秋田日式鐵板燒

搭正零晨送上我親手整嘅生日卡俾拾爺，不過，呢張都係失敗之作……(我仲要整多幾多張失敗嘅，先會有成功嘅一張呢﹖！)一直以為係個scoring board嘅問題，原來係個trimmer出問題，當我拉行把尺時，佢cut出嚟嘅紙先唔啱size，所以我成日都scor唔到正中央，亦因為咁，我張卡 都網上嘅sample有所不同！

好白痴地，明明可以有兩個位放卡仔嘅，但我竟然黐實咗其中一個位……到我發現時已經恨錯難返……算啦，反正係我整嘅，拾爺都會愛不釋手！

雖然今日係拾爺壽辰，但佢依然落力做家務，一早就煮早餐俾我食。

跟住洗碗、洗衫、晾衫、拖地，兼煮埋晏晝，我呢個老公真係冇得頂呀！

當拾爺喺屋企努力做家務同出卷時，我就去咗Sogo做facial，個膠原蛋白係幾足 料，facial姐姐幫我敷上臉時，個感覺好正，出嚟效果真係好白滑！不過，只要用水洗吓臉，塊臉都會白啲架啦，所以我唔會因為咁而上當，要觀察吓，睇吓 佢個持久性架嘛。只有……我冇買呢樣，卻失手另一樣……話說我俾出去嘅facial錢可以用嚟換products，本來想換番我上次換過又覺得幾好用嘅 water massage，但俾個sales sell兩吓，我又忍唔住買咗佢哋皇牌骨膠原。其實待嫁時已經想試架喇，但又怕突然轉skin care會有反效果，所以冇買到。今次見佢有優惠，$2520七支藍色，送五支金色加三塊masks，仲可以扣番之前俾咗嘅$432，於是就豪一豪佢！問 過sales，嗰三塊masks根本就乜都冇，要自己浸骨膠原架！所以我改為要多一支金色。

另外，我喺家電部又買咗支卷髮器，因為之前上set頭班玩過，覺得幾得意，所以想喺屋企試吓。

之後去無印度吓啲櫃仔size，遲啲買嘢嘅分回贈入account時再嚟買。

番屋企後，即刻試用支卷髮器，不過，依而係論論盡盡……我仲白痴到想拎隻手指去試吓外圍係咪都熱，搞到整親自己，喺浴室大嗌，嚇到拾爺個心都跳埋出嚟。

六點就同拾爺一齊出門口去慶祝！差唔多七點先到尖咀，左搵加搵，幾經辛苦先搵到天文台圍8號！

聽達人成日激讚，於是今晚決定豪一豪佢，去咗秋田日式鐵板燒食dinner，慶祝拾爺生日。

坐底之後，侍應已經上咗個前菜，睇吓個menu，原來叫乜餐都包嘅，唔怪得啦。

個沙律酸味味，幾開胃！至於個芽菜就好辣(對我同拾爺兩個唔食得辣嘅人嚟講……)，其實仲有一碟枝豆，不過冇影相。

即時叫咗個熊本二人前($538 per head)，再加$208upgrade個和牛薄燒至澳洲頂級和牛厚燒。

落緊order時，多咗一pair情侶坐埋入嚟……仲以為可以兩個人mark一個師傅，結果要同人share，dislike！！！嗰pair情侶又叫熊本二人前，又upgrade個牛。

大家都order哂嘢後，師傅先煮我同拾爺嘅黑魚籽鵝肝蒸蛋。

用鐵板焗熟開咗口嘅蛋，再喺上面鋪上黑魚子。師傅乜調味料都冇落，所以隻蛋冇乜味……但我唔明，點解連蛋味都可以冇﹖！

我哋食緊蛋時，師傅再煮埋俾另一pair情侶。然後，佢接過waitress遞俾佢嘅食材，就開始煮第二道菜 — 活伊勢龍蝦。

睇住師傅將兩隻仲好生猛嘅龍蝦放喺鐵 板上，用兩隻鑊鏟叉住隻龍蝦，直至佢唔多點郁為止，都咪話唔殘忍！隻龍蝦就算被批頭後，啲手腳仲不停郁呢！師傅將蝦頭嘅膏挖番出嚟煮蝦肉，不過就勁落調 味。結果，我同拾爺一食，就覺得太鹹！雖然隻龍蝦係新鮮燒嘅，但食落去唔覺得肉質新鮮，真係唔講仲以為係一早死咗嘅呢！而且拾爺仲覺得啲蝦膏有啲苦……我 就唔係好覺苦，但調味太重，反而食唔到原有嘅蝦膏味，嘥咗！

呢道菜唯一值得一讚嘅，應該係有放火表演睇！師傅淋啲酒上去，再點火，火光熊熊，好不利害！我唔識煮嘢食，所以真係唔知放到個火咁大係咪會有鑊氣啲，直覺覺得只係做個show俾我哋睇。

