺呢個時候又出埋嚟，於是四個人行吓 K11，再行吓The One。拾爺就充當攝影師，幫我哋三個影吓相。行到K11 Oli個卡corner時，打工達人同精明眼都鼓勵我試吓賣手作卡，其實我唔係想賺大錢，反而如果有人真係肯出錢去買，即係有人好欣賞我嘅作品，我需要呢份 認同多啲！不過，自問手工拙劣，網上咁多人叻過我，幾時輪到我﹖！
行到咁上下，我問拾爺今晚嗰餐點，我提議去打邊爐，拾爺話冇所謂。呢段對話俾打工達人聽到，佢話又想打邊爐，於是我就提議一齊打！問埋精明眼，佢又冇所謂，仲叫埋個老公出嚟添！哈哈，我哋識咗咁耐，都未試過一齊打邊爐架，好開心呀！
由於精明眼老公喺屋企，所以佢負責去搵小肥牛或小肥羊位置，再打去book枱。我prefer小肥牛多啲，因為聽啲舊同事講到好好食咁。雖然灣仔店個分高啲，亦係精明眼地頭，但打工達人唔想過海，所以我哋去咗尖咀嘅小肥牛開餐。精明眼老公打去book位時，間餐廳話俾book嘅都full哂，我哋要六點去自己等位……
六點到到達小肥牛，去到都冇乜人，waitress帶咗我哋入間房，捧上調品料俾我哋自己落落豉油到！然後我哋就揀湯底同點嘢食。
第一round要咗個鴛鴦湯底 — 馬來沙嗲同豆腐清湯！再要一碟魚皮餃($32)、墨魚、牛同貢丸($38)、一碟齋貢丸($38)、栗米($22)、芝士牛丸($60)、本地手切肥牛($28)同兩碟特價安格斯牛肩頸($10 x 2)。
馬來沙嗲湯﹕好香沙嗲味，不過唔覺食物有索到個湯……
同豆腐清湯﹕冇試到……
魚皮餃﹕呢到嘅魚皮餃都幾大粒，不過好普通，平時媽媽喺街市買番嚟嘅靚過佢好多！
墨魚丸﹕好味！好墨魚！有啲彈牙！
牛丸﹕一般貨色……
貢丸﹕普通到不得了！都係嗰句，我亞媽買開嘅正佢好多！
栗米﹕怕麻煩，冇食到……
芝士牛丸﹕嘩！呢碟嘢簡直係呃錢架！啲芝士都唔溶嘅！唔講以為內藏豆腐咋！仲有，唔知點解佢哋要喺牛丸到混入陳皮粒，九唔搭八咁！
本地手切肥牛﹕唔好食……
特價安格斯牛肩頸﹕正！雖然因為特價，所以啲肥牛片又細又薄，但真係好有牛味，yummy！
坐咗冇耐，精明眼老公已經提議叫嘢飲， 不過我哋冇乜反應。然後……佢發現有特價啤酒，猛話好抵，仲同打工達人一唱一和，好明顯有人要R酒飲喇！不過，我同拾爺表明我哋唔飲酒嘅，所以唔使預我哋。隔咗一陣，有個啤酒女郎走嚟sell我哋，話有日本啤酒$12一大支，於是佢哋就叫咗一支喇。
第二round再嚟魚皮餃同墨魚丸，另外叫咗一碟澳洲極級雪花肥牛同油墨菜。
澳洲極級雪花肥牛﹕有啲「韌」……有啲所謂嘅雪花帶筋……牛味唔夠！特價品仲好味過佢！可惜，每兩人先可以叫一碟……
油墨菜﹕如果可以切細啲就好喇！
食到咁上下，啤酒女又嚟sell酒，話買多一支送多一支，精明眼老公即時嗌抵！然後，啤酒女話$20 3支！於是，佢哋三個酒鬼就叫多兩支，一人一支咁隊！
埋單位位$127，喺呢個凍冰冰嘅冬天，打個暖笠笠嘅邊爐，有好錫自己嘅老公陪伴，仲有好友陪住談天說地，係一件好幸福嘅事！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
