氣管炎雖然辛苦，但每次病發，都感覺人間有情。
上星期五我個樣應該真係好病，好多同事都趕我回家，星期一番學後，同事都走嚟問候我，佢哋話我上個星期五成個人好冇精神，令人擔心。我想我平時太跳跳紮，突然嘅冇嚟神氣，令到佢哋都好唔慣呢。呢兩日想趁自己精神番啲，爭取時間工作，卻換嚟同事﹕「好心妳病就番屋企抖吓啦！」嘅回應。其實，我食咗藥，尤其吸咗類固醇，已經好多喇。
除咗同事，爸媽都有打電話問候我。媽媽喺番嚟香港之後嘅第二日已經打俾我，問我病情，得知我曾經發燒，都表現擔心。爸爸之後又有打嚟(應該係奉媽媽之命)，除咗問候我，都有關心埋拾爺有否被我傳染。我倆免疫力差嘅形象實在太深入民心了……奶奶喺佢餐生日飯過後，得知台灣醫院啲藥唔啱我，都有whatsapp催我去睇多次醫生。
記得上星期五喺學校病到辛苦想喊時，收到嫂嫂嘅whatsapp，原來佢同哥哥教曉小王子嗌「大姑姐」後，專登錄咗音send俾我聽，聽到小王子嘅一聲「大姑姐」，心頭一暖，嗰刻完全明白同事口中「兒女會給你力量」嘅意思。小王子雖然唔係我兒，但我真係好鍚佢！
至於最鍚我嘅一定係拾爺！其實，每次病到好辛苦時，都會因為得到拾爺嘅愛護而感到溫暖。記得落機嗰晚，拾爺幫我照顧爸媽，送佢哋上車後，同我番到屋企，第一時間要我去沖涼梳洗，佢就忙於unpack行李。當晚又攰又夜，但佢都堅持開機洗衫，之後，佢得知我發燒，就監督我食退燒藥，再睇實我上床安睡後，先去沖涼。沖完涼後，仲要晾衫。我食咗藥，好快瞓著，都唔知佢幾點先上床瞓，但我知佢其實自己都好攰……番嚟香港呢幾日，我都因為病而做唔到啲咩嘢，拾爺就一力搞掂哂執行李嘅事。佢比我早開學，又要兼顧教學，仲要照顧我呢個病人加做哂所有家務(其實平時都係咁架喇……)，睇到出佢好攰……但佢幾攰，都會喺見到我病得辛苦時，走嚟摸摸我個頭呵我。尤其半夜，我因為鼻水倒流情況嚴重，好多時兩個鼻孔都塞哂，所以半夜會塞醒，每次拾爺都會feel到，見我辛苦，就會呵我。
我成日都話自己其實幾好運(雖然我從來冇乜抽獎運)，有一個大家庭，兄弟姊妹間感情好。讀書唔叻，成績唔好，但又勉勉強強大學畢業。能力唔高，卻又有學校請我，收入雖然唔會叫人眼前一亮，但就勝在穩定，比上不足，比下有餘，足夠我生活。性格唔好，卻又嫁到個超好老公，忍受我嘅臭脾氣，對我嘅照顧實在無微不至。我唔係嗰種追求權力同名利(雖然錢係冇人嫌多嘅，哈哈！)嘅人，只想每日都過得開開心心，而家嘅生活，我已經覺得好美滿喇。
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
