呢個大日子終於到喇！過咗今日，我就唔駛再每個禮拜陪佢哋上兩次training加冇埋lunch嘅時間，諗起都開心，哈哈。
約咗班妹八點半金鐘地鐵站等，佢哋好乖，個個都比我早到！我已經係一個時間觀念好重嘅人，尤其帶隊，喺可能嘅情況下，我一定唔會俾自己遲！通常我都會早到，但呢班妹，上次去海關同今次Mock Court Trial都比我更早到達，真係好乖！
點完名，仲差一、兩個嚟睇比賽嘅同學，等齊人後，亞頭又差唔多到，所以等埋佢，就一班人浩浩蕩蕩咁出發。
上到高院門前，先嚟一張大合照，然後再上4樓。一出lift，已經見到其他學校嘅學生、工作人員、律師們等等聚哂喺各個court出面，律師們互相 social，工作人員就忙於打點，我哋班妹就作最後努力，練習嘅練習，執問題嘅執問題。等緊嘅時候，負責第二場prosecution嘅結案加盤問走嚟 問我某個point打唔打到，佢哋噚晚發現咗呢個point，非常有利我方，只係佢哋冇再深入搵一啲相關理據……但律師哥哥話ok，咁我就叫佢哋照去。
差唔多九點半，工作人員叫我哋全部入哂其中一個court舉行開幕儀式，大伙入去後，見到在場唔少人拎相機、手機出嚟影相……法庭入邊唔係唔俾影相架咩﹖！ 見到大家肆無忌憚地影，我都有衝動去影！後尾有工作人員叫大家影相唔好影到區旗，同埋一定唔可以公開相片，要不每張$250。以為佢哋咁講係黙許大家繼續 影，點知過咗一陣，又有人表示之前影嘅就唔追究，但下一秒起就禁止影相。
開幕典禮過後，各隊行入自己所屬嘅法庭。我哋今日註場六號法庭。入 六號庭前，律師哥哥show啲呈堂物證嘅相片俾我哋睇，之前女俠叫我哋打證物嘅銀紙冇number呢個point，但由於我知道大會發落嚟嘅文件根本就錯 漏百出，所以銀紙冇number係一個careless mistake，並唔係佢哋原來想我哋去打嘅一個point，為此，我feel到女俠有少少唔開心，因為佢好認真咁study完個case，又搵一個做律 師嘅舊生幫手去睇，得出呢個意見，卻不為我所接受……其實，我唔想浪費女俠嘅心機，但我好清楚個遊戲規則，我唔想搞串人哋個party。一見到啲證物相， 張銀紙都係冇number，我即時問準律師哥哥影番張相，想話show俾女俠睇，以解釋點解我哋唔打呢個point。
首場我哋做 defence，prosecution嗰邊一開始已經令我覺得對方準備不足，連開案都冇prepare，就犯上唔少technical mistakes。不過……因為係對方開始，佢哋一嚟就封咗我哋其中一個point嘅後路，搞到我哋要急急變陣……話說呢個case只有幾份口供，其他嘢 雙方都可以自己老作，所以對方一開始就話當日爆屎渠，搞到啲客鳥散，完全打亂我哋以多客太忙為由，所以被告冇時間去辨別貨物嘅真偽呢個point……好彩，扮被告嘅同學臨危不亂，被盤問時已經自行改動一早預備好嘅台詞，結果出到嚟都叫同控方所講嘅情況大致吻合。其實，我唔擔心被告，因為佢喺庭入面聽審， 所以佢一定識認對。但負責扮佢朋友嘅亞頭就坐喺庭外……雖然，最後我哋都被對方成功指出被告同證人口供有出入，但呢個只係一個minor point，就係大家有冇一齊食lunch，唔影響判決。不過，對方結案時竟然話呢個point好重要，搞到個官都忍唔住話單case最重要係被告是否知 情，有冇一齊食飯唔係重點。
以為打官司好緊張刺激，但首場已有不少笑位！話說我班妹唔知點解突然提出反對控方其中一份呈堂證物，就係嗰張冇 number嘅銀紙！因為由海關扮演嘅控方證人接受主問時，係講得出張銀紙嘅number，但實際張銀紙又係冇number，於是我班妹就反對佢成為證 物。法官於是就要求證人再次睇住張銀紙讀出number，證人照講number，但當然，張銀紙根本就冇number，我班妹再提出質詢，法官就要求證人 指出number所在，證人唯有亂指一個位，法官見到都忍唔住質疑個number嘅存在性，於是就問證人係咪真係印有number，證人好尷尬咁表示呢張 係假銀紙，呢個時候全場都忍唔住笑，法官聽完之後就爆咗句﹕「你行使假鈔﹖！你知唔知咁係犯法架﹖！」