莎樂美餐廳

去莎樂美餐廳食lunch，間餐廳好暗……我哋上咗樓上坐卡位，好快咁叫咗兩個鐵板餐，我要日本帶子伴美國雞扒(配白菌蒜茸汁)，拾爺就要串燒大蝦伴莎地亞什扒(配肉汁)，餐湯就各要一個，即羅宋湯同周打魚湯。

侍應先上麵包同餐湯﹕

其實對麵包冇咩印象，應該都係普通貨，又唔係熱騰騰咁出囉！紅、白湯，前者係呢到嘅名菜之一，辣辣哋，但唔特別，唔明點解會係名菜……後者就鹹到死……兩碗湯都令人好想飲水！

主菜上場﹕

兩份主菜，份量十足！自問大食嘅我，都真係食唔哂……其實個餐加錢可以加飯或意粉，好 彩我精明冇加到，如果唔係就係嘥錢！我碟雞扒有兩大塊，拾爺碟什扒就有豬扒同雞扒。兩人share嚟食，有成三塊扒係雞……笨咗！其實個扒餐只可以話抵 食，因為真係好大份，但就唔會覺得好食！雞扒係雪扒都預咗，但個雪味重到毫無雞味可言……豬扒個情況都唔好得過雞扒……我冇食到大蝦，但個帶子就一啲都唔 好味……成個餐好重口味，我同拾爺食完，好口渴！離開餐廳去行街時，差啲渴死荃灣！

甜品冇得揀，全部都朱古力雪糕！

埋單$106，應該唔會再番嚟幫襯！

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================