2011 法比荷之旅 Day 13

噚日問老闆娘今天天氣如何，佢又話會好好天，呃人嘅，今日陰天……早知噚日同佢講提早遊湖啦！

一早起身想睇吓有冇熱水用，有就即刻沖番個涼！但仲未有……

行去酒店食早餐，呢間酒店嘅早餐得好少選擇……得四種cheese四種ham，麵包種類亦少過之前……而且冇多士機俾我整toast添……

(早餐嘅coffee or tea係成壺咁上架！)

我哋同咗個staff講噚晚冇熱水沖涼，佢話會即刻搵人過去睇吓，預計晚飯時會有！仲要等咁耐……雖然酒店為表歉意請我哋晚飯時間飲番杯嘢，但我會寧願噚晚有得洗頭沖涼囉！

食早餐時，個staff走嚟，話我哋會有boat trip，問我哋想幾點去遊 湖，我反問佢有幾點可以揀，佢就話有12:45、13:45同14:45三個時段，我望望出面個天，仲係陰……個staff知我擔心天氣問題，話晏啲會好 天，建議我哋揀14:45嗰段。我問佢有冇picnic box俾我哋，因為我記得車厘子大人個plan係有架！但佢話冇人同佢講過有，不過佢會去check單。最後，都係冇……最衰呢到冇Wifi，我 check唔番個email有定冇添……不過算啦！個picnic box都係麵包同香檳，兩樣我都冇興趣……

食完早餐，就問staff 有冇單車租，€8全日，但冇哂……佢叫我哋搭車入市中心租……我提議過對面間酒店問吓，行到去，雖然要€9.5，但都好過入市中心先租到呀！酒店個 staff帶我哋去揀單車，其實之前睇車厘子大人個blog，已經知道呢到嘅單車好高身！嚟到荷蘭，亦見唔少大部單車！個staff亦知我哋唔夠高，所以 都盡量搵啲冇咁大部嘅俾我哋，仲較到個座位最低添！點知……我連上都上唔到部車到囉……而拾爺雖然勉強上到去，但雙腳唔掂地，令佢覺得好冇安全感……最 後，我哋都冇租到單車。個staff叫我哋去市中心，租兒童單車。但搭車入市中心租得嚟，喺嗰到踩得嗰一陣又要還喇(中間仲要有一個鐘去咗遊湖呢！)，好 唔化算……我哋本來係打算踩入市中心架嘛……

租唔成單車，我哋決定行入市中心！其實路程好遠架！好多人都係叫我哋搭巴士入去嘅，但我同拾爺見有時間，當係沿途欣賞吓風景囉！呢個trip成日行路，都行到慣喇，所以我哋都唔驚！

十一點半出發，行到十二點半，終於到達市中心喇！呢到嘅旅客較多！不過，論環境，都係我哋住嘅farm house嗰邊靚啲！雖然我哋都唔係住正最靚嗰段，因為嗰啲都係住宅，得一間B&B咋！但地方都間渉，好難拖喼入去架！