跟住又係全場大笑，證人尷尬地要求法官停一停話有嘢 要講，法官初時唔俾，後尾就俾佢講，證人要求行去法官身邊講，我知道佢係想同個官講張銀紙係道具，但要當真咁用，只係……法官拒絕佢行近嘅要求。最後，法 官見個證人咁尷尬，就教控方要求休庭。之後，我聽番啲妹講，控方嗰邊個學生即刻怒氣沖沖咁走嚟鬧我哋﹕「妳哋點可以咁架﹖！唔係大家都同意咗啲證物架咩﹖ 妳哋簽咗名架！」，我班妹即時表示冇同意過，亦冇簽過任何嘢，對方先發現自己個clerk冇俾到張證物同意書我哋呢邊簽。最後，喺雙方負責coach佢哋 嘅律師協調下，大家決定同意該張銀紙成為證物，案件繼續。呢單嘢，我當然有同女俠匯報，用以再次證明呢個point其實真係唔應該用嚟打架！
當我哋仲打緊第一場時，其中一個學生竟然跟咗律師哥哥同佢啲friend去食早餐！嬲到我呀！其實佢出去時係有同我講，但佢只係話要出出去，並冇講去食嘢。 我見佢跟律師哥哥出去，以為佢哋係傾晏晝場官司嘅嘢，但見佢哋出咗去好耐都未番，於是我就問起佢，其他同學呢個時候先話我知佢係出去食早餐，嬲到我即刻叫 人打俾佢，但佢連電話都冇帶出去……我火到打俾律師哥哥，想話點都要佢即時死番嚟，但律師哥哥又冇聽電話……最後，等到律師哥哥番入庭，我知個妹番嚟，即 刻衝出庭去鬧人。因為我之前交帶亞頭喺出面一見到個妹，就先同我開佢一次火，所以個妹一見我衝出嚟，已經知咩事，急忙道歉，但我真係好嬲，雖然我已經盡量 壓低聲線，但亞頭話仍然覺得我鬧得好大聲……哈哈，其實，我真係有克制自己架，因為，當我真係好火時，我可以嗌到樓上都聽到呀！
鬧完個妹， 就番入court。律師哥哥話隔離庭已經打完，一個庭兩場打完哂，另一個都完咗一個case，但我哋仲未出哂證人，結果，真係玩到十二點幾。個官唔知係咪 心急食飯，出哂證人後，雙方都未及結案，佢就急急判案……因為，我方負責結案嘅同學好俾心機咁寫咗幾頁紙，我好想佢有機會發言，加上我心知佢一定攞硬最佳 律師，所以就同律師哥哥講 (佢負責organize)雙方未結案，律師哥哥即刻提個官，個官就叫佢哋ignore自己個判詞先，完成個結案。
最後，我方唔止贏咗場官司，負責開案同結案嘅同學 (同一人)仲拎到「最佳律師」獎！呢個獎有兩個，一個係我哋嘅結案拎，一個係對方律師拎。我覺得對方律師拎到，係因為佢除卻結案外，全程要自己一人應戰， 某程度上，呢個獎係用以嘉許佢嘅體育精神，坦白講，佢唔熟個法律程序，又犯下唔少technical errors，就連負責train我哋defence team個律師都話覺得我方另一個律師表現得更好！
完咗上半場，我哋一班人就去 high court canteen開餐，但一入到去，見到個環境真係唔太好……再望望個餐牌，一個午餐都要三十幾蚊……出去食大家樂好過！於是，我同兩個Form 5出咗去食，其他Form 4因為要備戰下一場比賽，就留守high court canteen食禿嘢。
同兩個學生行出去後，又唔想食啲 周圍都有得食嘅餐廳開餐，於是就行去Far East Finance Centre。金鐘啲物價真係好貴，因為剩番冇幾多時間，唯有揀間afford到之餘，收費又唔算太過份嘅Grove Sandwiches。要咗個意式雜菜千層麵加杯朱古力，盛惠$49，其實都幾貴……仲要份嘢唔太好食……份量其實都幾細，但因為我緊張晏晝場官司，所以 未食哂已經飽飽哋……對於出名大食嘅我嚟講，呢個情況真係令人感覺amazing！
開緊餐時，舊生嚟到，一齊食嘢，食飽飽，就一齊番high court，開審另一場。晏晝場官司開始前，班妹見番頭先個海關官員，對方主動嚟同我哋夾口供，仲表示唔想再有頭先嘅尷尬場面，我即刻叫負責頭先場官司班妹去同人道歉。
