沙嗲豚肉炒烏冬

早幾日睇新聞，見到張耀楊因為吸毒而係北京被公安拘捕，都令人震驚的消息。雖然他多數演戲都係做奸角、黑社會人物，但曾經有人同我講，佢係一個大好人。每個人都有自己的選擇權去釋放壓力、放鬆，但選擇用毒品，就真係大錯特錯。謹此希望經過這次的教訓而改掉這個壞習慣吧!

之前係Samwei的blog度，見到雀后介紹她買印尼沙嗲醬，見佢哋講到咁正，梗係拿拿買嚟，享受吓。果然無介紹錯，下次真係試吓玩串燒先~~~

我好少係街外食炒烏冬，因為炒得好油，好似飲油落肚咁。用少許先炒香材料，再用椰菜滲出的水份，去炒烏冬。那麼烏冬會比較爽身，反而先將烏冬灼熟，口感會十分腍口。

沙嗲豚肉炒烏冬 (2人份量)

材料:

日本烏冬 2個

豚肉 150克

椰菜 半個切絲

火腿扒 1塊

金菇 1包

豚肉醃料:

生抽 1茶匙

糖 1/4茶匙

生粉 1/2茶匙

麻油少許

胡椒粉 少許

調味料:

沙嗲膏 2湯匙

魚露 少許

做法:

1. 椰菜切絲，洗淨，瀝乾水；火腿扒切條 ；金菇切去尾部，洗淨，備用。

2. 豚肉洗淨，加入醃料醃15分鐘，備用。

3. 燒熱油鑊，將豚肉炒至八成熟，加入火腿，快炒。 再將椰菜倒入炒至軟身出水份，才加金菇，兜炒片刻。

4. 最後加入烏冬煮至散開熟透，加入調味料快速兜勻，即成。

小小分享:

沙嗲濃度可按個人喜好，嘗辣者可加入辣椒同煮。