豐富早餐
今日天氣好好呀！
離開酒店前，我問負責人可唔可以keep起扣住鎖匙嘅牌仔，佢話佢哋要reuse，所以唔俾得我……仲諗住keep嚟留念添……
Store好啲行李，我哋就跟住酒店負責人嘅指示行去搵租單車嘅舖頭，好快就搵到喇，租單車半日每人€6， 價錢合理，我同拾爺即時扑鎚。單車舖老闆要我哋交出passport俾佢影印，收錢後，就幫我哋搵合適嘅單車。其實，兩年前我同拾爺歐遊，喺荷蘭已經好想 租單車踩，奈何歐洲人高大，佢哋啲單車更大！佢哋習慣踩高身單車，就連身型高大嘅佢哋都雙腳唔掂地，我同拾爺更加覺得啲單車高不可騎……老闆知我哋對腳掂 唔到地會冇安全感，於是就幫我哋較低個seat位，等我哋可以雙腳著地。雖然，我要求要踩俾kids嘅單車，但佢好似點都想我騎大人單車，一再幫我換 seat……仲叫我試吓，真係唔ok先番嚟換……佢咁樣，搞到我唔好意思再堅持要kids嘅單車……
同拾爺揀好單車，就過對面單車徑踩 喇。老闆教我哋沿路踩去另一小鎮Beilstein。對於踩單車一向唔叻又好耐冇踩過單車嘅我嚟講，踩去另一小鎮係一大挑戰！就連拾爺跟住後面，見到我嘅 S型行車線都嗌驚。但凡上斜同落斜我都落車推，唔敢踩……拾爺笑我推車仲多過踩……睇住其他人踩住單車咁過我哋，拾爺話啲公公同婆婆都叻過我……
沒圖沒真相，真係成日要落車推……
幾經辛苦先去到Beilstein。
Beilstein
呢 日終於圓咗我哋個喺歐洲踩住單車旅遊嘅夢！踩單車係好現，但其實都有唔好處……以我嘅踩單車技術，咁樣踩去另一小鎮，我根本都唔係好欣賞到沿途風光……因 為太緊張，又怕同頭單車相撞……而且……到達小鎮後，小鎮入面啲路都唔適合踩單車，推住單車有好多地方都去唔到……呢到雖然都有castle，但要上山， 我倆而家多咗架單車，唔可以輕易行上去……喺小鎮到兜咗一小圈(真係好小，要上斜同樓梯嘅都行唔到……)，就搵咗間café坐低飲嘢。
指定動作﹕餐廳評級為Poor！
其實Beilstein呢個地方都唔錯，主要嘅遊客係本地人，好少外國遊客，更加唔見其他亞洲人。喺到坐咗陣，就要踩番去還車喇。回程都係但凡上、落斜要落車推，但感覺踏實過之前喇。
呢張唔算，係為影相而影嘅。
番到單車舖，交低單車，就番酒店拎番行李，再行去火車站喇。酒店間單車房有好多flies，我哋個環保袋入面有生果，拾爺入去拎行李時，袋生果被一堆flies圍住，好嘔心！
Cochem train station
成 功搭上兩點五十八分嘅火車離Cochem，第一程車車程短，因為拾爺瞓著咗，搞到眼瞓到死嘅我唔敢瞓……喺Koblenz Hbf轉車後，本來安心大睡，點知……瞓瞓吓突然覺得右邊身好痛，由頸到膊再到手臂都扯住痛……痛到瞓唔到……可能呢幾日都要拉喼，頭先趕火車，一邊拉一 邊孭住重重嘅環保袋，扯親都唔知……拾爺知道後，幫我按咗陣，落車後又唔准我又孭環保袋，但其實佢要拎嘅嘢已經夠哂重……
再番Frankfurt，但今晚住嘅酒店並唔係上次嗰間，我哋住咗間更近火車站嘅Inter City Hotel Frankfurt，基本上就喺對面，不過只得三星……但其規模之大，我相信早餐都一定會幾豐富！
Settle down後又出去搵食，拾爺終於搵到食街！不過……所謂嘅食街都只係得幾間餐廳……同Nice比，呢條根本算不上什麼……因為聽日就要番香港，所以今晚想揀間德國菜嘅餐廳，不過……選擇唔多……
搵餐廳途經此地，好熱鬧，有人唱歌，有人跳舞 (冇影到相……)，有人飲食。
搵餐廳時，入咗間舖頭，見佢有好多sauce賣，就買咗三樽。
因為真係冇乜選擇，求其揀咗間餐廳坐低。點咗一份salad，一客豬手，一杯啤酒同埋一杯蘋果酒。
Apfelwein (€1.9)﹕因為拾爺話呢到蘋果酒出名，嚟到應該試吓。所以，一向唔飲酒嘅我，最後一晚豁出去，點咗呢杯嘢嚟試吓。味道酸酸叔叔咁，只可以用awful嚟形容！
點Apfelwein時，Waiter都驚我會接受唔到，所以同我講真係唔ok嘅，佢可以幫我溝水或lemonade。我飲後，即時叫佢幫我加lemonade，原來呢到嘅lemonade即係芬達……我初時以為呢支嘢佢會收我錢，呢支芬達喺menu上個標價(€2.8)仲貴過杯Apfelwein 架！好彩，最後冇收錢啫。
Wildrräutersalat Balsamicodressing mit gratiniertem Ziegenfrischkäse (€10.9)﹕我幾鍾意嗰塊芝士，煎到暖暖放入口，雖然係羊奶芝士，但一啲都唔羶，好食！其他配菜就一般啦。
德國嘅餐廳有幾可怕﹖睇上圖！無論係坐室外定室內，都有flies！
唔想浪費，就算杯蘋果酒唔好飲，我都sip吓sip吓咁飲，飲到一半時，拾爺見到我塊臉紅哂，由於我平時完全唔掂酒精，拾爺怕我醉，唔俾我再飲，仲迫我飲哂成支fanta orange先准走……因為佢一直擔心我醉，要趕住番酒店，唔記得影指定動作相添……
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
