利久庵

Swimming Gala 之後，同咗班同事，一行九人打的去咗利久庵食飯。

九個女人九個SET，同姓人本來同我 一樣叫銀雪西京燒嘅，但佢聽完waitress介紹利久庵便當後，轉呔要咗呢個，九個set，一個係銀雪西京燒、一個係香蔥吞拿魚腩、一個要烏冬，其餘六 個都係利久庵便當。因為呢度嘅嘢食全都係即叫即做嘅，所以我哋等咗好耐先有得食，餓到我哋食物一到，一影完相就狂風掃落葉咁食嘢！就連平時比較細食嘅同 事，都食到九成呢！

講吓我個SET啦！成個定食包括以下食物﹕

前菜﹕我唔食嘅日本蘿蔔，因為冇食到，所以不予置評。

茄子﹕有少少辣，不過可以接受，味道一般。

卷物﹕無甚特別，紫菜唔夠脆。

沙律﹕酸酸辣辣好開胃！不過對同事嚟講唔叫辣嘅程度，已足以要我不斷飲茶……

蒸蛋﹕一打開個蓋就知啲蛋唔滑，全部都係皺皮嘅……

麵豉湯﹕好鹹……

主菜 — 銀雪魚西京燒﹕同之前一樣，條魚唔夠滑，今次仲有啲嚡添……如果想食滑嘅，AT Corner會係更好嘅選擇！不過呢到整嘅西京燒，個汁好好味！同埋師傅煎到啱啱好，出面好多餐廳(including AT Corner)都煎到好濃，但呢度就唔怕！

果物﹕開邊切粒橙，唔特別甜，亦唔怕酸，水份一般，不過食得好方便。

甜品﹕唔滑嘅芝麻雪糕一球是也！

個set加咗價，要成$128，加埋一就$141，老實講，呢個價錢可以去環境更好嘅餐廳食，所以我諗我會再嚟食嘅機會唔大喇。不過，一大班同事一齊食飯真係好開心架！

同場加映，其他set嘅相，為食嘅我當然亦有試少少啦！

右上係利久庵便當，右下係香蔥吞拿魚腩。我試咗利久庵便當嘅牛肉(左中)，唔好食！牛肉煎到又乾又嚡，加上個定食嚟時已經凍哂，唔夠熱，係一大死穴！譏員太太請我食咗件鰻魚豆腐，好普通……豆腐唔滑……至於香蔥吞拿魚腩我都試咗一啖，不過一啖真係試唔真，只係感覺好冰。