晏晝場官司又有笑位，話說我朝早先發現做控方嘅，可以自行搵學生扮第二位證人，於是，我急急搵咗個反應快嘅學生去扮。本來律師哥哥叫我去試吓，但我真係 怕……好彩我堅持要該位學生出場，佢啲反應真係好正！話說我哋收到嘅嗰份口供紙錯漏百出，我哋心知係負責打嘅律師哥哥粗心大意，唔小心將證人供詞入面被告 個名打成另一證人嗰名，點知對方用呢點嚟話我方證人前言不對後語。好彩，我哋個妹醒目，堅持自己當日冇講錯名，當對方手拿列印本嘅口供質佢時，佢就話自己 簽嗰份係手寫，打嗰份係海關事後再預備，所以錯不在佢，在海關。對方律師就質疑佢點解唔拎份口供嚟check清楚，完全唔緊張單官司。我方證人就不慌不忙 咁表示自己唔係被告，盡咗做證人嘅責任就可以，唔需要去緊張。我哋個妹答得絕核，引來全場不少笑聲。
呢場官司，律師哥哥要客串做法官，不 過，佢冇徇私，雙方一旦犯下technical mistakes，佢都會即時指出，又會用問題引導雙方思考，可惜班妹都聽唔出人家言外之音……最忟係個主問多次唔聽清楚證人答案，只顧讀哂自己嘅問題出 嚟！其實練習時，我已經話過佢好多次，我明白佢會緊張，但唔聽人哋答案嘅內容，足以令佢犯下唔少technical errors，因為證人未提嘅嘢，佢唔可以先提，但佢唔聽人講嘢，往往以為人哋提咗，就自顧自咁問落去……最離譜係，佢多次打斷自己證人講嘢！所以，事 後，我就呢樣嘢同佢傾咗一陣。我覺得就算佢將來唔做律師，呢個壞習慣都要戒，出嚟做嘢點可以單向溝通﹖！另一律師，負責盤問被告，比賽前，我已經話過佢預 備嘅問題太少，但佢就答我唔需要多，ok，既然佢咁講，我就放手由佢go ahead。結果，真正比賽時，佢就臨場加好多問題去問，但因為呢啲問題係即時加，冇組織冇思考過，結果，好多問題都同案件無關。佢自己本身又串串貢，辣 著個被告，對方就同佢鬥串，雙方火藥味好重！咁都算，佢笨就笨在，明明係自己盤緊人，人家反問佢，佢竟然走去答……法官都睇唔過眼，多次提醒被告只需回答 問題，而唔好問問題。
雖然法官最後冇講明被告係咪gulity，但佢嘅判詞表示我方證人誠實可靠，被告為人賴皮，辯方證人又多次前言不對後 言，所以我哋都估自己係贏嘅。事實上，完咗單case後，班妹都有走去問律師哥哥，佢話佢真係要判，會判我哋贏。呢場比賽，有四個最佳表現獎，我哋同對方 學校各分兩個，拎到呢個獎嘅分別係我方嘅開案同結案律師 (呢場唔同人)，對方就係律師同埋被告。對方律師又係除卻結案外，一人力戰，所以我估佢一定有獎。而被告得獎則係因為佢夠哂賴皮。好開心我方開案個妹有 獎，呢個妹平時好timid，好少出聲，為人又斯斯文文咁，記得佢第一次練習時，佢把聲真係好細，又怯場，於是我迫佢一定要講嘢大聲，有自信，仲要佢背 稿，要同個官有eye contact。上次律師哥哥帶咗佢train嘅另一學校嘅學生嚟同我哋練習時，我有叫個妹即刻捉住人家個開案律師跟人學嘢，我叫佢一定要求人示範一次開 案俾佢睇，因為人家真係滿有自信。雖然個妹開案時，我因為要接個學生嚟睇比賽而miss咗……但見佢得獎，個官仲讚佢聲線夠，有eye contact，我就知佢做到喇！另一個得獎嘅妹又係我好想佢拎到嘅，因為佢份結案都寫得好好，而且佢由一開始已經放咗好多心機去研究單case。雖然， 佢臨場改咗份script，有少少自打嘴巴，但憑藉佢發掘出一個有力嘅point，令個官對佢讚許有嘉。個官喺佢結案時都有所提問，而佢又對答自如，我最 欣賞嘅，係平時咬字唔清嘅佢，結案時講嘢清楚咗好多，明顯有下苦功，所以佢得獎，我真係好開心！
完咗比賽，成個人鬆哂！今次個program雖然用咗我唔少時間，但我真係好enjoy。其實我對律師呢行都好有興趣，奈何我讀書唔叻，英文更係差，所以一 定無望……呢個program叫做令我對呢行有更深入嘅了解，唔止係學生，連我都學咗好多嘢！同時，見到學生喺呢個program到真係學到嘢，呢啲技巧 唔止對佢哋學業有幫助，我覺得對佢哋將來嘅人生都有所幫助，所以就算用我咁多時間，我都覺得值得！贏咗官司當然開心，但就算不幸輸咗，我都唔會失望，因為喺過程中，我哋已經賺咗好多！我同其中一個學生講過，我唔鍾意佢哋輸咗比賽喊，因為我唔鍾意人家將得失睇得太重，我接呢個program唔係為咗攞威同攞 獎，係想我嘅學生學到嘢，既然過程中已經學到，又何需喺輸咗比賽時喊﹖！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
