正生書院

Staff development day，全校老師齊齊去正生書院參觀！去正生，要搭船，雖然係遊艇，但size咁細，我預咗會暈船浪……校長一早講咗怕暈船嘅就自己食暈浪丸，真係唔ok 嘅，就要個別同佢講。我都好想入校長室同佢講，但我之前學校旅行同帶隊去camp，都試過搭船，我怕人家唔信我唔搭得，加上唔去嘅都係有番咁上下江湖地位，所以就冇出聲……

今早約咗小肥同瘦瘦一齊食早餐，之後就行去碼頭集合，一齊搭正生嘅遊艇出發。我故意遲啲上船，就係怕暈，一上船，搵到位就合埋雙眼，小肥見到都話我誇張。船開後，船長話怕暈浪嘅人可以上上層，會冇咁暈，於是，瘦瘦就陪我上去。

上到去，已經有幾個同事喺到，我一上去就搵位坐低同瞓，之後聽到其他同事陸續上嚟，個個見到上層可以冇遮擋咁望到四周景色，都好興奮！佢哋逐個喺船頭位置影相，每每有人發現我只坐唔郁，都問咩事，瘦瘦就代答我暈浪。船開咗幾個字後，我越嚟越唔舒服，就咁坐都搞唔掂，瘦瘦借出膊頭俾我，但因為佢始終係女仔，而且又瘦弱，我唔敢將成個人嘅重量都傾哂落佢到，所以都瞓得唔太好……

隔咗一陣，佢個膊頭都幫唔到我，我要瞓低，於是瘦瘦再借出大脾，佢話連佢男朋友都未瞓過，我先用了。呢個時候，校長都上埋嚟上層，仲有隨團攝影師，佢哋見到我咁都問吓咩事。大家仍然好興奮咁影相，有時啲合照，會影到我瞓咗喺到……

之後，有同事突然爬上船頭高起位置坐低，初時都有幾個同事勸佢唔好咁做，但大家得知下層嘅船頭為更長，同事唔會被拋下海，就唔再出聲，因為出聲該同事都唔理。然後，再有幾個同事坐上去，包括瘦瘦。瘦瘦佢哋一走開，我就索性成個人霸哂張長凳嚟瞓，點知，起一起身，個人就唔舒服，我意識到自己要嘔，就即時拎出頭先小肥喺大家樂幫我拎嘅膠袋出嚟，我一嘔，Laughing就即刻俾包紙巾我，仲叫我keep住唔駛俾番佢，其他人都即刻上前關心我。嘔完，個人舒服哂，但感覺仲未ok，於是問同事拎多個膠袋作後備，然後再瞓過。

差唔多到達正生時，我又再唔舒服，負責是此活動嘅同事叫我起來準備落船時，我又嘔……佢見狀，即時幫我掃背。

嘔完兩次，終於腳踏實地，但個人好pale。一上岸，小肥拎出水樽問我要唔要水，達人又俾喉糖我潤吓個喉嚨。因為頭先喺上層吹風吹得好利害，個人好寒，達人見狀，即刻俾個暖包我暖手，仲叫我keep住唔駛俾番佢。

我哋被分成4組，每組10人，由一個正生嘅女學生帶領去參觀校舍。因為我仲未完全好番，沿途達人都扶住我行。

遠離繁囂嘅小島

由碼頭往院舍嘅路

正生標誌，星星代表神。

往院舍嘅路上有個以前用嚟磅豬嘅磅，正生學生話以前呢到有個豬欄。

我哋先參觀男生部，呢到男、女生係分開生活嘅，沿途都有流動式嘅洗手間，嚟到先知，呢到所有洗手間都係咁……心裡擔心唔知點忍咁多個鐘……

男生浴室，佢哋用山水嚟沖涼，啲水被儲喺缸內，再用個殼舀，一年四季都用凍水沖涼，要氣溫去到某個度數，先可以有三殼熱水。聽到就覺得凍！

男生部廚房

定期有義工嚟幫佢哋剪頭髮

禮堂

行去男生宿舍路上……

射箭場

War game場，佢哋嘅課外活動之一。

男生宿舍

離開男生部，往女生部的途中……

籃球場

課室

圖書館

終於行到女生部喇！

獨立浴室，但都係只得凍水沖涼……

女生宿舍

女生部廚房

參觀完女生部後，我哋就被安排喺女生部嘅一個比較大嘅area到坐低，等齊人，再聽分享。等緊人時，我實在忍唔住要去洗手間，但呢到所有洗手間都係流動式洗手間……幸好有宣宣提醒，去到全山頭唯一嘅馬桶洗手間！只係……呢到冇沖水設施，我哋要裝滿一桶水再倒入馬桶去沖廁……

