由 honeyhinbaby 於 2014-04-28 00:00:00 發表 | 累積瀏覽 347
今日嘅心情猶如坐過山車一樣……今日學識咗要小心網上嘅旅遊教路，多做資料搜集，睇多少少，唔好盡信一人之言，因為呢個世界原來真係會有人識少少扮代表，喺blog到寫到繪影繪聲，卻是極盡老點！我差啲因此白蝕三十幾歐呀！好彩，上天見憐，最後冇事咋！
話說噚日我根據「歪妹愛旅行」嘅網上教路，買咗由雅典去天空之城嘅火車飛。買完之後，卻發現網上好多人都表示回程誤點後，要由十點多，搞到成十一點先番到雅典。但……我根據「歪妹」嘅指示，買到嘅，卻係八點幾就番到雅典嘅火車飛……越諗越唔對路，加上「歪妹」話自己搭嘅係直達車，我跟住佢買嘅卻要轉車，於是就send個message去問佢啦。佢當時仲唔知自己老點咗我，仲話應該冇問題，但隨即佢表示自己當時係去火車站買火車飛，並唔係於網上買……睇到呢到，我真係有啲嬲！佢唔係喺網上買但又熱心教人網上訂飛唔緊要，請寫清楚同查清楚先！自己都不清不楚，真係會害死人！佢答完我之後，就update自己個website，話自己當時係親身去火車站買飛……我見到佢張火車飛嘅車站名同佢所講嘅係唔一樣架！佢喺個blog到教人輸入「Larissa」做起點，但佢自己張飛卻係寫住「Athens」。我上網再search吓有冇其他人去過天空之城，發現有台灣背包友都買過去天空之城嘅火車飛，人家係以「Athens」為超點架！之後，我嘗試搵吓有關「Larissa」嘅資料，原來希臘真係有個地方叫「Larissa」！呢個時候，我可以肯定自己買錯火車飛！「歪妹」知道自己老點咗我之後，只係同我講咗句「唔好意思」，好一句「唔好意思」，價值34歐！我欣賞佢嘅熱心幫忙，但我覺得滿腔熱誠彌補唔到能力不足！自己冇試過，冇十足把握，請唔好隨便教路，真係會害死人架！佢知道自己老點我後，急急再update自己個blog，但其實呢個既然唔係佢嘅親身經歷，佢自己又唔係旅遊達人，寫出嚟做咩﹖！人家話「好奇殺死貓」，我而家話「虛榮害死人」呀！
肯定自己買錯火車飛後，我根據希臘國鐵個website嘅contact information，send咗封email俾佢哋，以為以希臘人嘅做事方式，要一、兩日後先會收到reply，正愁自己要擔心幾日時，對方竟然喺一、兩個鐘後就覆我。我之前因為擔心要等兩日先收到reply，仲問同事意見，然後對方remind我可以問歐陸旅運嘅職員，我仲厚顏地send咗封email俾Gary添。估唔到，希臘國鐵覆得仲快過Gary。對方表示「Larissa」係另一個city，叫我send張火車飛俾佢睇，我send完個link俾佢後，又等多一、兩個鐘，佢就話我買錯哂。我表示自己係想由雅典去天空之城嘅，佢就叫我要打「Athens」。呢個時候，Gary都覆我email，講嘅亦係相同嘅說話。後悔一開始唔搵Gary買火車飛，又或者問清楚佢先買，胡亂錯信網上嘅教路……不幸中嘅大幸係，我張火車飛唔係特價票，由於我早買嘅關係，希臘國鐵嗰邊可以幫我做cancellation，再refund番全數嘅traveler’s voucher俾我。對方得到我confirm要cancel後，又係一、兩個鐘後，就覆我做咗cancellation，兼俾埋個traveler’s voucher嘅number我。
是晚，喺拾爺陪同下，一齊買過兩張火車飛，睇清楚地方名，加上我事前已經問清楚希臘國鐵嘅人有關火車個班次號數，終於買番啱嘅火車飛喇！好彩正確嘅火車飛銀碼大過我之前錯買嘅，扣除traveler’s voucher後要再補錢，如果係買錯嘅貴啲，多出嘅就要白蝕喇，因為traveler’s voucher有期限，要六個月內用完……就算冇期限，我唔認為自己會再去希臘架喇。
擔心咗成日，今晚有覺好瞓！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
