爸爸嘅化療早於日前開始，今次用嘅係標靶治療，所以爸爸要入院住個七日六夜。呢期我都比較忙，所以星期五晚放學後先去探佢，奶奶知我會去探爸爸，就話想一齊去，於是今晚佢、拾爺同我都一齊去。聽奶奶講，佢早幾日都有打電話問候爸爸，其實奶奶對我同我屋企人都好好。探病期間，講開小王子，爸爸就話擔心我同拾爺(因為我哋仍然膝下猶虛，而且冇咩意思想要小朋友。)，奶奶就乘機叫我哋唔好要爸爸擔心……當然，是晚食飯，奶奶繼續落足咀頭啦……
我明白奶奶想做女麻女麻，爸爸同媽媽亦覺得要有兒女先好，但……我同拾爺都咁忙，有時間幫人湊仔，冇時間湊自己嘅……其實自從爸爸要做手術後，我已經態度軟化。尤記得當日大家喺醫生門外喊時，我真係覺得爸爸當時雖然驚，但總算有一班仔女陪伴。當然，仔女唔一定孝順，生著個不孝嘅，真係要嚿叉燒好過，但呢啲嘢只能夠買舖大細。拾爺仍然覺得冇時間湊不如不生……雖然佢會因為我而妥協，但……我身體咁差，生唔生到都係一大問題……呢啲嘢都係順其自然算啦。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
