尚膳潮州酒家

父親節，一家人去咗尚膳潮州酒家開餐，揀呢間嘅原因係……好多地方都冇位喇……

約好嘅六點飯局大部份人都遲到……餐廳都唔算大，我哋張枱一睇就知本來唔係for十人，只係佢哋冇枱，又想做我哋生意，夾硬整張八人枱當十人枱，我哋張枱又近入口，三面都係通道，最後一面又近貼隔離枱，我一去到，即時要問waiters邊到放到哥哥張BB車呢，拾爺得知我book枱時冇講明有BB， 又教訓咗我兩句……好彩小王子已經可以坐喺BB凳，加多張凳，坐迫少少都免強可以，BB車就再由餐廳幫我哋安排位置擺放。

爸爸負責點菜，叫咗以下幾樣﹕

鹵水鵝片 ($105)﹕啲鵝片好「嚡」口……唔好食……

鹵水雙拼($118)﹕爸爸揀咗鵝肉同大腸，份量好少，下面舖哂唔值錢嘅豆腐……加上味道一般，性價比低！

超值龍躉孖寶($268)﹕所謂嘅孖寶其實只有一碟係用龍躉整(圖上)，另一碟係其他嘢。先講龍躉嗰碟，一上菜睇到個份量就覺得好唔超值！啲龍躉又唔係特別好食，都唔明點解要收咁貴！至於另一碟，入面啲料唔多夠咁囉，而且整得好一般。

菜甫肉琿煎蛋($68)﹕好夠熱！我buy佢就算用咗菜甫都唔會鹹到人想死(出面有啲真係鹹到喊架！)。

黃豆涼瓜排骨($75)﹕最怕苦瓜，冇食到……

川椒龍鳳球 ($98)﹕Below average，雞冇雞味，蝦冇蝦味，所有嘢得個辣字，唔知想點……

紹菜鹹豬肉($75)﹕冇食到……

雙色水晶包 ($84)﹕叫咗三份，所以show嘅係三份嘅價錢。我鍾意佢用白蓮蓉(我估係，因為顏色較淡，雖然食食吓，又好似深番啲……)，同埋好夠熱。

反沙芋條 ($64)﹕從來都唔好呢樣嘢，所以冇食到，聽老公講，碟嘢好甜。

仲有叫福果芋泥兩份($60)，掛住餵小王子食嘢，冇影到相……今日隻衰豬又係先發呆，後狂扭計，一路食嘢一路扭抱，食嘢時又郁身郁勢四圍摸，我話鬼佢，唔俾佢摸凳腳，媽媽即時話我鬧佢粒孫會搞喊佢……好彩，細妹出口幫我，話細路仔做得唔啱就要教，唔可以縱，媽媽即刻唔敢再出聲。希望小王子喺我哋一班姑姐、 姑丈同叔叔嘅監管下，唔會變港孩啦！(我知嫂嫂唔會縱小王子，但哥哥一定心軟，唉……)今日雖然係哥哥過嘅首個父親節，但佢係冇得抖，仍然要服侍個仔…… 「一生兒女債，半世老婆奴」咪就係佢囉，哈哈。

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================