喺市中心行咗一陣，大都係餐廳同一啲sovenir shops，冇買嘢……揀好餐廳後，一點十，就坐低食lunch。我哋今次食pancake！

本來係揀咗坐喺出面，對住條河食嘅，但出面好多蜜蜂……經過上次被咬一役後，我同拾爺都怕咗……所以食食吓，都係投降，入番室內！

每人叫咗一個餐，我食甜pancake，拾爺就揀鹹嘅。先嚟餐湯加麵包﹕

我揀咗Light creamy tomato soup，唔覺得creamy，只係覺得好鹹……反而啲麵包好正！外脆內軟，唔怕刮損上顎！

拾爺嘅Grandma’s vegetable soup with noodles and meatballs就好油……

主角pancake上場！好大塊！所以，食唔哂……我嗰塊香蕉pancake味道都ok架！係燶得滯囉……我哋冇好似啲當地人咁落糖，亦唔要cream！

拾爺嘅cheese都唔錯，可惜我食完自己半塊banana pancake後，已經食唔落呢塊cheese pancake……只係咬咗幾啖啫。

個set仲有雪糕做甜品架！我哋落單時提咗waitress唔好落cream，因為我同拾爺都唔食嘅……

食完，即刻埋單走人！因為，已經差唔多兩點九喇！同拾爺一齊衝去上船點，啱啱趕得切！不過……我一直以為呢個boat trip係自己開艇架！因為車厘子大人都係自己揸船嘅，我都係學佢咁買一個三日兩夜嘅plan架嘛！點知……我哋係坐大船，有人開嗰隻……所以，如果頭先上唔到船，就冇得遊湖架喇……

呢個鐘嘅遊湖遊得唔開心，因為滿心期待同拾爺自己揸船嘅情況，一下子幻滅哂！可能上唔 到呢班船會仲好，因為我可以同拾爺自己去租船玩！我哋落船後格過價，租一個鐘都係€12，其實唔算貴！如果我知呢個boat trip係咁嘅話，我哋噚日一到埗就會喺村內租船玩喇！而家喺架船上面，想走都走唔到……遊完之後又夜喇，要番酒店食dinner(六點至七點半先有得 食……仲要行番去呢！)……雖然不停同自己講，唔上都上咗船，要好好享受，唔好浪費光陰，但總係有少少唔開心……我真係好笨呀！><

遊 完湖，就行番去酒店喇。今次行另一條路走。行過運河，叫咗個女人幫我哋揸機影相，當佢影完一張後，我哋叫佢影第二張時，有一班男人行過，起哄叫 ﹕KISS, KISS！於是，第二張相影出嚟，就係拾爺錫我塊臉喇。事後，拾爺怪我唔錫佢……其實……我當時都聽唔清楚堆男人講乜……

番到farm house，有熱水喇！即刻沖涼洗頭，之後就爬入肥女人講嗰個入面有床舖嘅櫃內影相。哈哈，好玩呀！玩夠後，我哋就行去酒店食dinner喇！

又有好硬嘅麵包﹕

今晚嘅湯係tomato soup……

不過今晚個主菜係豬柳呀！大塊同好食過噚晚，開心死拾爺，因為佢噚晚食唔飽，哈哈！

今晚又係有好多配菜，其中有一樣好得意架！個靚仔 waiter(係呀，今晚有個靚仔serve我哋呀！佢好nice添架！)話唔知道菜嘅英文係乜，喺荷蘭就叫Rabarber，係一啲好傳統嘅嘢食嚟架！ 佢話細個時佢grandma好鍾意整，而佢又好鍾意食！不過，佢話呢道菜唔係人人都受到，啲人一係就會好鍾意，一係就會完全接受唔到喎。Well, 作為中國人嘅我，未去到好鍾意，但都會食吓，唔會食都唔食，但有得揀，會唔想食……因為……佢好酸呀~~

(呢個就係Rabarber喇！)今晚同拾爺影咗幾張合照，因為靚仔waiter見到我哋食嘢食，就主動幫手揸機！隔離枱嘅食客本來想避入鏡，但最後都入咗……哈哈，俾番張相佢睇，大家都喺到笑。其實，呢到嘅食客都係住客嚟架！因為村入面係冇餐廳嘅，住得村呢到嘅，唔係幫襯呢間酒店，就係對面間四星酒店。

是晚甜品﹕

拎咗Muffy同Moffy出嚟影相，隔離枱個女人同我哋講喺荷蘭佢哋係叫「Nijntje」。Well, 佢讀咗幾次，我都係發唔出呢個音……

食飽飽，番酒店，執行李……聽日要離開Giethoorn喇……咁亦意味我哋個旅程就嚟完結喇……玩埋Amsterdam就要番香港喇……好唔捨得……