囍宴‧滋‧選

早幾日Modern Beauty打嚟話有免費facial送俾我，其實之前都試過架喇，又係做完之後狂sell你，不過，我對呢間嘢經已完全失望，所以一定唔會落搭！既然係咁，有免費嘢點解唔做呀﹖！

去到等咗一陣，先有人帶我入房，原來今日只係做眼仔，所以我扣埋飛仔做 個whole facial。本來想話襯住做facial嘅時間瞓吓覺，點知個facial姐姐好煩，做完一part就逼人照鏡睇效果。老實講，用水洗臉，洗完一吓塊臉 都會白啲啦，佢叫我即刻照，咁實係好咗架喎，但唔一定同佢部機有關囉。所以，我堅持乜都唔買，亦唔用優惠價去做，我只想快快做哂呢間嘢嘅facial treatment，同佢劃清界線！

做完facial，去Muji買咗個盒裝閃石同珠珠，之後就搭車去 Elements食飯。是晚約咗奶奶同姑仔為拾爺預祝生日，去咗「囍宴‧滋‧選」到食。呢間餐廳喺Openrice個評分超低，得嗰3.1分，睇到之後， 我同拾爺都冇興趣，不過佢個妹一早訂咗位，所以就當去試吓啦。

去到餐廳，見到個位置後，我同拾爺都想即走！間餐廳好細，細到我哋張枱放到好出，奶奶同姑仔坐咗入面，我同拾爺個位基本上唔喺餐廳入面，而係放咗喺商場公用範圍！我同拾爺最唔鍾意食緊嘢時，附近人來人往！而家個位仲要喺正 入口隔離，啲人嚟攞位定必企正隔離，真係食龍肉都冇味！

叫咗以下嘅嘢﹕

鎮江骨 — 啲肉都叫整得幾「淋」，但調味方面略嫌太酸。總括嚟講，唔係咩特別嘢，唔值賣成幾十蚊一碟！

口水雞 — 我同拾爺唔食辣，所以碟辣油另上，雞嘅份量少得可憐，醬汁有啲鹹……

魚湯泡飯 — 好細碗！材料少！啲湯都有啲魚味咁囉。

青瓜海哲 — 唔鍾意有芥辣味……

豉汁欖菜豆腐(唔係好記得個名……) — 拾爺唔鍾意啲欖菜太鹹，我就食慣，所以唔覺得有問題。啲豆腐片到好薄，但唔覺得好滑，又係唔值一食之選！

溫室蕃茄 — 又有我唔鍾意食嘅芥辣味……

桂花薰蛋 — 影到好靚，但turn out個look好唔得！而且完全食唔到有桂花味！呃錢之選！

招牌擔擔麵(撈麵) — 啲麵又粗又硬，唔好食！

埋單五百幾，完全唔覺得有飽肚之感，呢間餐廳我哋一定唔會再嚟幫襯！

P.S. 番到屋企，個腸胃又有啲唔C服……