聯邦酒樓 + La Parole

噚日收咗無印送嚟嘅文件櫃後，已經將唔多用嘅文件放咗入去，空咗sofa旁個櫃仔嘅櫃桶嚟裝我啲scrapbook tools(拾爺提議架！)今日，就將個文件櫃推番入書房，而家間書房比之前更整齊，個文件櫃後面對幅牆仲有少許距離，我哋將啲六盒紙巾、一卷廁紙同 yoga matt放咗入去，同之前一樣放到呢埋嘢，但就唔會好似之前咁礙眼，good！我同拾爺都好滿意！

放好文件櫃後，就將電腦個hard disk放上去，空咗之前放hard disk個位嚟放printer，再出去食lunch。

本來約好基金agent馬屍見面，點知佢又遲到……約好兩點，佢打嚟話仲喺沙田……於是同拾爺去咗聯邦飲茶。

叫咗三碟點心﹕

蜜味叉燒酥($20)﹕一上枱，就覺得啲色好恐怖！橙成咁嘅樣，真係以為係染色嘢！面層塗上厚厚嘅蜜糖，一咬落去，啲牙已經黐黐哋。啲酥皮唔得鬆化，好多粉！唯一可以讚嘅係啲叉燒唔怕好鹹。

香煎蓮藕蝦餅($20)﹕好油嘅一碟點心！講明係蓮藕蝦餅，咁就梗係兩種料都有啦，但啲蓮藕切到好大粒，令人食得好辛苦……蓮藕本身唔係粉嘅嘢，我覺得切細粒啲，會容易啲令人品嚐呢味點心！而家我只係好用力咁去咬碎啲蓮藕，完全enjoy唔到碟點心……

賽螃鮮蟹餃($24)﹕呃人架！又話有鮮蟹肉，我只見到有幾絲疑似蟹肉嘅東西喺入面，但太細，細到食咗落去都唔係好feel到佢係咪蟹肉囉！既然蝦嘅份量係佔絕大部分嘅話，咁佢個名就唔應該叫鮮蟹餃啦！另外，啲皮整得好差，睇個樣已經覺得衰，食落又厚又黏，落得太多水！

啲茶好「鞋」！飲一啖，個喉嚨已經feel到好「鞋」！咁都收人十蚊位，好過去搶！

呢餐食咗$92。本來想等埋馬屍嚟再叫點心，點知佢搞到成差唔多四點先到，人哋要交場做wedding喇，所以我同拾爺都唔敢再叫點心，一心諗住要轉場再食嘛。

離開聯邦，去咗La Parole食tea。呢度三點起，叫杯嘢飲，可以任食小食！當時，小食唔太多選擇，但如果唔太肚餓，又想悠閒地度過一個下午，呢間餐廳一定會係一個唔錯 嘅選擇。一場嚟到，我當然係飲Leonidas hot chocolate啦！拾爺就飲茶，而馬屍因為未食飯，所以要咗個三文治餐。

水果唔太靚，睇啲色就知喇。多士已經 「淋」哂，完全引唔起我哋嘅食慾！但個橄欖醬好正！(當然呢啲味未必人見人愛。)鴨胸同咸豬手片就正常水準，煙三文魚好有三文魚味(唔係廢話，有啲真係食 不feel到其味架！)，最正係吞拿魚三文治！麵包軟熟，內裡嘅吞拿魚又夠多，真係好好味！搞到我同拾爺一再添食，我哋嘅為食行徑簡直係嚇壞馬屍！

其實馬屍今次約我哋，係要交待番自己跳槽一事，話時話，我都幾黑仔！當年買保險，係幫襯我亞哥個 friend，對方明明一直喺嗰間公司做咗好耐，點知我幫襯咗兩年到，佢就跳槽……好彩，佢就算走咗，都會幫我跟進所有同我保險有關嘅嘢，所以就算我試過 一年claim三次保險，都冇事！而follow我張單嘅agent都唔錯嘅。呢次又係基金出事，其實馬屍已經做到好高級架喇，點知又係人事問題要走…… 好彩佢係尾簿十幾年老死，所以又係就算走咗，都會幫我同拾爺睇實我哋個account啫！今次嚟review吓個account，有13%回報率，我份人 唔貪心架，我覺得好好架喇！我份公積金都只係得5%咋！

馬屍今次嚟除咗交待自己去向同我哋個review之外，就係叫我哋繼續跟佢，停供舊嘅，由啲錢繼續滾 存，當然佢會幫我哋睇實啦，然後再喺佢新公司開account。佢間新公司可以俾我哋喺短時間內拎錢唔再收手續費，不過呢段短時間嘅management charges就貴過舊嗰間一個double，但過咗呢段時間後，個收費又會平一半。其實計番都有著數嘅，轉公司呢啲嘢真係好煩，但我哋而家間基金公司一 早send信話俾我哋知馬屍要走喇，又話有人會contact我哋繼續跟單，可惜嗰個人遲遲都未出現……我唔認為佢哋之後會睇得我哋個accounts好 緊囉！始終我哋唔係大客，開嘅account係最少金額嘅，我哋讚又好，蝕又好，佢哋都照收錢嘅！人哋同我哋三唔識七，點會同我哋積極做﹖馬屍就唔同，我 哋係佢十幾年老死介紹，除非佢連friend都唔認，如果唔係，佢一定會幫我哋睇得緊啲嘅。我信得過佢唔會出賣尾簿，所以佢俾咩建議我哋，我哋都照做喇。 始終，投資呢味嘢我同拾爺都唔叻，係要搵個信得過嘅人去幫我哋嘅。