以為爸爸要喺ICU住上好幾日，點知今日五點幾已經轉番出普通病房，不過，每次探病人數仲少過ICU，只有兩位……我今日一去到，就冇得探……要等媽媽出嚟，換我入去。
今日見到爸爸比噚日精神，頸上那粒礙眼東西亦貼咗膠布遮住了。今日爸爸仍然要用魔術手寫板同我哋溝通，不過，佢有時都會忍唔住開聲講兩句。佢見到今日嚟探病嘅只有我，就問拾爺喺邊，我話佢知拾爺噚日係專登請假唔補課咁嚟，今日唔可以再咁樣，因為佢唔補課，學生就被分俾其他老師，咁樣其實係加重咗人哋嘅負擔，偶爾一次可以，經常就唔得喇。爸爸知道後，就叫我哋太忙就唔駛嚟，話自己冇咩事。
傾到咁上下，見爸爸開始攰，媽媽同我就打算走，點知，哥哥、大妹同妹夫嚟埋……我哋不得不走，但爸爸就冇得抖lu……
離開醫院，直接番屋企。媽媽知道我呢幾日都冇番奶奶到食飯，怕我唔夠營養……冇辦法，呢排工作好忙，出卷、改嘢、處理其他admin paper work，連備課嘅時間都唔夠……每日都係做到被校工趕先捨得走，所以去完醫院後，我已經攰到唔想再番奶奶到先，然後至番屋企。本來夜晚想食沙律菜當dinner，點知supermarket賣哂……拾爺就煮咗個公仔麵俾我食，佢今晚番咗奶奶到，仲拎咗湯番嚟俾我飲呢。雖然，奶奶煮嘅嘢好清淡，有時食得多都會覺得厭，但呢幾日冇番去食飯，食出面嘢或求其食，令我覺得有住家飯食，其實係超幸福架！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
