Saiko

帶咗班學生去參觀卡樂B工場，個講者好幽默，一班同學都玩得好開心！最正係有新鮮炸好嘅暮片食，yeah！不過，回程番學校時就慘喇，交通意外搞到塞車……我瞓著紮醒，再瞓番，又紮醒兩三次都未出到將軍澳……

去咗Paper Art買嘢，為咗入會，不停揀，務求執夠一千蚊！買印台時多口問句個staff唔同brand有乜分別，估唔到今次遇到嘅staff咁nice(上次嗰個 好cool！)，佢教咗我好多嘢，仲即場示範俾我睇，而且俾咗張有關stamping嘅print out我添！買買買，其實唔知有冇買貴到，但我諗九折後其實係ok嘅個價！(自我安慰！)本來想格吓熱風槍個價，但見佢平咗$100之餘，仲有多九五折， 就順便買埋喇。埋單九百幾，破財喇！

是晚同拾爺去咗Saiko到食晚飯，慶祝我倆走在一起(曾經嘅拍拖紀念日是也！)。Saiko就係我之前喺ubuyibuy到買咗嘅搵笨coupon，買完之後，我真係覺得自己上當架！但係……今日食完呢餐之後，我真係有「塞翁失馬」之感！

由於coupon唔apply得落dinner set到，我厚顏問兩個人可唔可以叫個set，再散叫，好彩可以，如果唔係，呢度啲嘢貴成咁，都唔知幾錢先落到樓！喺到不得不讚呢度嘅waitress真 係好nice，service好好！佢哋唔會因為妳用coupon而俾臉色妳睇，依然招呼周到！隔離枱三個女人，都唔知係真唔係，帶兩張coupon嚟 用，個manager都照俾佢用，仲幫佢哋諗埋點樣可以用足$400呢！

入正題，我同拾爺叫咗一個season set($550)，再散叫鰻魚牛油果cut roll($70)、鐵板鵝肝($128)同海膽炒飯($98)。

Season set有﹕

季節前菜﹕分三樣嘢，有蟹籽蛋卷，啲蛋唔怕好甜，淡淡嘅甜味再加上啲蟹籽，係個唔錯嘅配搭！再有兩片我都唔知咩肉嘅片喇，哈哈，well，有少少「鞋」，冇咩味，麻麻哋啫！最後係螺，又係冇特別……

日本生蠔 ﹕ 好肥美！蠔味唔算好重，海水味亦唔怕太鹹，可能同佢配辣蘿蔔絲同蔥花有關，加咗呢兩樣嘢，再連埋個酸味味嘅汁食，雖然有少少蓋咗本來已經唔係濃嘅蠔味，但就淡化咗啲海水嘅鹹味！對唔太buy海水嘅人嚟講，係幾唔錯嘅選擇！

刺身﹕五款刺身分別為立魚、秋刀魚、 金目鯛、牡丹蝦同拖羅。先食立魚，一片片又白又薄嘅立魚，配上蔥花同辣蘿蔔絲去食，雖然魚本身冇咩魚味，但個口感就好得意。佢雖然被切到好薄，但就好堅 韌，好有彈口！秋刀魚就好有魚味，經理話有啲人會嫌佢腥，但我就好鍾意食！配上指定嘅蔥花同薑可能有助辟腥，但就會掩蓋咗個魚味，所以，我都係鍾意就咁 食！金目鯛又係冇咩魚味，不過就叫做幾厚身，係五樣之中，最普通嘅。牡丹蝦係中size，唔係我食過最大件嘅蝦刺身，但呢隻已經俾出面好多舖頭大隻架喇， 而且好新鮮，食到隻蝦本身嘅清甜味！(出面好多啲蝦都唔夠新鮮，食落去嘅「甜」完全唔係嗰回事！以為個牡丹蝦已經係全晚highlight啦，點知個拖羅 仲正！好肥美，真係又厚又肥又正！一食落去，即刻feel到內裡嘅脂肪慢慢滲出嚟，好味到癲！當然，再好食嘅一定會有，尤其之前喺都市日報見到「銀座鮨 久」嗰一塊脂肪分佈都仲均勻，睇到都想食。呢塊真係冇得同人比，但我而家係以$550嘅dinner set價錢去食，食到呢塊真係已經值番哂啦我覺得！

吸物﹕本日清湯為硯湯，一打開個蓋已經見到兩大隻硯，好肥美！我好欣賞呢度用料十足，雖然係set dinner，但絕對唔會hea你，蠔，俾隻肥嘅你！刺身，又俾肥美嘅你！就連跟湯嘅硯，都係又大又肥嘅，$550一個set，真係超值！