趁人未齊，打俾拾爺向佢訴苦，拾爺怪我唔聽佢講，一早向校長申請唔嚟，搞到自己要嘔兩次……佢問我校長知唔知我嘔，我話唔知佢知唔知，但佢一定知我唔舒服。拾爺聽後，竟然叫我下次嘔落校長到，哈哈。

等齊人，先聽呢到嘅老師分享，再聽各同學嘅自我介紹。呢到嘅學生唔係全部都因為吸毒而被送入嚟，有啲係因為傷人，亦有因為情緒問題而被父母送入嚟。聽到呢到嘅學生年紀少少就入嚟，心入面有啲唔舒服。雖然我未為人母，但我可以想像到女兒細細個就學壞，作為父母，心裡一定好難過。

聽完分享，就到開飯時間！一直以為嚟到係食大鑊飯，對膳食安排亦已做好心理準備！點知……原來我哋係食飯盒，雖然啲飯應該都係正生嘅人煮，但就唔係一齊圍埋食，而係每人分到一短飯，坐喺個位到(連枱都冇……)咁食……最最最悲涼嘅係，我哋要聞住陣陣嘅尿味嚟食飯……因為，圍住我哋嘅，係幾個流動洗手間……

食完飯，係大家嘅「自由時間」！各同事唔係打手機，就係圍埋傾偈，有啲會去同正生嘅學生傾，亦有同事走去睇吓佢哋喺擺出嚟嘅攤檔發售嘅書籍。我則去咗睇其中一個女同學嘅沖茶示範，之後仲買咗兩包茶葉添。其實啲茶葉都賣得頗貴，就算我唔熟價都知，但買兩包，就當係支持吓正生書院啦！始終覺得，呢間學校個理念真係好好！亦好敬佩入面嘅老師同義工！

自由時間後，大家就分成三組，由正生嘅學生入組同我哋傾吓偈，同分享吓。佢哋講番以前對老師嘅感覺，唔多唔少都叫我有所反思。當然，我明白佢哋嘅不滿，但同時知道老師嘅難處。其實，都幾想開口為佢哋所不滿嘅老師護航，但有其他同事喺到，有啲說話實在唔方便講，怕得罪人……

兩點九走人，今次我食定暈浪丸，係頭先一嚟到呢到坐低時，薰衣草俾我架。我故意最遲上船，上船後，即刻上上層，瘦瘦佢哋一早幫我霸定個位。最初我都有嘗試坐喺到，但之後開始唔太舒服……因為越坐越大風，瘦瘦佢哋落番下層，有幾個同事就發現坐喺某個位可以擋到風，佢哋有叫我一齊坐，但我怕倒頭……後嚟越覺唔舒服，我就索性瞓喺張凳到，本來愛貓坐緊喺到，佢一見我瞓低，就叫我瞓過啲去佢個位到，而佢就走開。其實，我少少位就夠，唔想趕走佢，但愛貓好好，想我瞓得舒服啲。

回程呢程船好大浪，但因為我一早瞓低，所以唔算好暈(雖然都係暈……)，反而上層真係好大風，我凍到癲！去程明明一個鐘以內，但回程就超過一個鐘……我一邊瞓一邊就怕自己會吹病……

終於到岸，即時落船，大家知我冇嘔，讚我叻。但我行唔夠幾步就冇力行，求其喺碼頭邊搵張凳就坐低。校長見狀都有嚟問兩句，但知道瘦瘦佢哋會陪住我，就走咗去喇。

同瘦瘦佢哋行去文化中心到食tea，但我個人仲係好唔舒服，冇力行……高ting見狀，就借出手臂俾我繞住嚟行。因為我個胃仲係好唔舒服，所以我都冇打算叫嘢食。呢個時候，再次收到拾爺電話，其實喺船上時拾爺已經打過俾我，但我太暈，冇聽到。落船後個人又唔舒服，同佢講咗兩句就收線，原來拾爺一早嚟咗碼頭接我，但佢知我唔舒服，就寧願喺碼頭等我回電，都唔同我多講兩句，等我可以抖吓。得知拾爺嚟咗，我即時離開，出番碼頭同拾爺會合，然後再一齊搭船到中環。係！又要搭船……

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================