師傅放完火後，就拎起兩隻龍蝦頭俾waitress拎去煲湯，然後繼續燒我哋嘅原隻鮮活澳洲黑邊大鮑魚。我同拾爺不嬲都唔太好鮑魚，因為佢本身都冇味嘅，肉地又冇嚟特別，係得個韌字，不過今次呢隻唔怕韌，都算OK。只係有啲鹹啫……

食完鮑魚，師傅就開始煎我哋期待已久嘅鵝肝喇！見到一塊塊厚鵝肝放上鐵板上，真係好想快啲有得食！睇住師傅煎，但就越煎越耐，越耐越濃，我已經知道呢個鵝肝多士唔會好食……

師傅煎好啲鵝肝後，就鋪上塊多士上，再順序為我哋上碟，拾爺一早估到佢會將最熟嗰塊分俾我，所以上碟後，即同我交換。可惜，我嗰塊雖然外面唔濃，但裡面一樣係熟到透，完全做唔到溶喺口中嘅感覺，失望！反面塊多士搽咗garlic幾好食！

食緊鵝肝時，兩碗龍蝦麵豉湯都上埋喇，湯夠熱，亦好有龍蝦腥味，不過呢種煲法唔係我杯茶，我都係鍾意法式加cream多啲。

飲緊湯時，師傅先燒另一pair upgrade嘅牛，我唔知係邊款，不過佢哋隻牛放火後好有牛香，反而我同拾爺嘅就冇……唔通我揀錯咗﹖係咪應該揀隻再貴啲嘅呢﹖不過，師傅煮咝咁耐，都冇一樣菜係我滿意嘅，再揀貴啲都可能係嘥錢！

師傅燒完人哋嘅牛，就到我哋架喇。如我之前所講，我哋嘅牛就算放完火後都唔香，食落唔「淋」，冇乜牛味之餘，亦有啲乾，係肉汁流失嘅乾……咁都要加$208﹖早知食薄燒好過！記得上次去Saiko食嘅嗰塊和牛薄燒，一面熟，一面半熟，食到溶喺口，都不知幾正！

之前英語達人激讚呢度嘅牛好食，叫我一定要加錢食厚燒，結果，食咗咁耐，冇一道菜令我同拾爺滿意……食食吓啲牛，我已經冇乜食慾再堅持落去……到師傅炒飯時，我知道佢會整公仔同寫「生日快樂」俾拾爺，所以都拎定部相機，不停影相。

師傅整咗個「Hello Kitty」，可惜……像真度極低！就連「生日快樂」呢幾隻字都寫得核突過人！

師傅完成後，我叫拾爺同佢合照，拾爺唔知點樣可以合照時，師傅叫我哋走入去影，仲幫我哋楂機添。我哋影完，另一pair又影。之後，師傅問另一pair個女仔想佢整咩公仔，佢就話要麵包超人。點解人哋有得揀，我哋冇得揀﹖我想要KiKi & LaLa！！！

又為兩團飯影相，今次俾另一pair影先，之後再同拾爺合照。影完相，師傅就將兩個公仔炒埋一碟，再加啲配料。

唔知係咪日式炒飯就係要炒得乾身先叫正中，上次喺Saiko到食又係咁，今次又係咁，啲飯又乾又硬！唔好食……

食緊炒飯時，師傅就整炒野菜喇。呢碟冇乜特別。師傅呢個時候行開咗，話一陣會番嚟整甜品。然後，有個 waitress捧住兩杯蛋糕嚟問我哋邊個今日生日，於是，拾爺同另一位小姓都有蛋糕食喇！我以為呢度嘅生日安排只有炒飯表演，原來仲有蛋糕食，都幾好 喎！個蛋糕唔係特別好味，但對作為一間以日式鐵板燒作招來嘅餐廳嚟講，已經係相當唔錯喇。Waitress問我哋要咩味雪糕，問佢有咩味時，佢話有芝麻、 綠茶同朱古力，佢講有芝麻時，我同拾爺都以為係柚子，差啲話要食柚子味呢，哈哈！好彩個腦有即刻轉吓啫！最後，我哋同另一pair都有一杯芝麻一杯綠茶。 平時食開嘅綠茶味雪糕都係綿綿地嘅，但今次呢間反面係刨冰feel呢。

掛住叫拾爺拎住杯蛋糕影相，反面唔記得同杯蛋糕影咗相添，到記得時，已經食咗幾啖喇……師傅亦喺我哋食緊蛋糕時番嚟整甜品。見佢搞蛋漿，拾爺估佢整pancake，我就估佢整豆沙餅，果然被我估中！個餅底有少少脆，不過豆沙好甜……

餐飯由七點鬆啲食到九點半，埋單$1,412.4，好貴！最慘係，我哋兩個都唔覺得好食！絕對冇下次！