卷物﹕上完湯，就上我哋另叫嘅鰻魚牛油果切卷，$70 6件真係唔平，不過比我哋想像中多架喇。可惜，呢碟卷物唔好食……首先，鰻魚同牛油果唔夾，一齊食個感覺怪怪咁。其次就係啲飯太爛太濕，師傅又切得唔靚，呢碟嘢收$70真係唔太值！

煮物﹕松葉蟹肉煮野菜，呢碟我冇食，不予置評。拾爺就話ok。

Tempura﹕有五件炸物，其中餐牌有嘅帆立貝海膽卷唔知點解換咗 做多骨魚……事後先知，想出聲都唔得喇……條魚太多骨，我咬咗一啖就俾拾爺包底喇！反而紫蘇葉包白飯魚幾好味，而且waitress叫我哋點咖喱鹽嚟食， 個感覺好得意。出面食親天婦羅，多數都係點蘿蔔絲醬油，好少好似呢間咁俾咁多選擇我哋！除咗醬油同咖哩鹽，仲有普通鹽同檸檬。野菜炸物係我至愛嘅日本南 瓜，鍾意日本南瓜嘅硬身，一啲都唔怕粉！師傅炸得好脆，如果落少啲鹽就仲好喇！炸蝦亦係唔錯嘅炸物，平時食親嘅，都係「梅」蝦，今次呢隻啲肉好彈，唔理佢 係用新鮮蝦定係用咗某些方法令佢彈啦，都叫好食過出面大部份餐廳！最後嘅舞茸我冇食到，拾爺話好脆但冇味。

冷物﹕呢個凍日本蕃茄唔止賣相吸引，味道仲唔錯。唔怕好酸，味道清淡，再配上鹽嚟食，幾開胃！不過，略嫌啲鹽落得太多，如果少啲冇咁鹹就perfect喇！

鐵板﹕先上我哋side order嘅鵝肝，menu有兩種鵝肝，一種係兩片嘅，另一樣係四件鵝肝多士，我哋揀咗前者，但原來都係跟多士架！鵝肝煎得幾香，不過都係太熟，溶於口中 嘅比例太少……而且面層落咗好多鹽，好鹹！睇嚟呢度嘅師傅出手都幾重，幾樣嘢，我同拾爺都覺得過鹹！食完我哋個side order，waitress就正式上set入面嘅鐵板食物，先嚟餐牌冇嘅飽魚，嚮螺變飽魚，係賺定蝕呢﹖唔理喇，最緊要好食！其實飽魚本身都冇味嘅，好 唔好食就要睇師傅調味功力喇，而今次……仍然未能令我同拾爺愛上食飽魚。跟住嘅和牛薄燒就連埋茄子同菇一齊上。先講個和牛，一個字 — 正！雖然牛味唔算好重，但師傅燒到一面生一面熟，和牛入口後，開始溶喺口中，嗰種感覺真係好幸福！我唔知呢個set用咗乜嘢和牛，唔理係貴嘢定係平嘢，做 到呢個效果已經值得讚賞！

食事﹕牛肉、白松露炒飯係以碗上嘅，老實講，咁上法唔太大體！不過， 白松露真係好香，碗飯一上枱，啲香味已經吸引到你好想即刻起筷。只係……食咗一啖就開始失望……炒飯乾身係正常，但乾到好似所有水份都被搾乾會唔會太過﹖ 而且啲牛肉粒好「韌」……食緊牛肉、白松露炒飯時，我哋散叫嘅海膽炒飯都上埋喇，$98一碗飯，聽落好貴，但人哋又真係俾唔少海膽出嚟嘅，好過出面某啲餐 廳賣你幾十蚊但俾得一、兩小塊！海膽唔怕腥，但絕不鮮甜！

甘味﹕Waitress問我哋要雪糕定水果時，我諗都唔諗就要雪糕！佢再問我哋要咩味時，我就問佢係 咪只有一個，因為我哋只係叫咗一個set，waitress好好，話送多杯俾拾爺食，yeah！最後，我哋要咗柚子同綠茶味。前者清香，後者甘甜，為呢餐 畫上完美句號。(唔明點解柚子雪糕質感一定係冰冰哋，唔可以好似綠茶嗰啲咁綿嘅﹖)

埋單$931，扣除$2020 coupon後係$731，張coupon係我用$99買嘅，即係呢餐食咗$830，以佢嘅質素，收呢個價錢，非常ok！