媽媽就近確診患上黃斑病變，左眼要做小手術，雖然呢個手術可以喺clinic進行，但媽媽本身心臟有事，為咗安心，我哋決定貴幾萬蚊都要揀入院做，有咩事，都有足夠嘅醫生同儀器補救。
放學後本想打的去法國醫院，但打俾哥哥後先知媽媽嘅手術安排喺兩點半進行，媽媽而家喺醫院瞓緊覺，佢同爸爸仲有細妹都行開咗去食嘢 (哥哥同細妹陪媽媽入院，爸爸被醫院召去驗血，去完醫院後，爸爸亦去咗探媽媽。)，哥哥叫我唔駛急，教我點樣搭車去醫院。去到法國醫院，就上病房搵媽媽。兩母女傾咗陣計，媽媽雖然緊張陣間嘅小手術，但仍然關心拾爺病況。媽媽話入院時，姑娘竟然以為佢做右眼嘅手術，佢急忙澄清係左眼，仲叫哥哥打去搵clinic個姑娘跟進事情，聽到呢到，我突然對個眼科醫生冇咩信心，點解左、右眼都搞得錯架﹖！
兩母女傾到咁上下，哥哥嚟埋，仲幫我買咗個lunch添。細妹則去咗陪爸爸覆診。之後，大約兩點半，有嬸嬸嚟送媽媽去手術室，媽媽因為滴咗眼藥水，視力模糊，所以嬸嬸用輪椅推媽媽到手術室。我哋先被帶到眼科中心等候，醫生嚟到後，就喺房入面同我同哥哥講一次手術流程，醫生強調自己清楚媽媽係左眼要做手術，話出錯嘅係姑娘，從佢嘅談吐，我開始對佢有番啲信心。之後媽媽就被推進手術室，我見媽媽越加緊張，拳頭握實，表情流露著慌張神色，就趁佢被送走以後，叫住醫生，請佢一陣盡量講啲說話為媽媽定定心神。醫生話媽媽個case其實適合用全身麻醉，奈何媽媽擔心自己心臟負荷唔嚟，堅持選擇局部麻醉……
醫生離開後，哥哥同我講其實好多醫生都話媽媽可以做全身麻醉，但媽媽就係唔信人……唉，我覺得，媽媽一陣要膽驚受怕個幾鐘，控制自己唔好亂郁以免醫生稍一不慎傷害眼睛，箇中嘅心理壓力，可能比全身麻醉更影響其心臟！
等候媽媽出嚟嘅時間雖然只得個幾鐘，但真係好難過！上次爸爸嘅九個鐘手術，我因為要番學，keep住自己不停做嘢，冇時間去諗同去驚，但今次坐喺手術室門外，個人就亂！都唔知係好彩定唔好彩，拾爺噚晚又唔舒服，搞到我都冇覺好瞓，今日全日個人都好攰，所以等等吓我就瞓著咗。
醒咗之後，哥哥同我講細妹打嚟，話爸爸個肺同肝都被照到有腫瘤……其中肝個腫瘤有成3 cm咁大……醫生建議佢做化療……哥哥叫我一陣千祈唔好同媽媽講住。聽到爸爸cancer又再復發，我真係好唔開心，佢個大手術做咗一年都冇，咁快又出事……佢年紀唔細，又手術又化療，真係好辛苦架！點解唔可以俾佢舒服啲咁過日子喎﹖！媽媽而家仲做緊手術，都未知做成點，又到爸爸出事……拾爺個病又反反覆覆咁 (如果佢再覺得唔舒服，聽日又要番去Dr Lam到覆診架喇！)，我個人其實唔硬淨架，我真係承受唔到！
媽媽被推出嚟一刻，望到佢左眼被蓋上紗布，右眼則通紅，一睇就知喊過嚟，神色仍然慌張，彷彿剛才受到極大驚嚇。我即刻上前慰問媽媽，佢第一句就話﹕「好痛呀！仲痛過生仔！」，媽媽話麻醉咗都仲感覺到刀片割眼嘅痛，但因為唔敢亂郁，佢只可以死命握緊拳頭去忍，個幾鐘入面，佢痛到出哂汗……見到媽媽咁樣，我真係好心痛！好彩，過咗一陣之後，媽媽開始心情好番啲，個人冇咁繃緊，慢慢講到頭先手術情況。
醫生出嚟之後，就話媽媽個手術成功，黃斑病變嘅情況唔壞，佢唔需要為媽媽雙眼噴氣。
陪媽媽上病房後，我哋唔想阻住佢休息，就同哥哥離開。我倆去九龍城廣場嘅吉之島幫媽媽買咗盒飯，哥哥收到細妹order，幫佢買咗個魚柳包，再去幫爸爸買牛肉粥，番到醫院，爸爸同細妹已到。以為媽媽瞓緊覺，點知原來佢冇瞓過，佢話個頭好痛！等咗好耐，姑娘先拎到止痛藥嚟……本來夜晚係打算等齊人一齊去食dinner，傾吓爸爸化療嘅嘢，但我越坐個人越唔舒服……可能之前唔夠瞓，個鼻又好敏感，為免自己病倒，我差唔多七點就先行離去，番屋企。
一番到屋企，見到拾爺，就忍唔住喊住同佢講爸媽嘅事。呢幾日，眼見身邊至親個個都出事，我真係好難過！
============================================
感謝 honeyhinbaby 提供以上資料
honeyhinbaby的網誌: http://honeyhinbaby.wordpress.com/
============================================
